Ads by Google Ads by Google

To’a 6 ua molia ina ua maua fualaau faasaina i le osofaiga a Leoleo i Futiga


[ata: foa'i]
ausage@samoanews.com

Pago Pago, AMERIKA SAMOA

 

E to’a 6 ni ali’i e aofia ai ma se ali’i talavou e 17 tausaga le matua na pu’e faapagota e Leoleo ma ua molia i le Tulafono, ina ua osofa’i e Leoleo ni nofoaga eseese i le itu i Sisifo o le atunu’u i le vaiaso na te’a nei e aofia ai ma le Fale Tuufua a le aiga o Aetui i Futiga, latalata i le nofoaga e i ai le Lapisi ma maua ai fualaau faasaina. 

 

O le 2 ai lea o osofaiga a Leoleo Suesue mai le Vaega e Suesueina Fualaau Faasaina, faapea ai a le Vaega o Leoleo Suesues Faapitoa mai le Matagaluega o le Puipuiga o le Saogalemu Lautele ua aga’i i le nofoaga o le Lapisi i Futiga, se tasi o nofoaga fou lea ua masalomia le avea ma ogatotonu o fefaatauaiga o fualaau faasaina i le atunu’u.

 

Na taua e le ali’i talavou e 17 tausaga le matua o loo aafia ai i lenei mataupu i Leoleo ina ua fesiligia o ia, na faafefe ma faamalosia o ia e ni ali’i se to’alua na te faatau ma tulei atu fualaau faasaina i tagata lautele.

 

O le to’a 5 o i latou matutua ua molia i lenei mataupu na tutula’i uma i luma o le Fa’amasinoga Faaitumalo i le vaiaso na te’a nei mo a latou ulua’i iloiloga. O le ali’i talavou e 17 tausaga le matua o loo faagasolo pea lana mataupu i luma o le Fa’amasinoga o Aiga, Fualaau Faasaina ma le Avamalosi (FDA).

 

O i latou matutua e to’a 5 ua molia i lenei mataupu e aofia ai le susuga a Ioane Sakopo, Pulefano Fisher, Manaia Su’a, Sisigafu’a Tuiuli ma Popaia Collins.

 

O Su’a, Tuiuli ma Collins o loo molia i moliaga taitasi o le umia faasolitulafono o vaega o le fualaau faasaina o le aisa, o se solitulafono mamafa e mafai ona faasala ai se tasi i le Toese maile 5 e oo atui le 20 tausaga, pe faasala foi i le salatupe e oo atui le $20,000 le maualuga.

 

E ta’i $5,000 ua faatulaga e tatala ai le tagata e to’atasi o i latou nei i tua mai le Toese i Tafuna. 

 

O le susuga a Fisher o loo molia i le moliaga e tasi o le tufatufa faasolitulafono o vaega o le pauta faasaina o le aisa, faapea ai ma le moliaga o le umia faasolitulafono o vaega o le aisa, o ni solitulafono mamafa e mafai ona faasala ai se tasi mai i le Toese e oo atu i le 20 tausaga, poo le faasala foi i le salatupe e oo atu i le $20,000; faapea ai ma moliaga mama e 2 o le faia o gaioiga e lamatia ai le saogalemu o fanau laiti.

 

O le susuga a Sakopo o loo tu’uaia i le moliaga e tasi o le tufatufa faasolitulafono o vaega o le pauta faasaina o le aisa, faapea ai ma le moliaga o le umia faasolitulafono o vaega o le aisa, o ni solitulafono mamafa e mafai ona faasala ai se tasi mai i le Toese e oo atu i le 20 tausaga, poo le faasala foi i le salatupe e oo atu i le $20,000; faapea ai ma le moliaga mama e tasi o lona faia o ni gaioiga e ono lamatia ai le ola saogalemu o fanau laiti.

 

E ta’i $20,000 a le tagata e to’atasi lea ua faatulaga e le Fa’amasinoga e totogi ona faatoa mafai lea ona tatala Fisher ma Sakopo i tua mai le Toese i Tafuna.

