Vaega e 11

Taeao Manuia. Taeao Totoa, i le mamalu o le tatou aufaitau nusipepa i lenei taeao fou.

Tatou te tau fai sii le Viiga ma le Faamanu i le Silisili Ese, i Lana tausiga alofa ma Lana

tausiga mamana, ia i tatou uma, ua mafai ai ona o tatou toe fesilafai i luma o nuu, ae le

o tua o nuu, i lenei taeao fou. E faafeiloai atu foi i tina ma tama matutua ua mafai ona

aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa, o le a toe sosoo atu le tatou Fagogo, “O TEINE E TO’ATOLU MA LE TAMA NA LEILOA” i lona vaega e 11.

*************************************************************

Ua tu’ua e le alii talavou ia le vaomatu lanu auro, ae fa’aauau lana savaliga, ae o le taimi lea, o lo’o mulimuli gu gu atu ai i tua ia le afafine o le tamaloa gaosi falaoamata.  E le’i umi ae o la taunu’u i seisi foi togavao, ae o lona ‘ese’esega ma le togavao muamua, o lenei togavao, e lanu siliva uma ona la’au.

Sa va’aia e le teine le lolofi mai o manu ‘ese’ese, i le alii ma sa fa’aauau foi ona talatalanoa filemu atu iai le alii talavou ma ona milimiliina ta’itasi i latou.

Ona toe tago foi lea o le teine, i le gagau mai se lala la’au mai i se tasi o la’au siliva ma tu’u i totonu o lana taga.

Ina ua mae’a ona fa’amavae atu le alii talavou lenei i ana uo i totonu o le togavao, sa faapea loa ona toe foi atu i le auala na o la o mai ai.  Ma na toe taunu’u o ia i le mea na iai le fasitepu lea e alu agai i luga i le potu lea na la o mai mai ai ma le teine.

Ina ua toe taunu’u i la’ua i luga, sa fa’atopetope atu le teine ma nofo i tafatafa o le afi, e pei lava e leai se mea na tupu.

Ua faapea atu loa le alii talavou ia te ia, “Ua mae’a ona ou fa’amavae i a’u uo.  Fai loa le ta mea’ai.”

Na tu a’e i luga le teine ma amata ona la’u atu le mea’ai i luga o le laulau ma o la nonofo ifo i lalo ma a’ai fa’atasi ae leai ma se tasi na tautala.

Ina ua laulelei le alii talavou sa ia faapea mai loa, “O le a ou alu e fai sa’u malologa.”  Ma ia tu ifo i luga ma savali atu i le moega ma taoto ai i luga, ma moe loa.  Ae o le taimi lena, ua savali atu le teine ma se’i i fafo ia la la la’au ia sa na ia gagau mai i la’au lanu auro ma le la’au siliva, ma tu’u atu i autafa o le alii talavou.

Ona ia savali atu loa lea i se nofoa fa’amalu ma taoto ai ma fai ai loa o sana ia foi malologa.

[E FAIA PEA]