Na teena e ali’i Leoleo Sinia e to’alua o loo tu’uaia i le faia o amioga mataga le taupulea i ni tama’ita’i Leoleo, tu’uaiga a le malo fa’asaga ia te i laua, ina ua tutula’i i luma o le Fa’amasinoga Fa’aitumalo i le aso Faraile o le vaiaso na te’a nei.

O loo tuuaia e le malo ia Lt. Siaosi Aiono ma Emanuele Lito i moliaga mama ta’itasi o le fa’ao’olima i le tulaga tolu. O lea moliaga o se solitulafono C lea o solitulafono mama, lea e mafai ona fa’asala ai se tasi i le toese mo le umi e le silia i le 15 aso, pe fa’asala i le salatupe e le silia i le $300, poo le fa’asala fo’i i fa’asalaga uma ia e lua.

O le ali’i loia fautua ia Marcellus T. Uiagalelei o lo o tula’i mo Aiono, ae o le ali’i loia fautua ia Ryan Anderson o lo o tula’i mo Lito.

Ina ua valaau mataupu a i laua nei i luma o le afioga i le ali’i Fa’amasino Fa’aitumalo ia Fiti Sunia, na fa’aleoina ai e ali’i loia tali tete’e a i laua nei fa’asaga i moliaga ta’itasi ua faila fa’asaga ia tei laua, i le taimi o le la ulua’i tula’i i le vaiaso na te’a nei.

Ua fa’amauina e le Fa’amasinoga tali tete’e a i laua nei, ma ua toe tolopo ai loa a laua mataupu e toe valaau i le aso 28 Iuni i le itula e 9:00 i le taeao.

Talu ai o le Tusi Samania lea na poloaina ai le oo atu o Aiono ma Lito i luma o le fa’amasinoga i le vaiaso na te’a nei, na faia ai loa e le afioga i le ali’i Fa’amasino ia Sunia le poloaiga, ina ia fa’aauau ai pea ona fa’asa’oloto i laua i tua e aunoa ma le poloaina o se tupe e totogi ona fa’atoa mafai lea ona tatala i laua.

A o fa’asa’oloto ai Siaosi ma Lito, e i ai tuutuuga a le fa’amasinoga e ao ona la usita’i i ai. O ni isi o ia tuutuuga e aofia ai le avea lea o i laua ma tagatanu’u lelei e tausisi ma usita’i i tulafono a le malo; ia auai i soo se taimi e valaau ai a laua mataupu; ia fesoota’i vava lalata ma la loia, ma ia aua fo’i nei o la taumafai e fa’afeso’ota’i tama’ita’i Leoleo o lo o tu’uaia na a’afia i le mataupu e pei ona tu’uaia ai i laua, pe taumafai fo’i e fa’afeso’ota’i ni isi o la aiga, poo molimau fo’i a le malo.

Mo Aiono, ua poloaina o ia ina ia aua ne’i taumafai e tuua le atunu’u i soo se taimi e aunoa ma se fa’atanaga a le fa’amasinoga. Ua poloaina fo’i le tuuina atu o lana tusi folau e taofi e le itu a le malo, se’i vagana ua mae’a lana mataupu.

O le mataupu e pei ona tuuaia ai Aiono ma Lito na alia’e mai i le masina na te’a nei, ina ua vavao ripoti e fa’atatau i tagi sa fa’aulu e tama’ita’i Leoleo e to’alua na a’afia, i le faia lea e i laua nei o uiga mataga ia te i laua.

O lenei mataupu sa suesueina e le Ofisa o le Loia Sili, lea na galulue fa’atasi ai ma ni ali’i Leoleo suesue fa’apitoa mo le tau tu’u fa’atasia o mau fa’amaonia o lenei mataupu.

O le mae’a ai o suesuega a le Ofisa a le Loia Sili e uiga i lenei mataupu, na faila ai loa e le malo le latou tagi fa’asaga ia Aiono ma Lito i le aso 14 Me, 2018, ma tauaao atu ai loa le kopi o le tagi ia Lito.

Na fa’atoa tauaao e Aiono le kopi o le tagi a le malo i le vaiaso na te’a nei, ina ua toe taliu mai o ia i le atunu’u mai lana malaga i Ausetalia mo ni nai vaiaso.

E pei ona taua e se molimau fa’atuatuaina i le Samoa News, e tuua e Aiono ia Amerika Samoa i le aso To’ona’i, Me 12, ae o le aso Gafua na sosoo ai, aso 14 Me faila e le malo le latou tagi i luma o le fa’amasinoga.

Ua faamaonia mai e se molimau i le Samoa News, o Aiono na fa’amavae mai lana galuega fa’a leoleo ao lei malaga ese atu ma le atunu’u, ae o Lito na aloaia i le vaiaso na te’a nei lona malolo litaea mai lana galuega.

O le mataupu fa’asaga ia Lito na alia’e mai i le ofisa o Leoleo i Fagaitua i le masina o Iuni o le tausaga na te’a nei. O loo tuuaia o ia i lona tagofia o itutinosa o se tama’ita’i Leoleo i totonu o le ta’avale Leoleo, a o latou malaga fa’atasi ma se isi ali’i Leoleo, atoa ai ma lona lafo o ni tala mataga toe fa’alumaluma ai le tama’ita’i Leoleo.

Ina ua fesiligia e le Samoa News ia Lito e uiga i lenei mataupu i le masina na te’a nei, sa ia teena ai lona tagofia o itutinosa o le tama’ita’i Leoleo, peita’i, sa ia ioeina e fa’apea sa la ta’aalo ma le tama’ita’i Leoleo. O ana fa’amatalaga fo’i sa lafo i le tama’ita’i, o tala masani lava e pei ona faia e le to’atele o tagata faigaluega.

O le mataupu fa’asaga ia Aiono na alia’e mai i le masina na te’a nei i le Ofisa o Leoleo i Tafuna, ina ua faila e se tama’ita’i Leoleo sa la galulue sana tagi i lana Ta’ita’i e fa’atatau i le tago atu o Aiono i lona itutinosa, ma tofu atu ai loa le mataupu i le Vaega Suesue Faapitoa a le Ofisa o Leoleo.

Na taua i le tagi fa’asea a le tama’ita’i Leoleo le fa’ateia o ia ao punou e aumai sana vaiinu i le pusaaisa i totonu o le ofisa o Aiono, ae ona fa’alogoina se tagata ua tago atu i lona nofoaga. Sa ia faliu i tua e fia iloa poo ai ae fetaui ma le taumafai o Aiono e kisi atu ia te ia.

Ina ua fesiligia Aiono e le Samoa News e uiga i lenei mataupu, sa ia teena ai se tulaga faapea na tula’i mai i le va o ia ma le tama’ita’i Leoleo. Sa ia taua e fa’apea, o ta’aloga masani lava e tutupu ae le o ni mea moni.