Ads by Google Ads by Google

Tele faaletonu i le auaunaga a le ‘911’


[ata: foa'i]
ausage@samoanews.com

Pago Pago, AMERIKA SAMOA

 

E le o tulaga lelei le auaunaga a le polokalame o le ‘911’ i le taimi nei e peiona faamanino e le Faatonusili o le Matagaluega o le Puipuiga o le Saogalemu Lotoifale i se iloiloga ma le Maota o Sui i le vaiaso na te’a nei. O le iloiloga na taitaia e le afioga i le ali’i Faipule ia Avagafono Vaiaga Maiava.

 

O le iloiloga na faatulaga ina ua tele faasea mai le atunuu faasaga i le auaunaga a le ‘911’. Na taua e le afioga i le ali’i faipule mai Swains ia Su’a Alexander Eli Jennings nisi o aiga o talavou na pule i o latou soifua na faasea i le faaletonu o le auaunaga a le ‘911’ i le taimi na talosagaina ai se fesoasoani.

 

O nisi o aiga na fiu e faatali le taunu’u atu o le fesoasoani a Leoleo ma le EMS i le taimi na talosagaina ai se fesoasoani. Na taua e aiga le fiu e faatali le taunu’u atu o Leoleo ma le EMS mo se fesoasoani na faanatinati ae ua tuai lava.

 

Ina ua fesiligia e le afioga i le ali’i Faipule ia Faimealelei Anthony Fu’e Allen le Faatonusili o le Puipuiga o le Saogalemu Faalotoifale, le afioga a Samana Semo Veavea poo lelei le auaunaga a le ‘911’ pe leai, na tali Samana, “e le o lelei le auaunaga a le ‘911’, e le gata o loo faaletonu ae le o ausia fo’i le tulaga maualuga e tatau ona i ai.”

 

Na maua le avanoa o Samana e faamanino ai i luma o le Komiti le faaletonu o loo tula’i mai i le auaunaga a le ‘911’.

 

O le ‘911’, e le gata ua leva ae ua le toe aoga fo’i lana auaunaga o loo i ai nei. Na taua e Samana le la la talanoaga ma le Komesina o Leoleo, ina ia tuuina atu le ‘911’ e faatautaia e le matagaluega o le Puipuiga o le Saogalemu Lotoifale.

 

O le auaunaga a le ‘911’ o loo i ai i le taimi nei e pei ona saunoa Samana, o le taimi lava e telefoni atu ai se tagata mo se fesoasoani ona o se faalavelave tupu faafuase’i, e faafesoota’i ai e le tali telefoni a le ‘911’ le Ofisa o le EMS ma faailoa i ai faamatalaga uma lava e uiga i le faalavelave tupu faafuase’i atoa ai ma le nofoaga o loo i ai. O le taimi e mae’a ai ona tuuina atu e le talitelefoni faamatalaga uma i le EMS, ona tu’u loa lea i lalo o le telefoni, e le toe i ai se fesootaiga a le tagata na vili mai mo se fesoasoani a le ‘911’.

 

Na faamanino e Samana e faapea, e le o le auala lea o loo faafoe ai le auaunaga a le ‘911’ i vaega eseese o le malo tele o Amerika. O le auaunaga a le ‘911’ i le malo tele i le taimi nei, o le taimi lava e faafesoota’i ai e se tagata le ‘911’ mo se fesoasoani, e le mafai ona toe faamamulu e se atu e le ‘911’ le tagata lea se’i vagana lava ua taunu’u Leoleo poo i latou o loo ofoina atu le Fesoasoani Muamua (first responders) i le nofoaga o loo tula’i mai ai le faalavelave ona faatoa mae’a lea o le talanoaga a le ‘911’ ma le tagata na valaau ane mo se fesoasoani.

 

Na faatusa e Samana le auaunaga a le ‘911’ i le atunuu i le taimi nei, “ua na o ni tali telefoni”. 

 

O le fesili pe faapefea ona faaleleia la auaunaga a le ‘911’ i le atunu’u, na saunoa ai Samana e faapea, e i ai le isi polokalame fou o loo faatautaia i lalo o le tautua a le Matagaluega o le Puiopuiga o le Saogalemu Lotoifale (DHL), lea e mafai ai ona iloa nofoaga eseese o loo i ai maota ma laoa o aiga o le atunu’u.

 

O lea auaunaga na faaaoga e le DHL i le taimi na tula’i mai ai le afa malosi o GITA i le tausaga e 2018, lea na faigofie ai ona latou asia nofoaga na sili ona faaleagaina i le afa. O lea auaunaga fou o  loo aofia ai ma semina ma aoaoga e fesoasoani ai i le aufaigaluega i le faaleleia o le latou tautua, faapea ai ma le tomai faapitoa e moomia i le taimi e tula’i mai ai le faalavelave.

