Pago Pago, AMERIKA SAMOA

Na matua tetele ma malolosi saunoaga a ni isi o afioga i Faipule faasaga i le Tamaitai Faatonusili o le Matagaluega o Tagata Faigaluega a le malo, i le toe fa’aauau ai o le iloiloga a le Komiti o le Faagaioiga a le Malo a le Maota o Sui ma le Tamaitai Faatonusili ia Lynn Pulou Alaimalo, lea na tolopo mai i le 2 vaiaso talu ai ona ua faaselemutu le iloiloga talu ai le Lapataiga mo le Galulolo na aafia ai le atunu’u.

E le gata na tu’uaia e nisi o Faipule le Tamaitai Faatonu, o lana fautuaga na ave i le Kovana lea ua mafua ai ona toe faafo’i i tua totogi o le to’atele o tagata faigaluega a le malo, ae na faailoa fo’i e le Sui Fofoga Fetalai i le Tamaitai Faatonu, e mafai ona pasia e le Maota o Sui se Iugafono e fa’atula’i ese ai o ia mai lona tofiga. Afai ae pasia lena I’ugafono, o le a faatula’i ese lava o ia.

O le iloiloga fo’i lea na iloa ai va’ava’a o ni isi o afioga i Faipule, ina ua la tula’i ma aga’i i fafo ma le maota fono a o faagasolo le iloiloga.

I le iloiloga muamua lea na faatanuuina i le 2 vaiaso talu ai, na ta’utino ai le Tamaitai Faatonusili iaua fesiligia oia e le Sui Fofoga Fetalai ia Fetu Fetui Jr, o lana fautuaga lea na mafua ai ona tuuina mai le poloaiga a le Kovana Sili ia Lemanu S. P. Mauga e faatulaga loa se iloiloga e toe faafo’i ai i tua faaiuga uma sa faia e le nofoaiga ua mavae atu i totogi o tagata faigaluega, fesuiaiga o tagata faigaluega mai le konekarate e avea ma tagata faigaluega tumau, faapea ai ma le toe fesuiaiga sa faia i totogi o nisi o tagata faigaluega.

Ae i le toe fa’aauau ai o le iloiloga i le vaiaso na te’a nei, na taua ai e le Tamaitai Faatonusili ina ua fesiligia o ia, o lona tiute o le faatinoina lea o le poloaiga na tuuina atu e le Kovana e toe faafo’i ai i tua siitaga uma lava o totogi o tagata faigaluega e le i sa’o ona fai.

Na tauaao atu fo’i e le Tamaitai Faatonusili ripoti i afioga i Faipule o loo taua ai le aofa’i o tagata ua mae’a ona faia i ai faaiuga e tusa ai o le poloaiga a le Kovana.

E to’a 772 le aofa’i o tagata faigaluega ua mae’a ona toe faafo’i i tua o latou totogi; to’a 380 le aofa’i o tagata faigaluega na maua ua soona sii o latou totogi mai le maualuga sa faatulaga i totou o le Paketi; 64 le aofa’i o tagata faigaluega na liliu mai i le konekarate e avea ma tagata faigaluega tumau; e to’a 61 le aofa’i o tagata faigaluega na liliu mai i le konekarate e avea ma tagata faigaluega tumau faatasi ai ma le faatumau o le totogi; to’a 23 i latou na suia mai le konekarate e avea ma tagata faigaluega tumau faatasi ai ma le totogi lava lea e tasi; e to’a 36 le aofa’i o i latou na siitia o latou totogi ma tulaga i se auala na soli ai le tulafono; e to’a 745 i latou na maua ua toe fetuuna’i o latou totogi,ma le to’a 23 o i latou na maua ua fesuita’i o latou tulaga e ui e le tusa ai ma ala o le tulafono.

Saunoa le afioga i le ali’i Faipule ia Vailiuama Steve Leasiolagi, afai e sa’o lana fa’afofoga, e na o le tasi lava le vaega na faamamafa e le Kovana i lana poloaiga, o le toe vaavaai lea o tagata sa galulue konekarate a o lea ua liliu e avea ma tagata faigaluega tumau a le malo. 

I lona talitonuga, e na o le pau lava fo’i lea o le mataupu na fesiligia ai e le Fono Faitulafono i le taimi o le iloiloga o le Paketi a le malo i le tausaga na te’a nei, le Faatonusili sa i ai muamua i le Matagalueag o Tagata faigaluega, o le mataupu i le faafuase’i ona suia o le tulaga sa galue ai le tagata faigaluega faa konekarate i le avea ma tagata faigaluega tumau a le malo. 

Na faatepa e Vailiuama le Faatonu ma ia faapea atu i ai, e tusa ai ma le Ripoti o Galuega Faatino a Matagaluega ma Ofisa a le malo mo Kuata Tupe ta’itasi, o loo manino mai ai i le Kuata Fa o le Tausaga Tupe ua mavae atu, e to’a 375 le aofa’i o tagata faigaluega o loo taua mai ai na suia mai le konekarate e avea ma tagata faigaluega tumau. E talitonu Vailiuama, e tatau lava fo’i ona pau lea o le numera e vaavaai i ai le Tamaitai Faatonu ma lona Ofisa, ae foliga mai ua ese le tualga ua oo i ai le galuega faatino.

O faaiuga nei na saini ai taitai o le malo i le nofoaiga ua mavae atu, lona uiga i le talitonuga o le Fono ma le malo, ua sa’o ma lelei atoatoa. 

