Pago Pago - AMERIKA SAMOA

“E le’i faigofie lo outou tauina o lenei taua.  Ae na mafai ona ou mautinoa sa outou tau se taua lelei, aua o lea ua i’u ia te outou le tauisinioga,” o upu nei sa tulei mai i le fofoga o le fa’aao o le malo o Amerika Samoa, le afioga i le kovana Lemanu P.S. Mauga, e momoli ai le fa’amalo ma le fa’afetai, i fanau a’oga e to’a sefulu ma le ono (16), sa faapea ona aloaia i le fa’auuga a le a’oga mauauga a Iakina, i le taeao o le aso Sa na se’i mavae atu nei.

“Fa’amalo le finau.  Fa’afetai la outou onosai, i taimi na fetaia’i ai ma puapuaga, lea ua avanoa lenei aso, lea foi ua fa’aali lenei aso, i la outou finauga ma le savaliga.”

O lenei fa’au’uga sa faataunuuina i le fale ta’alo a le DYWA i Tafuna.  Ma sa iai sina suiga i le fa’afeaoina mai o alo ma fanau fa’au’u i lea taeao.  Sa molimauina le auai ai o matua, i le fa’afeaoina mai o a latou alo ma fanau fa’au’u.

Sa faapea foi ona fautuaina e le afioga i le kovana ia le vasega fa’au’u ina ia manatua, “E lelei le mimita, ae mimita fuafua.  E lelei le fia show, ae ia fia show fuafua.”

“E tatau ona outou fa’afetai i o outou matua ma aiga, matua fa’aleagaga, laumua i Iakina, le susuga i le puleaoga ma le aiga o faiaoga, aua o i latou ia na aumaia outou i lenei aso,” o se vaega lea o le saunoaga a le afioga i le kovana.  “Le vasega fa’au’u, tautuana ma outou ia le faamoemoega na naunau iai outou matua.”

Sa ta’ua e le kovana lona maitauina o le toatele o matua, a’o latou fa’afeaoina mai alo ma fanau, sa maligi loimata.  Ma na saunoa le kovana, ua mafua lea tulaga, ona o le taeao lea, ua fa’amutaina ai le 18 po o le 17 tausaga, o lo latou tiute faalematua, o le tausiga o nei alo ma fanau.  Ma onisi o le vasega fa’au’u, sa ta’ua e le kovana lona va’aia le maligi o latou loimata, ona ua o latou iloa lea tulaga.

Saunoa foi le afioga i le kovana, a mafaufau i lu’itau ma taulaga na faia e matua ina ia mafai ona maua e alo ma fanau a’oga ia mea uma e mana’omia, e ui o lo’o galulue fita matua i le tausiga o aiga, o ai se o le a le maligi loimata i taimi faapenei.

Na ta’ua e Lemanu le tutu o le vasega fa’au’u i le amataga o le la’asaga fou o latou olaga.  Ma ua toe faamanatuina atu ia i latou i lea taimi, se upu moni, e faapea, e maua le malosi i taimi o faigata.  Na saunoa le afioga i le kovana, a fia manumalo se tasi, e ao ona saili muamua ia maua le malosi e mafai ai ona tali atu i le tiga.  Sa ia fautuaina le vasega fa’au’u, e tatau ona o latou malamalama ma lagona le taua o le tumau seia o’o i le iuga.

Sa ia ta’ua foi, o loimata maligi i lena taeao, o se faamanatu i le alofa ma le agalelei o le Atua, aua po o le a lava faigata ma puapuaga e feagai ma i tatou i lenei olaga, e na te le tu’ulafoa’iina i tatou, pe afai e tatou te Faatuatua ia te ia.  Saunoa le afioga Lemanu, o le taeao nei ua tali mai ai le Atua i talosaga a matua.

I le fa’amae’aina ai o le saunoaga a le afioga i le kovana, sa faapea ona fa’alauiloa mai ai e le taitaifono o le komiti faafoe a le a’oga a le Iakina Adventist Academy, le suuga ia Pastor Tui Tuliatu, mo le fa’amaoniga a le Faatonusili a le Ofisa o A’oga a le SDA, ia Talonga Pita.

Sa faapea loa ona faaleoina suafa o i la’ua ua mafai ona ausia le tulaga muamua ma le tulaga lona lua, i totonu o le vasega fa’au’u.

O le tamaitai ua na aveina le sili po o le mua i le vasega fa’au’u 2024, o le tamaitai o Moesha Siniua Metuli, o le ui’i o se fanau e toalima a le susuga ia Mauola Metuli ma le faletua ia Iupita Metuli.  O lenei tamaitai e auai o ia i le ekalesia Aso Fitu i Satala ma o ona matua faaleagaga o le susuga ia Pastor Pilato ma le faletua ia Pekina Talatau.

O lo’o tausinio lenei tamaitai ina ia avea ma fomai i le lumanai, ina ia mafai ona galue o ia i le tausiga o tama ma tina matutua, ina ia mafai ona ia tausia ona matua ma isi, aemaise ai nai ona tina matua o Mama Sia ma Mama Tupito.

O le tamaitai ua na ausia le tulaga lua i le vasega fa’au’u, o le tamaitai o Angelina Jelani Polu mai i le afioaga o Iliili ma e auai o ia i le ekalesia Katoliko i Fatuoaiga.  O ona matua faaleagaga o le susuga i le Tiakono Uiagalelei ma le faletua.

O lo’o iai se faamoemoega ia Angelina e fa’aauauina ana aoaoga i le ASCC ae e le’i faimalaga atu i aoga i atunu’u i fafo.

O ia o se alo tamaitai pito la’ititi a le susuga ia Junior Polu ma le faletua ia Agnes.

O le fa’ailoga a le Valedictorian sa faia e le aiga a Fetuiai Siologa ae o le fa’ailoga a le Salutatorian, sa foa’iina mai e le kamupani a le Ausaga & Associates, Inc.

O isi fa’ailoga fa’apitoa sa mauaina e Moesha, na aofia ai le fa’ailoga o le ‘Citizenship Award’ mai i le Asosi a Aiga ma Aoga, faapea le ‘Bible award’, mai i le aiga sa Tapuai, ma le ‘Leadership Award’ mai i le aiga sa Unutoa.

O le fa’ailoga mo togi pito maualuga i le suega a le SAT sa foa’iina mai lea e le aiga Ropeti, lea sa mauaina e le tamaitai o Angelina.

O le fa’ailoga mo le Alualu i Luma (Most Improved) lea sa foaiina e le afioga i le Faipule ia Sam Meleisea, sa mauaina lea e Fa’avae Pulelua.