 

O le vaiaso nei lea ua faatulaga e faia ai ulua’i iloiloga o nei mataupu i luma o le Fa’amasinoga Faaitumalo.

 

O isi ali’i e to’alua na taofia faatasi ma i latou  nei e to’a 6 ua molia mai le taimi o le osofaiga a Leoleo, ua toe tatala i tua ina ua mae’a ona fesiligia ma suesueina e Leoleo e tusa ai o lenei mataupu. 

 

TAGI A LE MALO 

 

E pei ona taua e le malo i le latou tagi e faapea, o le taeao o le aso 1 o Iulai, 2021 na faataunu’u ai le isi osofaiga a Leoleo Suesue faasaga i gaioiga e faatau faasolitulafono ai fualaau faasaina o le aiga i nofoaga e aofia ai le Lapisi i Futiga.

 

O le osofaiga muamua a Leoleo Suesue mai le masina o Iuni na te’a nei, lea fo’i na pu’e faapagota ai tagata e to’a 4 ma ua molia i le tulafono, na alia’e mai ai igoa o ni ali’i se to’alua na taua o loo aafia i laua i le tulei ma le faatauina atu o fualaau faasaina o le aisa.

 

O i laua nei e aofia ai Ioane Sakopo ma Pulefano Fisher, lea ua molia nei e le malo. 

 

Pe tusa o le itula e 6:40 i le taeaoo le aso 1 o Iulai e pei ona taua, ae alu loa le osofaiga a Leoleo i le fale o le susuga a Sakopo, ina ua logo e se molimau faalilolilo a Leoleo, o loo i ai le susuga a Sakopo i lona fale ma o loo fealualua’i i autafa o lona fale i le taimi lea.

 

Na faafuase’i ona taunu’u Leoleo ma latou vaaia ai Sakopo ma se tasi o ali’i o loo faasavili i le isi itu o le fale. Na taofia uma i lau nei i lalo o le vaavaaiga a Leoleo ina ua mae’a ona faailoa e Leoleo ia Sakopo le mafua’aga o le sailia o ia, ona o tu’uaiga i lona aafia lea i le faatau faasolitulafono o fualaau faasaina o le aisa i tagata. 

 

Na tuu e Sakopo le faatanaga i Leoleo e saili ai lona fale mo ni mau faamaonia e lagolago ai le latou tu’uaiga faasaga ia te ia. A o le i feiloa’i Leoleo Suesue ma Sakopo, na iloa mamao e Leoleo le taimi na tia’i ai e Sakopo se paipa tioata sa uu i lona lima ina ua ia vaaia Leoleo ua aga’i atu i lona Fale. Na lagona e Leoleo le taimi na pau ai le paipa tioata i luga o maa ma ta’e ai.

 

Na mafai ona toe faamaopoopo e Leoleo vaega o le paipa tioata na tia’i ese e Sakopo ma maua ai vaega o le pauta paepae o le aisa o loo to’a solo ai i totonu. Na faaauau le sailiga o totonu o le fale ma maua ai e Leoleo le ato faafafa i tafatafa o le nofoa o lo o nofo ai Sakopo. O totonu o le ato faafafa na maua ai e Leoleo fualaau faasaina.

 

Na taofia e Leoleo le susuga a Sakopo faatasi ai ma le ali’i na maua faatasi i laua i lona fale, ona auina lea o le ali’i lea na maua i le fale o Sakopo ma taofia i le Ofisa o Leoleo i Leone e  faatali ai suesuega mulimuli, ae aga’i atu Leoleo Suesue ma Sakopo i le nofoaga o le Lapisi i Futiga mo le faataunuuina o le poloaiga a le Fa’amasinoga, mo le sailia o le Fale Tuufua a le aiga o Aetui o loo masalomia le avea ma nofoaga e faatau faasolitulafono ai fualaau faasaina.

