Ads by Google Ads by Google

Tete’e le to’atele o Faipule I le faaopoopoina o aso e fono ai le Fono Faitulafono


[ata: SN]
ausage@samoanews.com

Finagalo le Senate ia suia aso o le Fono Faitulafono mai I le 90 aso, i le tausaga atoa: 

O le vaiaso na te’a nei na faia ai se iloiloga a le Komiti o Tulafono Tauoloa a le Maota o Sui, I lalo o le taitaiga a le Sui Fofoga Fetalai ia Fetu Fetui Jr, e talanoaina ai  se Iugafono Malilie Faatasi a le Senate, e sui ai le Faavae, e ala I le faaopoopoina o aso e fono ai le Fono Faitulafono, I le tausaga.

Sa toatele ni Faipule na auai I lenei iloiloga ma na o latou fa’aalia ai lo latou tete’e I lenei Iugafono Malilie Faatasi a le Senate.

O le suiga ua fuafua i ai le Senate, o le fono lea o le Fono Faitulafono i le tausaga atoa.  O le Faavae o lo o i ai nei, e 2 tauaofiaga a le Fono Faitulafono i le tausaga, ae ta’i 45 aso i le tauaofiaga, tusa lea e 90 aso e fono ai le Fono Faitulafono i totonu  o le tausaga tasi. 

Na faafetaia e le afioga i le alii Faipule ia Vaetasi Tuumolimoli Saena Moliga afioga i Senatoa i le tofa saili atoa ai ma le magafagafa i auala e faaleleia atili ai le auaunaga ma le tautua a le Fono Faitulafono mo le atunu’u. 

Ae i lana lava silasila i le tulaga o loo i ai le Faavae i le taimi nei ma aso fono ua faatulaga mo le Fono Faitulafono, o lo o lelei ma matagofie tulaga uma o lo o i ai. E le faapea a uma loa aso fono e 90 i le tausaga ona malolo loa lea o le Senatoa ma le Faipule ua le toe galue.

“E leai, e fai lava galuega a le Senatoa ma Faipule i le tausaga atoa e le malolo, ae o aso e 90 ua faataoto mai e le Faavae, o aso ia e fono ai Senatoa ma Faipule mo le fauina o tulafono aemaise ai o le talanoaina o isi mataupu taua mo le manuia o le malo ma le atunu’u,” o le saunoaga lea a Vaetasi.

Sa ia taua atili fo’i e faapea, o le tele lava o aso fono a le Fono Faitulafono i le taimi nei, e tele lava ina leai ni galuega e faatinoina i aso fono, ae tau lava o le faataunu’u o le aso fono e pei ona fai mai ai le Faavae. Lona uiga la, o lo o lelei ma talafeagai le tulaga o loo taoto ai le Faavae i le taimi nei.

Na lagolagoina e le afioga i le ail’i Faipule ia Vesi’ai Poyer Samuelu le finagalo o Vaetasi. Sa ia taua e faapea, o le faigamalo a Amerika Samoa, e tau mulimuli lava i le auala o loo faataoto mai ai le faigamalo a le malo tele o Amerika ma lana Fono Faitulafono, le Konekeresi.

O le auala o loo faafoe ai galuega faatino a le Konekeresi, e faatino i le auala Faa Temokarasi, e faapena fo’i le auala o loo faafoe ai le faigamalo a Amerika Samoa, e tatau ona laa ese ma lona faasinomaga o lo i ai i le taimi nei.

“O le Konekeresi a Amerika, ta te le o faalogo atu lava o taumafai e faaopoopo ni a latou aso fono, ae o le matua tele lava o galuega a le Konekeresi e moomia le faataunuuina, ae o tatou la i Amerika Samoa nei, o loo lelei ma matagofie aso fono o loo i ai, e le o tele fo’i ni a tatou galuega e fia faatinoina, lona uiga la, o loo lelei pea lava ma atoatoa tulaga o loo taoto ai le Faavae i le taimi nei i aso fono a le Fono Faitulafono,” o le saunoaga lea a Vesi’ai.

Afai e mae’a aso fono ae o loo i ai isi galuega e moomia le faataunuuina, o lo o i ai le malosi i le afioga i le Kovana sili i lalo o le Tulafono, na te valaauina ai se Fono Faapitoa mo le Senatoa ma Faipule, e faamae’a ai galuega o lo o totoe.

“O lo o i ai lava le avanoa e faatino ai galuega i soo se taimi e manatu i ai le afioga i le ali’i Kovana ma afai fo’i e mae’a lava le tausaga atoa o valaau lava e le afioga i le ali’i Kovana ana Fonotaga faapitoa, o lona lena malosi i lalo o le Tulafono, ae le tatau ai fua ona manatu le Fono e sui le Faavae ma toe faaopoopo nisi aso fono i le tausaga,” o le saunoaga lea a Vesi’ai.

Sa ia taua atili e faapea, o le mafua’aga fo’i na ala ai ona a’e se tofa i Taitai o le Fono Faitulafono e sii totogi o Senatoa ma Faipule, e le faapea ina ia taumafai ai e faaopoopo ma ni aso fono ina ia faapaleni ai, ae ona o le manatu ua alaga tatau ma talafeagai ona sii totogi o le Fono Faitulafono a le atunu’u. 

