Pago Pago - AMERIKA SAMOA

O le faaiuga le aloaia o le faiga palota a le atunuu i le aso Lua, Novema aso 8, mo le sailia o sui faipule o itumalo taitasi mo le Fono Faitulafono mo le isi 2 tausaga, ua tula’i mai ai le filifilia o sui fou e to’a 5 e fai ma sui o latou itumalo. 

E to’a 15 faipule tuai ua toe filifilia e faaauau la latou tautua mo a latou itumalo mo le isi 2 tausaga. O loo aofia i faipule tuai e to’a 15 ua toe filifilia le afioga i le Fofoga Fetalai o le maota o sui, Savali Talavou Ale ma le Sui Fofoga Fetalai o le maota, Fetui Fetu Jr.

O sui faipule filifilia e to’a 5 e aofia ai Shaun Onosa’i Va’a mo le itumalo o Vaifanua, Malaeoletalu Melesio Gurr mo le itumalo o le Maoputasi #2, Tapai Alailepule Benjamin Vaivao mo le itumalo o le Maoputasi #4, Tautoloitua Sauasetoa Ho Ching mo le itumalo o Ituau ma Fiu J. Saelua mo le itumalo o Fofo i le afioaga i Leone.

O faipule tuai e lei manuia la latou taumafaiga mo le tofi o a latou itumalo mo le isi 2 tausaga e aofia ai Lavea Fatulegaee Palepoi Mauga, Vailiuama Steve Leasiolagi, Logoitu’au Mark Atafua, Andra Tereise Samoa, ma le afioga a Vaetasi Tuumolimoli Saena Moliga e lei toe tauva mo le tofi o lona itumalo.

E ui i le malosi o le toulu o timuga i le taeao ananafi ma faa faigata ai ona aga’i atu le au palota i nofoaga eseese mo le faatinoina o la latou palota, ae na faai’u ma le manuia le sailiga tofi a le atunu’u i le aso ananafi e aunoa ma se faalavelave na tula’i mai ai. 

FAAIUGA LE ALOAIA O LE PALOTA MO LE MAOTA O SUI:

1. Itumalo o Manu’a #1, ua toe filifilia mai ai le afioga a Fetui Fetu Jr ma Alumamalu Ale Filoiali’i mo nofoa e 2 a le itumalo mo le isi 2 tausaga. E 299 palota na maua e Alumamalu ae 230 palota na maua e Fetui. E lei manuia taumafaiga a isi sui tauva e to’alua sa latou tausinio, e aofia ai Elijah Leasau ma Paepaetele Mapu Jamaias.

2. Itumalo o Manu’a #2, lea e aofia ai Ofu, Olosega/Sili, ua toe filifilia ai le afioga i le alii faipule ia Tiaoalii Fauagiga T. Sai na te toe nofoia le nofoa o le itumalo mo le isi 2 tausaga i palota e 205 na ia maua.

3. Itumalo o Vaifanua, ua manumalo mai ai le sui tauva fou, susuga Shaun Onosa’i Vaa i le nofoa o le itumalo mo le isi 2 tausaga i palota na ia maua e 251. O le susuga Va’a na ia nofoia muamua fo’i le nofoa o le itumalo i tausaga ua mavae.

4. Itumalo o Saole, ua toe manumalo mai ai le o loo nofoia le nofoa o le itumalo i le taimi nei, le tofa a Titiali’i Kitara Vaiau, i palota e 173.

5. Itumalo o Sua #1, ua toe filifilia ai le afioga i le alii faipule ia Lua’itaua Gene Pan i le nofoa o le itumalo mo le isi 2 tausaga, ina ua leai se tasi na la tausinio mo le nofoa o le itumalo i le palota i lenei tausaga.

6. Itumalo o Sua #2, ua toe filifilia mai ai le afioga i le alii faipule ia Avagafono Tuavao Vaimaga Maiava mo le nofoa o le itumalo mo le isi 2 tausaga, ina ua leai se isi na la tauva mo le nofoa o le itumalo.

7. Itumalo o Maoputasi #1, e aofia ai le afioaga i Faga’alu, Fatu ma Futi, Gataivai ma Utulei, o loo tumau pea le afioga a Vailoata Eteuati Amituana’i i le nofoa o le itumalo, ina ua leai se tasi na la tausinio i le faiga palota i le aso ananafi. 

