Pago Pago - AMERIKA SAMOA

Ua taofia nei e Leoleo i le Toese i Tafuna se ali’i ma se tama’ita’i, ma ua mae’a fo’i ona molia i solitulafono mamafa, e mafua mai i se faalavelave na tula’i mai i le itu i sisifo o le atunu’u i le 2 masina talu ai, ina ua taofi e Leoleo le la ta’avale ae maua ai ni fualaau faasaina i totonu o le ta’avale. 

E le gata i lea, ae o le ta’avale lava fo’i lea e tasi faapea ai ma le ave ta’avale lava fo’i lea e tasi na fai a latou tuliga ma Leoleo i po e 2 ua tuana’i atu, peita’i na fiu Leoleo e tau saili le itu na nimo i ai le ta’avale a lenei ali’i, ma i’u ina taofia ai loa ma le tuliga sa faia.

E to’afa Leoleo na tiute i luga o le alatele i se vaega o le alatele i Leone i le masina na te’a nei sa latou maitauina se taavale pikiapu lanu efuefu o aga’i lemu mai i luga o le alatele ma afe loa i luma o se faleoloa. Na faigofie ona iloa e Leoleo le ave ta’avale, e le o faia lona fusipa’u. 

E le i leva ona toe aga’i ese atu le ta’avale mai luma o le faleoloa ae taofi loa e Leoleo ma faatonu le ave ta’avale e afe le ta’avale i tua ma le alatele. Na ona tu lava o le ta’avale, tatala loa e le ave ta’avale ma le faitotoa ae savali i fafo ma uu se tama’i ato lanu uliuli ma foliga mai o le a tamo’e. 

Na faatonu e Leoleo le ave ta’avale e toe fo’i i totonu o le ta’avale peita’i sa fa’aauau pea le taumafai o le ave ta’avale e savali ese. Na umi se taimi o fai finauga i le va o Leoleo ma le ave ta’avale, se’ia oo loa ina malie le ave ta’avale ma toe fo’i mai ai loa i totonu o le ta’avale. 

Ina ua toe saofa’i le ave ta’avale i lona nofoa i totonu o le ta’avale, o le taimi lea na aga’i atu ai loa Leoleo ma faatalanoa o ia e tusa ai o le mafua’aga ua taofia ai lana ta’avale, ona e le i faia sona fusipa’u. E to’alua ni tagata e aofia ai ma le ave ta’avale sa i totonu o le ta’avale. O le susuga a Saufo’i Manuele, o ia lea o le ave ta’avale, ma le tamaitai ia Lupe Alofa, lea sa nofo i le nofoa pito i tua o le ave ta’avale.

Talu ai e lei i ai se laisene ave ta’avale a Manuele, atoa ai ma le sese o le laisene na faapipi’i i le pito i tua o le ta’avale, o le mafua’aga lea na manatu ai loa Leoleo e taofia le ta’avale ma auina atu i le Ofisa o Leoleo i Tafuna mo suesuega. Sa taofia atu ai fo’i ma le tamaitai o Alofa.

Sa fesiligia e Leoleo ia Manuele i le mafua’aga ua le faafouina ai lona laisene ave ta’avale ae na tali le ua molia, na musu e toe faafou lona laisene ave ta’avale, ona o lona popole ne’i maua atu ai o ia i le fa’alavelave tau talepe fale ma le gaoi lea na aafia ai lona igoa i le 2 tausaga talu ai i Leone. Na saili e Leoleo a latou faamaumauga ma iloa ai, e le o i ai se mataupu faapea o aafia ai Manuele.

Ao lei auina atu Manuele ma Alofa i le Ofisa o Leoleo i Tafuna mo isi suesuega, na muamua saili o la tino mo ni aupega ina ia mautinoa le tulaga saogalemu i Leoleo sa tiute i lea aso. A o faia talanoaga a Leoleo ma Manuele, sa maitauina e le isi Leoleo le tamaitai o Alofa o loo taumafai pea e aapa i le taga pito i tua o lona ofuvae uumi o loo fai, ma ona foliga le mautonu .

