E to’afa i latou na pu’e faapagota e Leoleo i le faaiuga o le vaiaso na te’a nei, i lalo o tu’uaiga sa latou auai ma ni isi i le ave faagaoi lea o uaea eletise a le Pulega o Eletise ma le Suavai a Amerika Samoa (ASPA) ae fa’atau atu ma le faamoemoe e maua mai ai tupe e fa’atau ai a latou fualaau fa’asaina.

O i latou ua pu’e faapagota e Leoleo, atoa ai ma isi e to’atolu o lo o tau sailia peai le taimi nei, na mafai ona maua ina au tu’u fa’atasia e le Sui Komesina o Leoleo ia Falanaipupu Taase Sagapolutele se Vaega o Leoleo Faapitoa latou te suesueina le mataupu e fa’atatau i osofaiga sa faia faasaga i fale o aiga i le afioaga o Leone, atoa ai ma le mataupu i le tatipi o uaea eletise ola a le ASPA mai luga o pou uila ae ave ma faatau atu i isi tagata.

O i latou e to’afa ua pu’e faapagota ma molia e aofia ai Lologa Tuilagi Toilolo; Fetaia’i Tuigamala; Theresa Samata Ala ma Tevita Ati. Ua molia e le malo i latou taitasi i le moliaga mamafa o le gaoi, o le vaega C lea o solitulafono mamafa, lea e mafai ona faasala ai se tasi i le Toese mo le umi e le silia i le 5 tausaga, pe fa’asala fo’i i le salatupe e le silia i le $5,000, poo le fa’asala fo’i i faasalaga uma ia e lua.

O le vaiaso fou lea ua fa’atulaga e faia ai le ulua’i iloiloga o lenei mataupu, ma e $5,000 lea ua fa’atulaga e tatala ai i latou taitasi uma nei i tua.

TAGI A LE MALO

O le mataupu e pei ona molia ai i latou nei e to’afa, na alia’e mai ina ua pu’e faapagota e Leoleo e igoa ia Faafetai Jason Uili i le aso 14 o Fepuari 2020, ona o tu’uaiga i lona auai lea i se vaega sa osofaia ma gaoia fale o aiga i Leone. A o suesueina le mataupu faasaga ia Uili, na iloa ai fo’i e Leoleo, sa aofia Uili i le mataupu e fa’atatau i le ave faagaoi o uaea eletise a le ASPA, le ituaiga o le “copper” faatasi ai ma nisi o ana uo.

Na malie Uili e talanoa i Leoleo e tusa ai o le mataupu i osofaiga sa faia i uaea eletise a le ASPA na latou ave faagaoia ma nisi o ana uo, atoa ai ma lona faailoa i Leoleo igoa o i latou uma sa latou auai i osofaiga eseese na ave faagaoi ai uaea eletise a le ASPA.

O le tagata muamua lava na fesiligia e Leoleo o le susuga a Toilolo, lea na faamatalaga ai loa e Toilolo i Leoleo osofaiga uma lava na latou faia ma nisi o ana uo i afioaga e aofia ai Aoloau, Aasu, Mapusaga Fou ma Pavaiai, e ala i le ta tipi o uaea eletise ola a le ASPA mai luga o pou eletise ae ave faagaoi ma faatau atu i le kamupani o le One Recycle Scrap Metal.

Na taua e Toilolo i Leoleo e fa’apea, o lenei osofaiga na amata mai i le masina o Oketopa o le tausaga na te’a nei ina ua talanoa atu lana uo e igoa ia (F.L) ia te ia, i se auala e maua ai tupe e faatau ai a laua fualaau faasaina, e ala i le la taamilo i nuu eseese ma ta tipi ese mai uaea eletise a le ASPA mai luga o pou uila, ona ave lea e fa’atau ae maua mai ai tupe e faatau ai a laua fualaau faasaina.

O le alii o F.L e pei ona taua e Toilolo, o le isi lea alii e to’atolu i ai i latou o lo o tau sailia pea e Leoleo i le taimi nei, e le o mafai fo’i e le malo ona faila moliaga faasaga ia F.L ma isi e to’alua i le taimi nei.

O le vaiaso mulimuli lava o Oketopa o le tausaga na te’a nei na alu ai loa le ulua’i osofaiga a Toilolo, o F.L ma le alii o Setu Ati, ae faaaoga ai le ta’avale a Toilolo e fa’atino ai le osofaiga. Sa faatonu fo’i e Toilolo ia Ati e alu atu ma se agaese e fa’aaoga i le osofaiga.

Na latou afea se fale tuufua i Aasu ma afe ai loa le latou ta’avale ma faatino ai loa le osofaiga e ala i le latou tipia ese mai o se uaea eletise (copper) e tusa ma le 20 futu lona umi ae faatau atu i le One Recycle Scrap Metal i Ilili i le $35 ae faatau mai ai a latou aisa e ula ma latou.

