Pago Pago, AMERIKA SAMOA - 

Ua molia nei se alii ave taxi e suafa ia Albert Tofili, i le gaoi, ina ua ia le totogia se tinoitupe e silia ma le $3,000 i le pisinisi o le Chin Store & Corporation. Sa tula'i Tofili i luma o le faamasinoga i le masina ua tuana'i.

O le moliaga o le gaoi, ua molia ai Tofili, e ono faasala ai o ia i le falepuipui, i le o'o atu i le 7 tausaga po o se sala tupe e i le va o le  $5,000 ma le $20,000 po o faasalaga uma e lua.

E $5,000 le tupe ua faatulagaina e le faamasinoga e mafai ona tatala ai i tua ia Tofili.

E tusa ai ma faamatalaga a le faamasinoga i lenei mataupu, o le aso 18 o Aokuso, 2020, na faafesootai atu ai e le faleoloa a le Chin & Corporation, ia le Ofisa a Leoleo i Tafuna e tusa ai ma le nofo aitalafu o le ua molia, i le latou faleoloa, talu mai le masina o Aperila 2019.

I se faatalatalanoaga a le Ofisa a Leoleo ma le Supavaisa a le Chin & Corporation, na ta'ua e le Supavaisa le faailoa atu e le latou faatauoloa ia le o'o atu o Tofili i le latou faleoloa ma se siaki (cashier's check) e $400 e totogi ai  ni meafale e $2,400, lea na totoe ai se paleni e $2,000.  Sa le gata i lea, ae na totogi fo'i e Tofili se tinoitupe e $200, mo ni isi meafale e $1,229 lona tau, ae toe ai o le $1,029 e le'i totogia.

O le paleni po o le aofaiga tupe atoa sa nofo aitalafu ai Tofili i le Chin & Corporation, e $3,029.00.

Na  kilivaina nei meafale i le maota o Tofili i Tafeta, ina ua mae'a ona faia se feagaiga i le va o Tofili ma le Chin & Corporation, o le a totogia e Tofili le paleni o lana faatauga, ae e le'i o'o i le faai'uga o Tesema 2019.  Sa faailoa atu e Tofili i le pule o le faleoloa, o le a lafoina atu e ona atali'i e to'alua o lo'o aumau i Amerika, ia le tupe e totogi faauma ai lana faatau.  Ae peitai, na siliga ma le aso faatulagaina, e le'i toe fo'i atu Tofili e totogi lana aitalafu.

Na ta'ua e le faatauoloa a le Chin & Corporation le siliga ma a latou taumafaiga e faafeso'ota'i Tofili i luga o le telefoni ina ia o'o atu e totogi lana aitalafu ae peitai, sa le'i faamanuiaina taumafaiga a le faleoloa.

O le aso 10 o Aperila, 2020 na o'o atu ai Tofili i le faleoloa e talosagaina le tuuina mai o se taimi mo ia, e mafai ai ona totogi atu lana aitalafu.  Sa taliaina e le Chin & Corporation lana talosaga ma sainia ai e Tofili se tusi tautoga e mafai ai ona ia totogia le $3,029 o lo'o ia nofo aitalafu ai, ae e le'i aulia le aso 10 o Aokuso, 2020.

Ae peita'i, na ta'ua e le kamupani a le Chin & Corporation, le le'i tausia foi e Tofili o lea tautoga ma o lea na liliu ai loa le Chin & Corporation i le Ofisa o Leoleo mo se fesoasoani ina ia toe maua mai le tinoitupe e $3,139 (lea ua faaopoopo le $110 o le late fee).  Sa faailoa atu foi e le kamupani a le Chin & Corporation i leoleo se fuafuaga a Tofili e tu'ua le teritori pe a tatalaina auala o femalagaiga.

I le masina ua tuana'i, na o'o atu ai vaega su'esu'e a leoleo i le maota o Tofili ma talosagaina lona o''o mai i le Ofisa o Leoleo, mo le talanoaina o lenei mataupu, o lana aitalafu i le Chin & Corporation.

Sa faamatalaina e Tofili i leoleo, o le pisinisi lenei, o se pisinisi a lana uo, ae o le mafuaaga ua ia le totogia ai le paleni o le tupe, ona o meafale sa ia maua, o ni meafale ua mae'a ona fa'aaoga, e el o ni meafale lelei pe fou.

Sa ta'ua e Tofili, e tolu masina talu ona ia faatauina nei meafale, sa ia iloa ai e le o ni meafale fou ma i sona talitonuga, ua lava le tupe sa ia totogia mo nei meafale tuai.

O lo'o ua iai nei i luma o le Faamasinoga Maualuga ia lenei mataupu,  ma o le masina fou ua faatulagaina e amataina ai iloiloga.