“Ae aisea ua outou toe taofia ai mea lelei ma suiga tonu na faia e ta’ita’i o le faigamalo ua mavae atu,”o le fesili lea a Vailiuama i le Tamaitai Faatou.

Na faamanino e Pulou Alaimalo i afioga i Faipule e faapea, o suesuega a le latou Ofisa ua faamaonia ai, o suiga uma ua latou faia, o tagata faigaluega uma ia sa faia e le nofoaiga ua mavae atu suiga i se auala e soli ai le tulafono.

Na tumau le Tamaitai Faatonusili i lana tali, e tele ma anoanoa’i siitaga o totogi faapea ai suiga o tulaga tau tagata faigaluega na faia i auala e soli ai le tulafono. O le tiute a lona Ofisa, o le taumafai lea e faasa’o faaiuga e le’i sa’o ona fai ia ia mautinoa e mulimuli i le tulafono.

“Aisea ua faalautele ai fua la outou galuega i isi vaega e lei taua e  le Kovana i lana poloaiga,” o le fesili lea a Vailiuama.

“O le mea lea ua outou faia, ua oo le mea’ai i lo’u gutu (tulou) ao lea ua toe aveese. E le o se mea lelei le mea lea ua outou faia, e matua tiga lava,” o le isi lea saunoaga a Vailiuama.

Na sauna le Sui Fofoga Fetalai fai mai, ua ova le ola fia mama o le Tamaitai Faatonusili ma lona Ofisa, ae le vaai i mea faaletonu o loo latou faia. Na taua e Fetu e faapea, o lea ua taumafai le faigamalo e sailiili masei i tagata faigaluega, ao lea latou te soli le tulafono, e ala i le o atu o Faatonusili ma avatu a latou Sui Faatonu i totonu o Matagaluega, ae o lo o i ai lava fo’i Sui Faatonusili o Matagaluega taitasi nei a le malo ua leva ona i ai.

Na faamanino e le Tamaitai Faatonusili ia Pulou Alaimalo e faapea, o lana Sui Faatonusili lea na alu atu ma ia, na tofi e le Kovana. I lona fo’i talitonuga, o loo tusa ma le tulafono le faa faigaluegaina o lana Sui Faatonusili.

Na saunoa le tamaitai faipule ia Andra Samoa e faapea, o le gaioiga e pei ona aafia ai tagata faigaluega e toatele a le malo, e oo lava foi i tagata faigaluega o loo totogi i tupe feterale, ua atagia mai ai le aafia o aia tatau o tagata faigaluega.

Sa ia faailoa ia Pulou Alaimalo le to’atele o tagata faigaluega a lona itumalo ua aafia i le suiga ua faia. I lona talitouga, e mafai ona ia fesoasoani i tagata faigaluega mo le tuuina atu o a latou mataupu i le feterale, poo le faia fo’i lea o se tagi faasaga i le malo, ona o faaiuga ua aafia ai o latou aia tatau i lalo o le tulafono.

Na faamanino e Pulou Alaimalo e faapea, e fai lava si maualuluga o siitaga o totogi na aafia ai isi tagata faigaluega. O isi tagata faigaluega e na o le faatasi lava oa sii o latou totogi i le tausaga, ae o isi ua fa’alua i le faatolu ona faia siitaga i le tausaga e tasi, e aunoa ma le uia o ala o le tulafono.

Na fautua le Faipule mai Manu’a #1 ia Alumamalu Filoiali’i Ale i le Tamaitai Faatonusili, ina ia fai ma se alofa i le atunu’u ma ia fai le amiotonu.

Na lagolagoina e le afioga i le Faipule ia Avagafono Vaimaga Maiava le fautauga, ma ia talosagaina ai le Tamaitai Faatonu e fai le mea amiotonu ma faamuamua le alofa.

Na faauilavea le afioga i le ali’i Faipule ia Larry Sanitoa ma fautua i le Komiti ina ia faamama le sausau o lea ua aafia fua le Tamaitai Faatonu ona o le faaiuga na mana’o i ai le afioga i le ali’i Kovana.

Na faailoa Sanitoa e faapea, o le itu e ofo ai lona mafaufau, o Faatonusili ia na faatagaina suiga ma siitaga o totogi i le taimi o le nofoaiga a Lolo ma Lemanu, o i latou lava fo’i ia o lea ua aofia i totonu o le Komisi Faapitoa lea ua latou iloiloia ma teena siitaga ma suiga. E le malamalama pe faapefea ona toe fai mai e le sa’o a latou saini na ofo atu e saini ma faamaonia ai siitaga uma nei.

Na faaali e le afioga i le ali’i Faipule ia Logoituau Mark Atafua lona le fiafia tele i le Tamaitai Faatonusili, ona o suiga ua aafia ai le toatele o tagata o lona itumalo. Sa ia talosaga i le molimau mo sana saunoaga e faamalamalama ai le mafua’aga o lana faaiuga, ae ina ua faafofoga atu le ali’i Faipule e le tau lona finagalo i le saunoaga a le Tamaitai Faatonusili, o le taimi lea na tula’i ai loa ma aga’i i fafo ma le maota a o faagasolo pea lava le iloiloga.

E ui ua mae’a le iloiloga ma talanoaina o lenei mataupu, ae na matua maitauina le manu’a o le finagalo o le tamaitai faatonusili i le mamafa o saunoaga sa soona lalafo atu ia te ia e afioga i Faipule.