 

O le isi mataupu na fesiligia i le iloiloga, o le totogiina o pili a le ‘911’. Saunoa Samana e faapea, e le o iloa poo ai o loo totogiina pili a le ‘911’

 

Na taua e ni isi o afioga i Faipule faanoanoaga i le tulaga o loo i ai le tautua a le ‘911’ i le taimi nei. O nisi sa latou taua le tele o faasea mai o latou itumalo e tusa ai o le auala o loo tali atu ai le vaega e faatinoina le fesoasoani muamua i le taimi e tula’i mai ai se faalavelave i nu’u ma afioaga.

 

O nisi o faasea e faatatau i le fiu o aiga e faatali mai le vaega o loo faatinoina le fesoasoani muamua. O nisi o taimi e taunuu atu le fesoasoani ua siliga tali i seu se lavea’i, ona o le leaga o le fesootaiga i le taimi na tu’u atu ai e le ‘911’  i le EMS faamatalaga uma e faatatau i le nofoaga ma le fale o loo tula’i mai ai le faalavelave.

 

Na fesiligia e le afioga i le alii Faipule mai Vaifanuatele ia Lavea F. Mauga le faafitauli o loo tula’i mai i le Ofisa o Leoleo i Sasa’e, i le leai lea o se taavale fuimu ma se taavale EMS e fesoasoani i le tautuaina o le Falelima i Sasa’e. Na taua e Lavea le tele o faalavelave ua tutupu ma ma’imau ai soifua o le atunu’u. 

 

Sa ia talosagaina le sui o le EMS ina ia faaopoopo nisi ana taavale e fesoasoani i lana tautua. aemaise o lea ua tele faamanuiaga tau tupe ua maua mai i le malo tele ona o le faama’i, e fesoasoani ai i le faatupeina o nisi ta’avale faaopoopo mo lana tautua i Tutuila nei ma Manu’a.

 

Na taua e le Sui Fofoga Fetalai ia Fetu Fetui Jr le faaletonu o le tautua a le Fuimu ma le EMS mo le itumalo o le Manu’atele. Na taua e Fetu se tasi o faalavelave na aafia ai se maota o se aiga i Manu’a, na mu lava le fale seia oo ina liu efuefu ao tutu le aiga ma matamata i ai e aunoa ma se fesoasoani e mafai ona faia, ona o le leai o se auaunaga a le vaega o le Fuimu ma le EMS.

 

Na lagolagoina e le sui mai le Itumalo o Saole ia Titialii Kitara Vaiau finagalo fa’aaliga o afioga i Faipule. Saunoa Titiali’i e faapea, e to’alua soifua na ma’imau ina ua goto se va’a alia i Auasi i le tausaga na te’a nei, e mafua mai i le leaga o le tau. Ae i lona talitonuga, ana i ai se auaunaga a le Ofisa o Leoleo e pei o ni va’a faaola, e mafai lava ona faasaoina soifua o i laua na maliliu. 

 

Na fesiligia i le afioga i le faipule mai le Itumalo o Itau le tulaga o loo i ai tapenaga mo se galulolo poo ni mafui’e fo’i e aafia ai le atunu’u. Na taua e le afioga a Manumaua Wayne Wilson e faapea, afai o lea ua faaletonu sailini sa faamoemoe i ai le atunuu mo le tuuina mai o le faailoilo i le taimi o faalavelave faafuase’i, o aoga le isi auala lea na manatu e fa’aaoga ai Pulenu’u latou te logoina itumalo ma nu’u.

 

Na mafua ona fesili le afioga a Manumaua i lea fesili, o le lapataiga mo le galulolo lea na aafia ai le atunuu i le vaiaso na te’a nei, na tula’i mai i le itula e 2:00 i le vaveao. Na finagalo Manumaua e faamanino e le molimau i le Komiti, poo le a se aafiaga o le atunuu i le taimi e tula’i mai ai lapataiga faapea i le taimi o le vaveao, aemaise lava pe afia e faaletonu sailini toe faaletonu fesootaiga ma Pulenu’u atoa ai ma Leoleonuu

 

Saunoa Samana e faapea, talu ai o loo faaletonu tulaga o sailini i le taimi nei, sa manatu ai loa lona Ofisa e faaaoga le isi auala mo fesootaiga ina ua tula’i mai lapataiga o le galulolo mo Amerika Samoa i le itula e 2:00 i le vaveao o le aso Lua i le lua vaiaso talu ai.

 

Ae ui i nei auala uma ma taumafaiga ina ia logo ai le atunu’u, e talitonu Samana o le auala sili lava ma faigofie e tatau ona aoaoina ai tagata uma o le atunuu, soo se taimi lava e faalogoina ai le eleele ua gaioi poo se mafui’e ua gatete ai le eleele, o le taimi loa lea e tatau ai i le tagata ona sulufa’i i se nofoaga maualuga poo nofoaga faapitoa ua fausia e sulufa’i i ai mo galulolo.

 

I lona talitonuga, e vave ma faigofie atu le auala lea nai lo se isi lava auala e fesootai atu ai i le atunu’u.

 

Sa ia toe taua le galulolo na aafia ai Amerika Samoa i le 2009, e na o le 12 lava minute na va ai le lulu o le mafui’e ma le taunu’u mai o le galu muamua, ae sili atu le matuia pe afai o se galulolo e tula’i mai i le leva o le po.