 

Na taunu’u Leoleo i le Fale Tuufua o Aetui i Futiga ma vaaia ai se ali’i talavou e 17 tausaga le matua o loo fealua’i i luma o le Fale. Na taumafai le alii lea e sola ese ina ua ia vaaia Leoleo, peita’i na vave gaioiga a Leoleo ma pu’e faapagota ai loa le ali’i talavou lea. Na maua i totonu o le taga o lona ofu sa faia straws e 6 o loo i ai fualaau faasaina ma le tino i tupe e $26.

 

Na faaauau le osofaiga ma le sailiga a Leoleo ma maua ai isi alii e to’alua. O le isi sa i totonu o le Fale Tuufua o Aetui ae o le isi alii sa nofonofo i totonu o se ta’avale sa paka i le pito i tua o le Fale. O le alii na maua i totonu o le Fale o Manaia Su’a, ae o le alii na maua i totonu o le ta’avale o Popaia Collins, lea ua molia uma i laua i lenei mataupu. 

 

Na maua e Leoleo le paipa tioata ia Collins o loo i ai vaega o le pauta o le aisa, ae ina ua fesiligia e Leoleo le susuga a Collins, na ia taua, o le paipa tioata o loo i ai aisa na avatu ia Su’a.

 

E to’a 2 isi ali’i na pu’e faapagota e Leoleo i totonu o le Fale Tuufua o Aetui peita’i na toe tatala i laua i tua ina ua mae’a ona fesiligia ma suesueina. E leai ni fualaau faasaina na maua i ali’i ia e to’alua.

 

A o faagasolo le sailiga a Leoleo, ae faafesootai atu loa e le molimau faalilolilo a Leoleo le alii Leoleo Kapeteni e faailoa atu ai, o le susuga a Pulefano Fisher lea o loo latou sailia, o loo i ai o ia i le fale o se tasi o tamaitai pe tusa ma le 100 iata le mamao ese mai i le nofoaga o loo faatino ai le latou osofaiga.

 

Na faanatinati atu Leoleo i le fale e pei ona taua ma pu’e faapagota mai ai le susuga a Fisher e tusa ai ma se poloaiga a le Fa’amasinoga. E leai ni fualaau faasaina na maua ia Fisher.

 

Ina ua fesiligia e Leoleo le alii talavou e 17 tausaga le matua, na ia taua ai, o aisa na maua ia te ia, o aisa na avatu ia Fisher. Sa ia taua e faapea, o aso uma lava na te faatauina ai aisa i le nofoaga o le Lapisi, ma ua to’atele tagata ua iloa ma masani i lana galuega. Sa ia taua e faapea, e alu Sakopo momoli ana aisa ia Fisher, ona alu atu lea o Fisher pe tusa o le itula e 6 i taeao o aso taitai ma avatu aisa ia te ia pe tusa o le $300 le tau, ona ia tulei lea ma faatau atu i tagata. E ova ma le $2,000 le tupe e maua mai ai pe a ia faatauina atu aisa i tagata. Sa ia taua atili foi i Leoleo, e faafefe ma faamalosi e Fisher o ia e faatau fualaau faasaina i tagata.

 

Na taua e Collins ina ua fesiligia o ia e Leoleo e faapea, i le taeao o le aso e pei ona taua ina ua fo’i mai i le momoliina o lona to’alua i le galuega, na alu atu ai Su’a ma fai atu ia te ia, la te tietie i le nofoaga o le Lapisi se’i siaki ana uta palapala na totogi ia Earnest Aetui. Na la taunuu i le nofoaga ona alu lea o Su’a ma faatau mai fualaau faasaina mai le alii e 17 tausaga le matua, ona tago lea o Su’a ua tuu atu ia te ia le straw o loo i ai vaega o le aisa, faapea ai ma le paipa tioata ma faatonu o ia e utu le aisa i totonu o le paipa.

 

O fualaau faasaina la ia na nofonofo ma ia i totonu o le ta’avale i le taimi na taunuu atu ai le osofaiga a Leoleo.

 

O isi alii e to’atolu ua molia e aofia ai Sakopo, Fisher ma Tuiuli e lei manana’o i latou e faia ni a latou faamatalaga i Leoleo.