Vaega e 6

Taeao Manuia. Taeao Totoa, i le mamalu o le tatou aufaitau nusipepa i lenei taeao fou.

Tatou te tau fai sii le Viiga ma le Faamanu i le Silisili Ese, i Lana tausiga alofa ma Lana

tausiga mamana, ia i tatou uma, ua mafai ai ona o tatou toe fesilafai i luma o nuu, ae le

o tua o nuu, i lenei taeao fou. E faafeiloai atu foi i tina ma tama matutua ua mafai ona

aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa, o le a toe sosoo atu le tatou Fagogo, “O TEINE E TO’ATOLU MA LE TAMA NA LEILOA” i lona vaega e 6.

************************************************

O le taeao na soso’o ai na alu atu ai le ulumatua a le tamaloa gaosi falaoamata ma fa’amatalaina uma mea sa tutupu i totonu o le potu lea na iai le teine. 

Ae sa pau le tulaga e le’i faamatalaina e le teine matua, o foliga faanoanoa sa ia va’aia i le alii na o la talatalanoa i lea po.

Sa fa’aalia e le alii mau’oa lona agaga faafetai i le afafine matua a le tamaloa gaosi falaoamata, ona o lea fa’ato’a faalogo i se faamatalaga, e ono o’o atu ai i le mauaina mai o si ona atalii.

Ma ona o lea tulaga faatasi ai ma le agaga fa’afetai a le alii mau’oa, ona fa’ato’a pau lea o se tagata ua mafai ona aoina i totonu o le potu, sa ia fa’ameaalofaina atu ai i le afafine matua a le tamaloa gaosi falaoamata ia se vaegatupe e $300.

Ua alu nei le teine matua i lona aiga ma le loto fiafia, i le tupe ua ia maua. Ma na iloa mamao mai lava e le to’alua a le tamaloa gaosi falaoa mata, le savalivali atu a si ana tama, na tamo’e mai ai ma fa’afeiloa’i o ia ma opo atu si ana tama teine.

O le po lea, sa talatalanoa ai le aiga a le tamaloa gaosi falaoamata, ma sa faamatalaina e le teine matua, mea na tutupu i le po muamua, i totonu o le fale a le alii mau’oa, na o’o lava i foliga faanoanoa a le alii na o la talatalanoa i lea po, i totonu o le potu.

Ma ona o le fiafia tele o le ulugalii i le fasi tupe lea ua maua mai i le taumafaiga a le teine matua, sa fai ai loa se latou tonu, o le a alu le teine lona lua, i le aso e soso’o ai, e toe nofo i totonu o le potu lea.

Sa faatonutonu uma e le teine matua ia lona uso lona lua, i fesili ma tali e ao ona ia tali atu ai i le alii pe a toe sau ia te ia.

O le taeao na soso’o ai, sa faapea loa ona aga’i atu le teine lona lua e saili mai sana ia $300 mai i le alii mau’oa.

[E FAIA PEA]