E to’a 3 ni Leoleo o le Toese i Tafuna ua fa’amalolo le tumau i le taimi nei, i le mae’a ai lea o le vaega muamua o le su’esu’ega o lo o fa’agasolo i le fa’alavelave lea na fasi fa’amo’amo’a ai e ni isi pagota le ali’i pagota o Nick Mataia i le aso Toona’i, Oketopa 20, 2018.

Na fa’amaonia mai e se molimau fa’atuatuaina i le Samoa News e fa’apea, o Leoleo e to’a 3 ua fa’amalolo, o ni isi ia sa galulue i le Sifi o le Taeao o le aso Toona’i ina ua tula’i mai le fa’alavelave e pei ona manu’a tigaina ai Mataia.

E pei ona taua e le molimau, i su’esu’ega a Leoleo, na maua ai le i ai o se fesootaiga i le va o Leoleo e to’a 3 ua fa’amalolo ma ni isi o pagota e fa’atatau i le osofaia lea o Mataia.

E i ai mau faamaonia na mafai ona aveesea mai e Leoleo mai totonu o le toese, e aofia ai ma le telefoni sa maua i se tasi o ali’i pagota.

A o i ai pea i Leoleo le telefoni a le ali’i pagota, sa fa’afuase’i ona vili atu i ai se tasi o Leoleo o le to’a 3 ua fa’amalolo i le numera a le pagota, mo le talanoaina o le mataupu e fa’atatau i le fa’alavelave e pei ona tula’i mai. O iina na maua ai loa e Leoleo Suesue le a’afia ai o Leoleo e to’a 3 o le toese i lenei mataupu.

E talitonu le Samoa News, o se tasi o ali’i pagota sa fesoasoani i Leoleo i le fa’ailoaina o fa’amatalaga e uiga i lenei fa’alavelave, ua aveesea mai o ia mai le toese ae ua taofia nei i le Ofisa autu o Leoleo i Fagatogo mo le puipuia o lona saogalemu.

Na taua e le molimau e fa’apea, o lo o fa’agasolo pea lava i le taimi nei suesuega a Leoleo e uiga i le mataupu e pei ona tula’i mai, atoa ai ma isi lava mataupu e fesootai ma le Toese. O le taimi nei, e tele le avanoa e mafai ai ona faila ni moliaga fa’asaga i Leoleo e to’a 3 ua fa’amalolo.

TULAGA O NICK MATAIA I LE FALEMA’I

Ua maitauina se suiga laititi i le tulaga o manu’a o loo a’afia ai Mataia, talu mai le taimi na taofia ai o ia i le potu tiga o le ICU (Intensive Care Unit) i le Falema’i o le LBJ i Faga’alu, talu mai le fa’alavelave.

O Mataia, o se tasi lea e to’a 3 i ai ali’i o loo molia i le faia o uiga mataga i ni tama’ita’i talavou se to’alua e ta’i 14 tausaga le matutua.

Na asia e le Samoa News le Falema’i i le vaiaso na te’a nei, mo le fia maua lea o se tulaga ua i ai manu’a o Mataia. Ae na fa’amaonia mai e se tagata faigaluega o le ICU, o Mataia lea ua te’a i tua mai le ICU, ae ua i ai nei o ia i le potu o le ‘Surgical Ward’.

Na asia e le Samoa News le ‘Surgical Ward’, ma fa’amaonia mai ai e se tagata faigaluega le taofia lea o Mataia i le potu o le high care unit. E le gata i lea, sa faailoa mai fo’i e le tagata faigaluega i le Samoa News, e le mafai ona asia pe talanoa se isi ia Mataia. O lo o i ai se alii Leoleo o lo o tausi ma’i ia Mataia.

Na iloa atu e le Samoa News mai fafo o le potu le taofo mai o Mataia i luga o le moega, ae o loo saofa’i atu i ona tafatafa le ali’i Leoleo.

Na maua le avanoa o le Samoa News e talanoa ai ma le Leoleo i fafo o le potu o loo taofia ai Mataia, ma talosaga i ai mo se avanoa e mafai ai ona feiloa’i atu ia Mataia. Na teena e le Leoleo le Samoa News mai le talanoa atu ia Mataia. Sa ia fautuaina le Samoa News ina ia fesootai i le latou Ofisa autu pe afai o lo o i ai ni fa’amatalaga o loo fia maua.

Na fesili le Samoa News i le Leoleo poo ai e ana le fa’atonuga e fa’asa ai le aiga o Mataia ona talanoa atu ia te ia. Sa toe fesiligia fo’i le ali’i Leoleo, poo i ai ni mau fa’amaonia o loo taumafai le Ofisa o Leoleo e ufiufi ua mafua ai ona le faatagaina le aiga o Mataia ma soo se tasi e talanoa atu ia te ia.

Na vaaia le sui o foliga o le ali’i Leoleo, ona ia faapea mai ai lea, “E le o i ai ni mau faamaonia o taumafai le Ofisa e ufiufi. O le taumafaiga lava ina ia puipuia le aiga, ae o la’u fautuaga, e sili pe a talanoa i le Ofisa autu.”

Ae ina ua fesiligia le Leoleo poo a mai Mataia, sa ia taua e fa’apea, “Ua faasolosolo manuia lava o ia.”

Na taua e se tasi o le aiga o Mataia i le Samoa News e fa’apea, o lo o taumafai pea le aiga e fetu’una’i tulaga matuia e pei ona tula’i mai ia Mataia, aemaise ai le mumusu o le Ofisa o Leoleo e fa’ataga i latou e feiloa’i ma talanoa atu ia Mataia.

“O se tasi o itu o lo o matua faigata i le aiga ona talia, o le manu’a tigaina lea o Nick ao i ai o ia i lalo o le vaavaaiga a le malo. A o lea fo’i ua taumafai atu le aiga e fia maua se fesoasoani mo ia, a o lea fo’i ua fa’asa. Ua le iloa e le aiga poo i ai se mea o taumafai le malo e ufiufi ina ia ina ia le mafai e le aiga ona latou silafia,” o le fa’amatalaga lea a se tasi o le aiga.

SUESUEGA A LEOLEO

O lo o fa’aauau pea i le taimi nei le suesuega a Leoleo e uiga i lenei mataupu. O le Vaega o loo Suesueina Fualaau Fa’asaina a le Ofisa o Leoleo, o i latou ia o loo gafa ma le suesueina o lenei mataupu.

E to’atele pagota ua mae’a ona fesiligia e Leoleo talu ona amata mai la latou suesuega. Na taua e le molimau fa’atuatuaina i le Samoa News e fa’apea, o se tasi o fa’afitauli numera tasi o loo mafua ai ona tutupu fa’alavelave fa’apenei, o le fa’amatu’u atu lea e Leoleo o le toese o ki o sela e uu e pagota.

“E le fou le mataupu e fa’atatau i le ave e Leoleo o le toese o ki o sela e uu e pagota, ma afai e le taofia lea faiga, e i ai lo’u talitonuga o se isi fa’alavelave e ono tula’i mai i le lumana’i, e o no i’u ai ma le ola o se tagata talu ai le fa’amatala o Leoleo o le toese,” o le saunoaga lea a le molimau.