Vaega 10

Taeao Manuia. Taeao Totoa, i le mamalu o le tatou aufaitau nusipepa i lenei taeao fou.

Tatou te tau fai sii le Viiga ma le Faamanu i le Silisili Ese, i Lana tausiga alofa ma Lana

tausiga mamana, ia i tatou uma, ua mafai ai ona o tatou toe fesilafai i luma o nuu, ae le

o tua o nuu, i lenei taeao fou. E faafeiloai atu foi i tina ma tama matutua ua mafai ona

aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa, o le a toe sosoo atu le tatou Fagogo, “O TEINE E TO’ATOLU MA LE TAMA NA LEILOA” i lona vaega e 10.

*********************************************

E na’o na uma lava ona fai atu o le alii i le teine, se’i alu muamua e momoli lana fa’afetai ia i latou sa tausia ma fesoasoani ia te ia, sa faapea ona va’aia e le teine ia le matala mai o se faitoto’a i le ogatotonu o le potu ma savali atu loa iai le alii talavou lenei. 

Sa va’aia e le teine ia ni sitepu e pei e alu agai i lalo, o iina lea ua savali atu ai le alii ma sa tamo’e atu le teine ma mulimuli atu i le alii talavou.  Ae na ia fa’aeteete lava ina ia ‘aua ne’i iloa mai o ia e le alii talavou.

Ina ua taunu’u atu le alii i le mea na gata ai le fasitepu, sa matua’i ofo le teine lea o lo’o taumulimuli atu i tua, on aua matua’i ‘ese lava le lalolagi lea ua la taunu’u iai.

Sa va’aia e le teine i lona itu taumatau se vaitafe auro, ae o lona itu tauagavale sa tu mai ai se mauga, ae e le lanu meamata, ae e lanu auro.  Ae i le ogatotonu, o se laufanua e faatumulia i so’o se ituaiga fugalaau ‘ese’ese.

Na fa’aauau ona savali le alii talavou, ae o lo’o mulimuli atu ai lava le teine.

E savali lava la le alii lenei, ae ona fa’alo i fugala’au e pei o ni ana uo mafana.  E le’i umia ae taunu’u le to’alua lea i se togavao.  Ae o le mea ofoofogia i lea togavao, e lanu auro uma ia la’au.  Na va’aia e le teine le felelei mai o manu ‘ese’ese ma fa’ata’amilo i luga a’e o le alii talavou lea o lo’o muamua atu i luma.  O nisi o manu felelei, ua tu i luga o lona ulu ma ona tau’au.

Ae o le taimi lena, o lo’o talatalanoa iai le alii talavou i nei manu felelei.  Ma o le taimi lea, sa tago tau ai le teine ma gagau ‘ese mai se tama’i laula’au, mai i se tasi la’au ma nana e faamanatu ai lenei laufanua lanu auro.

Ina ua tu’ua e le alii talavou ia le togavao lanu auro, sa toe tau atu foi i seisi togavao.  Ae o le togavao la lea, e tumu i la’au lanu siliva.

[E FAIA PEA]