Pago Pago, AMERIKA SAMOA - 

E le o taliaina e aiga o ali’i se to’alua lea na maua o la tino maliliu i le gataifale o Amouli ripoti na tuuina mai e le afioaga, e faapea na mafua ona maliliu i laua nei ona na tafefea i laua i le malosi o galu o le sami i le taimi na alu ai le la fagotaga. 

O le mae’a ai ona fesiligia e sui o aiga-na-lua o nisi o molimau e tusa ai o lenei fa’alavelave, atoa ai ma manu’a na aafia ai tino o i laua ua maliliu, na manatu ai loa aiga o i laua na aafia i lenei fa’alavelave e teena ripoti na malelemo i laua nei i le sami. 

O lo o i ai masalosaloga, e i ai se faalavelave na aafia ai i laua na i’u ina maliliu ai, peita’i, o nei masalosaloga mai sui o aiga, faatoa mafai ona manino pe afai ae mae’a suesuega a Leoleo o loo faagasolo, atoa ai ma se ripoti mai le foma’i e faailoa mai ai le mafua’aga o le maliliu o i laua nei. 

O i laua ua maliliu o le susuga a Junior Toleafoa mai le afioaga o Amouli, ua faaipoipo ma e to’atasi lona alo, ma le susuga a Alofa Christian Togia mai le afioaga i Aoa, ua faaipoipo ma e to’afa ona alo. 

E tusa ai o ripoti e faatatau i lenei faalavelave ina ua faatoa alia’e mai i le aso Gafua o le vaiaso na te’a nei, Setema 28, 2020, na taua ai e faapea, o Alofa ma Junior na alu le la faiva e fa’aaoga ai le upega fagota i le taimi a o maualuga le sua a le tai. O le malu ifo ai o le afiafi i le aso lava lea pe tusa o le itula e 8:00 i le po na manu a’e ai loa le tala ua maliliu Alofa ma Junior, ina ua maua o la tino maliliu i le sami. 

Na taua i lea lava ripoti e faapea, e masalomia na tafefea i laua i le malolosi o galu fafati o lea afiafi, aemaise ai le tulaga siisii o le gataifale sa i ai. 

Na taua fo’i e nisi o le afioaga o Amouli lo latou vaaia o Alofa ma Junior o loo faia le la faiva i le afiafi o le aso lava lea ae ua amata ona agai mai o le po. Ae o se tulaga na faateia ai i latou ina ua latou faalogo ua maliliu i laua.

E talitonu le Samoa News o lo o faagasolo suesuega a le Ofisa o Leoleo e uiga i lenei mataupu. 

O le vaiaso na te’a nei na maua ai le avanoa o le Samoa News e fesiligia ai le Pulenu’u o le afioaga o Amouli e tusa ai o lenei mataupu, i le mae’a ai lea ona maua e le Samoa News o ni ripoti e faatatau i se inugapia sa faia i le va o ia ma ali’i e to’alua ua maliliu i lona fale, a o lumana’i ai le faalavelave e pei ona maliliu ai i laua. 

Na faamaonia e le Pulenu’u, sa faia le latou inugapia ma Alofa ma Junior i le afiafi o le aso na tula’i mai ai le fa’alavelave i luma o lona fale. A o faia le inugapia, sa faalogo o talanoa Alofa ma Junior i se la fuafuaga mo se faiva, ae sa ia fautuaina i laua e faatali te isi se’i tau pe atu le sua o le tai ona latou o lea e togi le latou upega. 

O le afiafi ina ua amata ona malu mai le pogisa, na faamaite ai loa le faiva a Alofa ma Junior, ae sa taua e le Pulenu’u lona faatuatuai teisi ona sa tagi lona afafine. E alu atu i luma o le alatele e tapena ai le latou aga’i atu mo le latou faiva, ae faailoa ane e se tasi o taule’ale’a ua leva ona o atu i tai i le sami ia Alofa ma Junior. 

Fai mai le Pulenu’u, na fiu e tau autilo se moli e emo mai gatai o le sami e faailoa mai ai le vaega tonu o loo fagogota ai Alofa ma Junior e leai ma se faailoilo. Sa oso lona manatu, ai ua a’e mai le faiva a le au ali’i ia. 

I lana molimau, pe tusa ma le itula talu ona o ese atu Alofa ma Junior mo le la faiva ae faatoa alu atu loa ia i tai i le sami ma fai loa lana faiva. E le i umi ona fai lana faiva ae faafuase’i loa ona lavea i le i’a o le ‘jellyfish’ ma paka uma ai lona tau’au, ona ia manatu ai loa lea e toe fo’i mai i uta ona ua lavea i le ‘jellyfish’.

A o aga’i mai i uta, na faateia o ia ina ua tau lana vaai i le tino o Alofa o loo opeopea atu i le sami. E ui i le pogisa o le taimi lea, pe tusa o le 9:00 i le afiafi, na taua e le Pulenu’u i le faatalatalanoaga ma le Samoa News lona vaaia o le lanu viole o le tino o Alofa, e ta’u atu ai ua leva ona maliu o ia.

