Pago Pago - AMERIKA SAMOA

O le afiafi o le aso Lulu sa fa’au’uina ai le to’alima o sui iloga a le Emergency Medical Service (EMS) ua ausia fo’i tomai ma agava’a e pasia ai e i latou le kosi taua tele i le galuega laveai o le soifua, Advanced Emergency Medical Technician, ma ua iloga ona patipatia le latou fo’i taumafaiga e le Matagaluega o Sailiga & Galuega Lavea’i a le tatou Malo, fa’apea ma le LBJ Medical Center. 

O le auau o le latou fa’atasiga mo lea sauniga mamalu sa tula’i ai le susuga le Tiakono Katoliko Roma Laloasi Seui ma ia fa’ailoa le finagalo o le Atua ia Ieremia lana auauna, “Aua o a’u nei, ua ou iloa manatu ua ou manatu ai ia te outou, o manatu i le manuia ae le o le malaia, o lo’o fetalai mai ai Ieova, e foa’iina atuia te outou le i’uga e i ai le fa’amoemoe.”

“O le faamoemoe i le ola. Ia gafatia ona lavea’i le ola ua tau mou atu” - o le to’alima ua agava’a nei mo galuega lavea’i a le EMS ua aofia ai i latou nei:  Fetaomi Filoialii, Kelemete Fagamanu Ifopo, Kelemete Peni Kaio, Fagupo Tafoki Jr. ma Uaealesi Karoline Malaga.

Sa i ai nisi iloga o le atunuu ma le auaunaga sa auai e tofu vaega mo le polokalama sa fa’asolo o le aso faapitoa mo lenei vaega o le aufaigaluega a le EMS ma sa matagofie le sauniga mamalu ona o le fa’atasi atu foi o aiga ma uo a i latou ua fa’apaleina i nei fa’ailoga e tamau ai lo latou agava’a ua ausia ma le manuia.

Faamalo le tautua i nei alo o le atunuu, aua o le latou matafaioi tau’ave, ia fa’asaoina ma lavea’ia mai le soifua ma’ale’ale o tagata lautele o le atunuu ona o fa’alavelave le ma’alofia poo gasegase tuga.