E i ai le manatu o nisi e faapea, ua mafua ona naunau le Fono e faaopoopo aso fono i le tausaga, ina ia faapaleni ai ma siitaga o totogi o Senatoa ma Faipule. Afai e silasila i Palemene o atunuu o le Pasefika e aofia ai ma Hawaii, o Amerika Samoa lava le Palemene pito sili ona laiti totogi o Senatoa ma Faipule.

E o o lava fo’i i le afioga a Vesi’ai e pei ona ia taua, e uma le tausaga ae le i taitai mae’a ana galuega faatino i totonu o lona nu’u ma le itumalo.

Na lagolagoina e le afioga i le ali’i faipule ia Alumamalu Filoali’i Ale finagalo fa’aalia o faipule na muamua atu. Sa ia taua e faapea, a o le i avea o ia ma faipule, sa i ai lona taofi ailoga lava e pisi galuega a le Fono Faitulafono, peita’i ina ua filifilia o ia i le nofoa a lona itumalo, sa ia iloa ai le tele o le eseesega, e le gata i le tele o galuega faatino a le Faipule i totonu o le maota, ae faapena fo’i ma ona tiute tauave i totonu o le itumalo.

E i ai fo’i lona taofi, e moomia fo’i e le Faipule sina taimi e malolo mai ai i galuega ma tiute faalemalo, ae vaai sina taimi paganoa mo ia ma le aiga.

O le finagalo fo’i lea na fa’aalia e le afioga i le ali’i faipule ia Lavea Fatulegaee Palepoi Mauga. Sa ia saunoa e faapea, e le faigofie le galuega a le Faipule pe a oo ina filifilia o ia i le nofoa a lona itumalo. 

I le taofi o le afioga a Lavea, e le lava le 2 tausaga e faatino ai galuega a le Faipule mo le malo ma lona itumalo. E fai o ona tiute i totonu o le Maota o Sui ae faapena fo’i i ona tiute i tua i lona itumalo.

Na taua e le afioga a Lavea e faapea, o le taimi lava e mae’a ai le tiute o le Faipule i totonu o le Fono Faitulafono, e aga’i atu ai loa i tua i lona itumalo e faatino ona tiute mo tagata o lona itumalo. E le o se galuega e faigofie, e le o se faigaluega fo’i e puupuu se taimi e faatino ai.

I lona taofi, o loo lelei le tulaga o loo taoto ai le Faavae o Amerika Samoa, o lo o talafeagai foi le fuafuaina o taimi ma aso e fono ai Senatoa ma Faipule.

Na lagolagoina e le afioga i le ali’i Faipule ia Lua’itaua Gene Pan finagalo fa’aalia e nisi o ona uso a faipule. Sa ia taua e faapea, o le faipule, e le o se tagata e malolo, ae o se auauna e galue mo tagata o lona itumalo i le 24 itula o le aso, 7 aso o le vaiaso. 

O le faipule fo’i, o le tagata e ola pea lava lana telefoni mo soo se tasi e valaau atu mo se fesoasoani, tusa lava foi pe tatagi le telefoni a le faipule i le leva o le po, e ala lava i luga e tali, ona o lona naunau ia aua lava nei i ai se tasi o lona itumalo e misi lana fesoasoani.

E to’a 3 afioga i Faipule e le i tuuina mai ni o latou finagalo e tusa ai o lenei mataupu, ona o lo latou talitonuga, o i latou e fou i le maota, o lo o tau faalogologo fo’i i le tulaga tonu e tatau ona taoto i ai finagalo fa’aalia o sui mamalu. I lo latou taofi, atonu o le isi paeaiga o loo lumana’i nei pe afai ae toe filifilia i latou e o latou itumalo, ona agava’a loa lea ona fa’aleo ni o latou finagalo e tusa ai o lenei mataupu. 

Na toe faaopoopo mai le afioga i le alii faipule ia Vaetasi ma ia taua e faapea, o le fausiaina o tulafono, e le mafai ona fai to’atasi e le Senatoa ma le Faipule na o i latou, ae manaomia le ao ao mai o finagalo o le atunuu ma itumalo ina ia lelei ma malosi le fausiaina o le tulafono.

Lona uiga i lona finagalo, e tatau i le Senatoa ma Faipule ona alu atu i tua i lona itumalo e talanoa ma faasoa ai, o le mafua’aga lena e taua ai le galulue faatasi o sui o le fono ma itumalo, nai lo le fono ai lava o Senatoa ma Faipule i le tausaga atoa.

E na o le afioga lava i le Sui Fofoga Fetalai na ia lagolagoina le iugafono soofaatasi a le Senate e sui ai le Faavae. I lona taofi, na te lagolagoina le tatau lea ona fai sina suiga, ua fai fo’i si tuai o le auala o loo faafoe ai le Fono Faitulafono i le taimi nei, ae ua tatau ona fai se siuiga.

E le lagolagoina le sui o aso fono mai le 90 i le tausaga atoa, ae na te lagolagoina le faia o se suiga i le Faavae, ma faaopoopo ai ni nai aso fono pe ta’i 15 i le tauaofiaga e tasi. 

O le finagalo o Fetu, ia maua lava se avanoa e fai ai le malologa a le Fono mai ana galuega faatino, ina ia mafai ai e le Faipule ona fo’i atu i tua i lona itumalo ma faatino nisi galuega e manuia ai le itumalo.

Uta toe taoto le iloiloina o lenei mataupu seia i ai se aso ona toe lalafo lea i ai o le Komiti ma afioga i Faipule.