O le taimi lava na tau ai i le tino o Alofa, na toe oso vave mai ai lava i lona mafaufau le faalavelave na tupu i lona Tama, lea fo’i na malemo i le nofoaga lava lea e tasi, o ia fo’i na mauaina lona Tama. 

O le taimi lea na tago atu ai loa ma toso mai i uta le tino maliu o Alofa. Sa faigata ona toso mai i uta ona o amu na faalavelave atoa ai ma le pe o le taimi, peita’i na mafai lava ona ia faaaoga le loloto o le isi itu o le sami ma mafai ai loa ona ia toso mai i uta le tino o Alofa. Sa ia valaau atu i le alii sa i ai i le matafaga i le taimi lea e alu atu e fai le Fesoasoani Muamua (CPR), ae se’i toe fo’i i tai e saili mai le tino o Junior. 

O le taimi lava fo’i lea na ia valaau atu ai i lona uso laititi e tago e vili le Ofisa o Leoleo ma logo i ai le fa’alavelave. 

Pe tusa o le itula atoa talu ona maua le tino maliu o Alofa ae maua loa fo’i ma le tino maliu o Junior i le isi itu o le ‘alo’alo, ma ia taumafai loa fo’i e toso mai i uta i le pa’u matu. 

Sa ia taua le i ai o ni alii sa fesoasoani atu ia te ia i le tosoina mai i uta o le tino o Junior ma taumafai ai loa fo’i e faia le Fesoasoani Muamua, faatoa momoli atu ai loa o la tino i le Falema’i i Faga’alu, le LBJ, pe tusa lea o le itula e 10:52 i le po lava lea. 

O nisi o tulaga sa maitauina i le faatalatalanoaga ma le Pulenuu, o manu’a sa i ai i lona tino e aofia ai lona fatafata ma ona vae. O manu’a sa i lona fatafata e atagia mai ai ni atigi lima o se tagata sa taumafai e fela’u. Na taua e le Pulenu’u, o manu’a ina ua oloia lona tino i amu a o taumafai e toso mai i uta tino o ali’i na maliliu. 

E le tutusa le molimau a le Pulenu’u ma molimau a aiga o ali’i ua maliliu. Na latou taua i le Samoa News e faapea, e leai ma ni manu’a poo ni maosia i tino o Alofa ma Junior e atagia mai ai na oloia o la tino i amu. Pau manu’a o loo aafia ai i laua, o manu’a tuga i o la ulu faapea ai o la foliga, e atagia mai na sasa i ni mea malo. 

Na fesiligia le Pulenu’u pe faamaoni lana molimau e leai se isi lava gaioiga na tula’i muamua mai ina ua mae’a le latou inugapia ma ali’i nei. Na tali le Pulenu’u, ioe. 

Na teena e nisi o molimau na fesiligia e le Samoa News nisi o vaega o le faamatalaga a le Pullenu’u. Na taua e molimau e faapea, e le i sua malosi le tai i le afiafi lea, ae sa pe lava, e le ono mafai ai fo’i ona malemo pe tafea ai se tagata. 

Na taua e le Pulenu’u o le itula e 9 na faatoa logoina ai le Ofisa o Leoleo, ae na taua e nisi molimau faatuatuaina, o le itula e 8:00 i le afiafi lea na alua atu ai le valaau mai Amouli mo se fesoasoani. O le Pulenu’u lava fo’i lea na telefoni atu i le Ofisa o Leoleo, ae le o se isi tagata talavou e pei ona taua e le Pulenu’u, o lona uso laitiiti. 

E feteena’i fo’i le moimau a le Pulenu’u ma le molimau a le aiga o Alofa i le tulaga o le taimi na maua ai le tino o Alofa atoa ai ma le taimi na auina atu ai lona tino i le Falema’i. Na taua e le Pulenuu, pe tusa o le itula e 10:52 na aveese atu ai tino maliliu o Alofa ma Junior mai Amouli ma auina atu i le Falema’i i Faga’alu, peita’i na taua e sui o aiga, o le pepa lea e faapipii i le lima o Alofa ma Junior o loo tusia ai, o le itula e 10:34p.m lea na taunuu ai tino o alii nei i le Falema’, lona uiga ua leva ona auina atu. 

Sa i ai le Faletua o le susuga a Alofa i le taimi na fesiligia ai e le Samoa News le alii Pulenuu. Na fesiligia e le Faletua lea I le Pulenu’u, i le mafua’aga na le telefoni atu ai e logo atu o ia e tusa ai o le fa’alavelave, pe afai na te taua Alofa ma Junior o ni uso ia te ia. Ae na taua e le Pulenu’u, sa ia faatali seia i ai se taimi.