8. Itumalo o Maoputasi #2, e aofia ai le afioaga o Fagatogo, ua manumalo mai ai le sui fou mo le nofoa o le itumalo mo le isi 2 tausaga, le susuga a Malaeoletalu Melesio Gurr, ina ua le manuia le taumafaiga a le sa tauaveina le nofoa o le itumalo mo le tele o tausaga ua mavae atu, le afioga Vailiuama Steven Leasiolagi.

9. Itumalo o Maoputasi #3 e aofia ai le afioaga i Pago Pago, o loo tumau pea le afioga a Vesiai Poyer Samuelu i le nofoa o le itumalo, ina ua leai se tasi na la tausinio i le faiga palota i le aso ananafi. 

10. Itumalo o Maoputasi #4, ua manumalo mai ai le susuga a Tapai Alailepule Benjamin Vaiao na te tauaveina le nofoa o le itumalo mo le isi 2 tausaga. O le nofoa mo le itumalo o le Maoputasi #4 o loo nofoia e le afioga i le alii faipule ia Vaetasi Tuumolimoli Saena Moliga, lea e le i tauva i le faiga palota o lenei tausaga.

11. Itumalo o Maoputasi #5 i le afioaga i Aua, ua toe filifilia mai ai le afioga i le alii faipule ia Faimealelei Anthony Fu’e Allen na te tauaveina le nofoa o le itumalo mo le isi 2 tausaga, ina ua le manuia le taumafaiga a le sui e to’atasi sa la tauva mo le nofoa o le itumalo, susuga Muaiavaona Fofoga Pila. E 181 palota na maua e Faimealelei ae 107 palota a Muaiavaona na maua.

12. Itumalo o Ituau e aofia ai Nu’uuli, Matuu ma Faganeanea ma Fagasa, ua toe filifilia mai ai le afioga i le alii faipule ia Manumaua Wayne Wilson, atoa ai ma le sui fou e to’alua i ai nofoa o le itumalo, le susuga a Tautoloitua Sauasetoa Ho Ching. E lei manuuia le taumafaiga a le afioga i le alii faipule ia Logoitu’au Mark Atafua mo le nofoa o le itumalo mo le isi 2 tausaga.

13. Itumalo o Fofo i le afioaga i Leone, ua filifilia i ai le tofa Fiu J. Saelua na te tauaveina le nofoa o le itumalo mo le isi 2 tausaga, ina ua le manuia le taumafaiga a le tamaitai faipule o loo ia nofoia le nofoa o le itumalo i le taimi nei, afioga Andra Tereise Samoa.

14. Itumalo o Alataua, ua toe filifilia mai ai le afioga i le alii Fofoga Fetalai o le Maota o Sui, afioga Savali Talavou Ale i palota e 295. O le afioga i le Fofoga Fetalai, o le faipule lea e pito umi ma tele tausaga talu ona tautua i le maota o sui.

15. Itumalo o Tualauta, ua toe filifilia i ai alii faipule o loo laua nofoia nofoa o le itumalo i le taimi nei, afioga Larry Sanitoa ma Samuel Ioka Meleisea.

16. Itumalo o Tualatai, ua toe filifilia mai ai le afioga i le alii faipule ia Manavaalofa Tutuila Manase na te toe tauaveina le nofoa o le itumalo mo le isi 2 tausaga i palota e 230 na ia maua, ae 210 palota na maua e le sui sa laua tauva, susuga Moira Fatima Maiava.

17. Itumalo o Leasina, o loo tumau pea le afioga a Ape Mike Asifoa i le nofoa o le itumalo, ina ua leai se isi na la tauva i le faiga palota i le aso ananafi. 

I le mae’a ai ona faalauiloa o le faaiuga le aloaia o le faiga palota a le atunu’u i le po anapo, na tuu aloaia atu ai e le afioga i le tamaitai faipule ia Andra Tereise Samoa sana feau faamanuia i le tofa Fiu J. Saelua, o le sui fou lea ua filifilia mo le nofoa o le itumalo o Fofo i le afioaga i Leone mo le isi 2 tausaga. 