O le aso na sosoo ai, na toe aga’i atu alii Toilolo, o F.L ma Ati i le fale lava lea i Aasu ma le faamoemoe e toe tipi mai ai se isi uaea ma latou, ae faafuase’i loa ona valaau ane se tagata o le aiga ma faatonu i latou e o ese ma le fanua.

O le aso 28 o Ianauri 2020 na toe feiloa’i ai alii nei e to’atolu ma taupulepule le isi osofaiga. Sa faaopoopo mai ai ma le latou uo fou, le susuga a Faafetai Tuigamala, ma latou aga’i atu ai loa i le nu’u o Mapusaga Fou ma faatino ai le isi osofaiga.

Na taua e Toiliolo i Leoleo e fa’apea, ina ua latou aga’i atu i Mapusaga Fou, sa latou vaaia ai uaea eletise e latalata mai i lalo i le auala, ona faia ai loa lea o le tonu o le a o F.L ma Ati e tipi mai uaea ia ae faatali atu le isi vaega i totonu o le ta’avale.

Na fa’aaoga e F.L le mea faigaluega oti uaea ma oti ai le uaea ola sa fesootai ai le isi pou uila ma le isi pou uila. O le taimi na tipi ai e F.L le uaea, na faalogoina ai e i latou se leo e faailoa atu ai, o le uaea sa tipiina e F.L o le uaea eletise ola. E 35 futu le umi o le uaea na maua i le osofaiga lea, ma aga’i atu ai loa alii nei ma faatau atu i le kamupani i Iliili ae maua mai ai le latou $66 ma faatau ai loa a latou aisa.

O le aso na sosoo ai, Ianuari 29 na faasolo atu ai le osofaiga a alii nei i Pavaiai, ma latou aga’i atu ai i se fale tuufua i se tasi o pito nuu ma tipi mai ai le uaea eletise e  30 futu le umi. O le isi fale na latou aga’i atu ai ma tipi mai ai le uaea eletise e 35 futu le umi ae faatau atu mo le $55 ma aumai le tupe ua fa’atau ai a latou aisa.

Na mae’a Pavaiai ona faasolo mai ai lea o le osofaiga a alii nei i Vaitogi, ma latou feiloa’i ai ma se latou uo tamaitai e igoa ia Theresa Samata Ala. Na faamatala e alii nei ia Ala le gaioiga o lo o latou faia, ma fa’aalia ai loa e Ala lona naunau e fia auai i le osofaiga. Na latou aga’i atu ma osofai se fale tuufua i Vaitogi ma aumai faagaoi ai se uaea eletise e 25 futu le umi ma faatau atu i le $60 ae faatau mai ai a latou fualaau fa’asaina.

E 2 isi fale na osofa’i e i latou nei i luga o Kango Hill ma maua mai ai uaea eletise e tusa ma le 40 futu le umi, ona faatau atu lea ae i le $72 ae faatau mai ai fualaau fa’asaina. O le isi nofoaga na aga’i atu i ai le osofaiga, o le pito i tua o le Island Choice Building i Tafuna, lea na aga’i atu i ai nao Toiloloma F.L ma gaoi mai ai le uaea eletise e tusa ma le 25 futu le umi ma faatau atu i le $50 ae faatau mai ai fualaau faasaina.

E le i mafai e Toilolo ona manatua uma nofosaga ma fale na latou osofaia ae gaoi mai ai uaea eletise, se’i vagana ai lava nofoaga sa ia manatua na ia faailoa i Leoleo. O tupe uma lava na maua mai uaea eletise sa latou gaoia na fa’aaoga e faatau mai ai a latou fualaau fa’asaina.

E to’atele molimau na mafai ona fesiligia e Leoleo e uiga i lenei mataupu, o nisi o nei molimau e aofia ai aiga na motusia faafuase’i eletise mai o latou Maota ma Laoa, ae na faateia le ASPA ina ua saili atu le mafua’aga o le motusia o le eletise, ua tipi ma ave faagaoi e le tagata uaea eletise sa fesoota’i ai le fale ma le pou uila.

Na maua le avanoa e fesiligia ai e Leoleo i latou ua molia i lenei mataupu, ma latou faamaonia ai lo latou auai i le tele o osofaiga sa faia e ave faagaoi ai uaea eletise ae faaaoga tupe na maua mai ai e fa’atau ai a latou fualaau fa’asaina.

O se tasi o i latou ua molia ia Ala, sa ia faailoa i Leoleo le isi osofaiga na latou faatinoina, e le gata na gaoia ai uaea eletise a le ASPA ae na ave faagaoi ai fo’i meatotino a se tasi o aiga i Leone e aofia ai se T.V, le ituaiga o le Samsung e 45 inisi le lautele.

Ina ua fesiligia e Leoleo sui o le ASPA e faatatau i uaea eletise na gaoia ma leiloloa mai i nofoaga e pei ona taua, na taua ai e sui o le ASPA e faapea, e tusa ma le 1,147 futu le tele o uaea eletise na gaoia mai i nofoaga eseese uma lava na aafia i gaioiga a i latou nei, tusa lea o le tau aofa’i e $7,283.45.