Ads by Google Ads by Google

Tete’e le malo i le pili a Faipule e sui ai totogi o laisene pisinisi


Susuga ia Finauvale Alex Zodiacal o le sui faatonu lagolago i le vaega o pisinisi ma fefaatauaiga faavaomalo i le Matagaluega o Fefaatauaiga a le malo o Amerika Samoa. [ata AF]
ausage@samoanew.com

Pago Pago - AMERIKA SAMOA

 

Na teena e le sui o le malo o Amerika Samoa le pili tau faaofi a le Maota o Sui, e aveese ai totogi o laisene pisinisi mai le tulafono ae tuu atu le avanoa i le Matagaluega o Fefaatauaiga ma Alamanuia latou te fuafuaina tau talafeagai mo totogi o laisene pisinisi.

 

O le sui o le malo na molimau i le pili a le maota o sui, o le susuga a Finauvale Alex Zodiacal, o le sui faatonu lagolago o Fefaatauaiga Faavaomalo ma Pisinisi a le Matagaluega o Fefaatauaiga ma Alamanuia a le malo o Amerika Samoa.

 

O le iloiloga na faatautaia lea i luma o le Komiti o Fefaatauaiga a le maota o sui, i lalo o le taitaiga a le Taitaifono, afioga i le alii faipule ia Samuel Ioka A. Meleisea, o ia fo’i lea na faauluina le tulafono.

 

Na taua e Finauvale i lana molimau e faapea, e le taliaina e le latou Ofisa le tulafono tau faaofi, ona e le o se pili na afua mai i le faigamalo a Lemanu ma Talauega, ae o le pili na afua mai lava i totonu o le maota o sui.

 

O le popolega o le malo i le suiga o le tulafono mo totogi o laisene pisinisi e pei ona saunoa Finauvale, o lea faatoa mae’a le siitaga o totogi o laisene pisinisi i le 2015, a o lea foi ua manatu le Fono e toe fai le isi suiga e pei o le agaga o le tulafono.

 

E talitonu le susuga a Finauvale, e tatau ona faia ni iloiloga e faatatau i lenei tulafono, e aofia ai le fesiligia o Faalapotopotoga a le Aufai Pasi ma Taxi i le atunu’u, poo le a fo’i ni o latou lagona e faatatau i lenei tulafono. 

 

O le agaga o le tulafono e pei ona taua i le tino o le pili, o le 50% o le tupe e maua mai i le totogi o laisene pisinisi fou pe a pasia lenei tulafono, o le a tuuina atu e totogi ai totino o Komiti Faafoe o loo tautua i totonu o le faigamalo a Amerika Samoa. 

 

Sa ia taua e faapea, ua uma lava ona i ai tulafono ma ta’isala e lima taitaiina ai galuega faatino a Komiti Faafoe i totonu o le malo, e leai fo’i se mea e atugalu ai fo’i le fono i lea tulaga. 

 

Afai ae manatu le Fono Faitulafono e fau se tulafono e saili ai se tupe e totogi ai sui o Komiti Faafoe e pei o le agaga o le tulafono lenei, e tatau la ona i ai se tulafono faapitoa e faaagaga mo lea manaoga, ae le o le taumafai e faapipii faatasi ma le tulafono o le totogi o laisene mo pisinisi.

 

Saunoa Finauvale e faapea, e faavae lana molimau i le fautuaga a le Loia a le malo sa tuuina atu ia te ia e tusa ai o lenei tulafono.

 

A o le i tuuina atu le avanoa i afioga i Faipule e faasoa ai o latou finagalo i le iloiloga, na maua le avanoa o le afioga i le alii Faipule ia Meleisea e toe faamanino atili ai le agaga o le tulafono. Saunoa le afioga i le Taitaifono e faapea, na pau le agaga o le tulafono, o le aveese mai lea o le totogi o laisene pisinisi o loo i ai i lalo o le tulafono, ae tuu atu le malosi i le Matagaluega o Fefaatauaiga ma Alamanuia a le malo, latou te suesue ma faatulaga ai totogi talafeagai ma pisinisi eseese uma i le atunu’u. 

 

Na taua atili fo’i e Meleisea lona popole i finagalo ua faaalia ona o loo faalogo le sui o vaega faasalalau.

 

Saunoa le Sui Fofoga Fetalai ia Fetu Fetui Jr, na te le lagolagoina le tulafono tau faaofi e faaleaoga ai siitaga i totogi o laisene pisinisi na pasia i le 2015. Na lagolago e Fetu le tali tete’e a le susuga a Finauvale i le tulafono tau faaofi a le malo. 

 

E pei ona saunoa Fetu, e le i leva atu nei ona pasia le tulafono e sii ai totogi o laisene pisinisi, a o lea fo’i ua faaulu lenei tulafono e toe sui ai. 