Saunoa Samoa e faapea, o faiga malo faa Temokarasi, e taoto atu ai le malosi i tagata palota latou te filifilia lo latou sui na te tauaveina le nofoa mo le isi 2 tausaga. Sa ia faafetaia lona nu’u i Leone i le lagolago ma le faatuatuaina o ia i nofoaiga ua mavae atu. 

SUI TAMAITAI SA TAUSINIO I LE PALOTA

I le tausinioga mo nofoa o itumalo e taitasi i le Maota o Sui, e to’a 39 i latou sa lesitala e tauva mo nofoa a o latou itumalo. O lea aofaiga o lo o aofia ai Tina e to’a 9 sa tausinio i le faiga palota i le aso ananafi. 

O nei Tina e aofia ai le afioga a Andra Tereise Samoa mo le itumalo o Fofo, Vaasa Ulugia Simanunu mo le itumalo o Saole, Alaese Tina Faisiotamo’i Vivavo Ioane mo le itumalo o le Maoputasi #4, Faafeo Lagafuaina mo le itumalo o Ituau, Fatumalala LEulua’i al-Shehri mo le itumalo o Alataua, Papalii Su’a Lucia Barley, Vui Florence Vaili Saulo ma Fiatagata Amani Johnson sa tausinio uma mo nofoa e 2 o le itumalo o Tualau-uta, ma Moira Fatima Maiava mo le itumalo o Tuala-tai.

O le itumalo o Tuala-uta le itumalo faa palota sa pito toatele ona sui sa tauva mo nofoa e 2 a le itumalo i le aso ananafi, e pei ona i ai i latou e to’a 6 sa tauva i lenei tausaga, sosoo ai ma le itumalo o Manu’a #1 e to’a 5 sui sa tausinio mo nofoa e 2 a le itumalo. 

TO’A 5 SUI FAIPULE E LEI FAIA NI A LATOU PALOTA

E to’a 5 sui faipule mo le Maota o Sui i le Fono Faitulafono e lei faia ni a latou palota, ina ua leai ni sui latou te lu’iina o latou nofoa mo le isi paeaiga e 2 tausaga o lo o lumana’i nei. 

Ina ua tapunia i le masina o Setema le aso e lesitala ai sui tauva mo le palota o lenei tausaga, e to’a 5 faipule na manino le leai o nisi na lesitalaina latou te lu’iina o latou nofoa. 

O i latou nei e aofia ai le afioga a Luaitaua Gene Pan mo le itumalo o Sua #2; Avagafono Tuavao Vaimaga Maiaga mo le itumalo o Sua #2; Vailoata Eteuati Amituana’i mo le itumalo o le Maoputasi #1; Vesiai Poyer Samuelu mo le itumalo o le Maoputasi #2, ma Ape Mike Asifoa mo le itumalo o Leasina.

E toatasi le faipule o loo ia nofoia le nofoa a lona itumalo i le nofoaiga lona 37 lenei a le Fono Faitulafono, ua filifili e le toe tauva i le palota o lenei tausaga, o le afioga lea ia Vaetasi Tuumolimoli Saena Moliga.

NOFOA MO LE KONEKERESI

Ua toe filifilia nei le Tofa a Uifaatali Amata na te tauaveina le nofoa o le atunu’u i le Fono a le malo tele i le Konekeresi mo le isi 2 tausaga, ina ua leai se isi la te tauva i le faiga palota o lenei tausaga. 

E tapuni ane le aso e faamuta ai le lesitalaina o sui e tauva mo le nofoa mo le Konekeresi, e leai se isi na faaulu sona suafa na te lu’iina le nofoa o le Konekeresi i le palota ananafi.

E ui i lea tulaga, ae sa moomia pea le au palota ina ia faia le latou palota mo le filifilia o le sui o le atunuu mo le nofoa i ke Konekeresi, ina ia tusa ai ma le tulafono o faiga palota. 

FAIPULE MO LE MOTU O SWAINS

Mo le nofoa o le itumalo o Swains, ua toe filifilia ai nei mo le isi 2 tausaga le afioga i le alii faipule ia Sua Alexander Eli Jennings i se fonotaga faapitoa sa valaauina e le Komesina o Palota.

I le taimi o le fonotaga e sailia ai se sui mo Swains, na toe filifilia ai Sua na te tauaveina le nofoa, ina ua leai se isi na la tauva mo le nofoa.