 

Na te le lagolagoina le agaga o le tulafono, e tuu atu ai le malosi i le Matagaluega o Fefaatauaiga ma Alamanuia latou te fuafua ma faatulaga totogi o laisene pisinisi. 

 

O le talitonuga o Fetu, o le tiute lena o le Fono Faitulafono, latou te fausia tulafono mo le manuia o le atunu’u lautele atoa ai ma pisinisi.

 

Na taua atili e Fetu le tatau lea i le malo ma le Fono Faitulafono ona silasila i le sao taua o pisinisi mo le malo, e ala i lafoga o totogi o loo maua ai e le malo le faitau miliona ma miliona e faatino ai lona atina’e.

 

Na vave ona faauilavea le afioga a Meleisea ma ia talosagaina ai loa le pili ina ia toe taoto atu i le komiti mo le toe faaauau i ai o nisi suesuega, ona faatoa toe tuuina mai lea i totonu i se taimi o i luma.

 

Sa ia taua e faapea, o le agaga o le tulafono, ia tuu le avanoa i le malo latou te fuafua tatau ai siitaga i totonu o laisene pisinisi, ae maua ai se vaega tupe e totogi ai totino o Komiti Faafoe o loo galulue mo le manuia o le malo. 

 

O le tele o taimi, e tau saili mai sui o Komiti Faafoe e faaaoga ai le kalama mo le usuia o fono, e mafua mai lea tulaga ona e le o i ai ni vaega tupe e totogi ai totino o Komiti Faafoe nei. Ae afai e pasia lenei tulafono ma maua se vaega tupe mo lea manaoga, e i ai lona talitonuga o le a le toe tula’i mai lenei faafitauli i le lumana’i.

 

Na taua fo’i e Meleisea le mae’a lea ona la faasoa ma Loia Sili lagolago e tusa ai o lenei tulafono, ma ua faaalia fo’i le tete’e o le Loia i le agaga o le tulafono. 

 

Na fesili le afioga i le alii faipule ia Vaetasi Tuumolimoli Saena Moliga ia Meleisea i le mafua’aga ua ala ai ona manatu le komiti e faaleaoga le tulafono na sii ai totogi o laisene pisinisi, poo le mea ea ua le lava tupe ao a le malo.

 

Saunoa Meleisea, e leai, o loo lava tupe maua a le malo mai totogi o laisene pisinisi, ae o le tulaga e pei ona maitauina, e tasi lava le totogi o laisene pisinisi ae eseese le tetele o pisinisi. Mo se faataitaiga e pei ona saunoa Meleisea, e lata i le 3,000 le aofa’i o tagata faigaluega a le StarKist Samoa, ae $150 le totogi o lana laisene pisinisi i le tausaga, fuafua i le tamai pisinisi e na o le to’a 3 tagata faigaluega o loo i ai, ae $150 fo’i le totogi o le laisene pisinisi lea i le tausaga. 

 

E le i lagolagoina e Vaetasi le agaga o le tulafono. Sa ia taua e faapea, o le taimi lava e tuu saoloto ai le avanoa i le malo e pule saoloto ai i le faia o totogi o laisene pisinisi, ona tula’i mai ai loa lea iina o faafitauli i le va o le malo ma pisinisi. I lona talitonuga, e tatau lava ona malu puipuia le tulafono e puipuia ai pisinisi i le atunu’u.

 

Saunoa le afioga i le alii faipule ia Vailiuama Steve Leasiolagi e faapea, e oo lava foi i le malo e le o usitai i le auala e faafoe ai le tulafono.

 

Fai mai le tulafono, e $150 le totogi o le laisene pisinisi, ae afai e i ai nisi laisene pisinisi e faaopoopo a le pisinisi e tasi, ona totogi loa lea o laisene faaopoopo i le ta’i $100, peita’i o le taimi nei, e le o usitaia e le malo lea tulaga, afai lava e 7 laisene pisinisi a le pisinisi e tasi, o le faa 7 fo’i lena ona totogi e le faipisinisi e to’atasi le ta’i $150 mo laisene uma e 7.

 

E pei ona taua i le agaga o le tulafono e faapea, talu ai le faatupulaia o pisinisi i Amerika Samoa i le taimi nei, ua tatau ai i le malo ona silasila toto’a i soo se ituaiga pisinisi ma fuafua le totogi mo laisene e fetaui ma le tulaga o loo i ai le pisinisi.

 

O nisi o pisinisi e toatele tagata faigaluega e galulue ai ae o nisi e toa laiti, fuafua lava i le ola ma le malosi o le pisinisi. O le aveese mai o totogi o laisene pisinisi mai le tulafono ae taoto atu i le Matagaluega o Fefaatauaiga ma Alamanuia, o le a mafai ai ona fuafua lelei le totogi o laisene o pisinisi.

 

O le 50% o le tupe e maua mai i le totogi o laisene pisinisi o le a faa avanoa e totogi ai totino o Komiti Faafoe ma Komisi Faatonu i totonu o le malo.