Na saili e Leoleo le tino o Manuele ma maua ai i totonu o le taga o lona ofuvae ni paipa tioata e 2 o loo i ai vaega papa’e o le pauta faasaina o le aisa. Na faaauau le sailiga i le isi taga o le ofu o Manuele ma maua ai e Leoleo tamai pepa iila e 2 o loo i ai lau mamago o le laau faasaina o le mariuana.

Na saili e Leoleo le ato na u’u e Manuele ma maua ai i totonu fualaau faasaina o le aisa ma le mariuana, atoa ai ma mea e fa’aaoga e i latou e umia fualaau faasaina ma le faamoemoe e tulei ma faatau atu i isi tagata.

Na saili e Leoleo totonu o le ta’avale ma maua ai se paipa tioata o loo i ai vaega o le pauta faasaina o le aisa i lalo o le nofoa o le ave ta’avale. 

Na saili fo’i e Leoleo le tino o Alofa mo ni aupega poo ni fualaau faasaina, ma maua ai se paipa tioata o loo i ai vaega o le pauta faasaina o le aisa, o sikaleti mariuana e 2 ua mae’a ona taai ma le tinoitupe e $210.

Na logo vave e Leoleo ia sui o le Vaega e Suesueina Fualaau Faasaina a le Matagaluega o Leoleo latou te tauave ma suesue le mataupu a Manuele ma Alofa, ina ua maua i ai fualaau faasaina ia te i laua.

O le mae’a ai ona faailoa o aia tatau o Manuele ma Alofa e Leoleo Suesue, na malilie ai loa i laua e talanoa i Leoleo e tusa ai o lenei mataupu. Na muamua fesiligia e Leoleo ia Manuele faatoa fesiligia ai Alofa.

Ina ua fesiligia Manuele e uiga i fualaau faasaina na maua ia te ia faapea ai totonu o le ta’avale, na ia ta’utino ai i Leoleo, o ia e ana fualaau faasaina ia, o mea na aumai i se tasi o ana uo ma le faamoemoe e momoli i se isi ali’i e nofo i Vaitogi. Sa ia faailoa i Leoleo e faapea, talu ai e le o lelei lana ta’avale, o le mafua’aga lea na ia tago ai ua vili lana uo o Alofa e sau i lana ta’avale e piki o ia ma la tietie i Vaitogi i lana feau.

Na faailoa atu a Alofa ia te ia i luga o le telefoni, o ia lea faatoa manava ma o loo lagona le vaivai ma le fia moe, ae afai la te o, ona ave lea e ia (Manuele) le ta’avale ae se’i fai sana moe i le nofoa pito i tua o le ta’avale. O le tulaga lena sa i ai le plan, na faafoe e Manuele le ta’avale ae taoto Alofa i le nofoa pito i tua mo sina malologa puupuu ona o lea faatoa manava mai i lana galuega.

Ina ua uma ona fai le la faatau i le Faleoloa i Futiga, na tago ai loa Manuele ma tu’u le paipa tioata o loo i ai vaega o le pauta o le aisa faapea ai ma sikaleti mariuana e 2 ia Alofa, o le totogi lea o le ta’avale. 

Na faamaonia e Alofa i Leoleo le faamatalaga a Manuele e tusa ai o le mea sa tupu. O fualaau faasaina fo’i na maua ia te ia, o mea na avatu e Manuele e totogi ai lona taimi ma le fa’aaogaina o lana ta’avale. Na fesili Leoleo Suesue ia Alofa poo fea laa ave ai fualaau faasaina na avatu e Manuele ia te ia, na tali le ua molia, e ave ma lona to’alua, o le uo mamae fo’i lea a Manuele.

O le 2 masina ua tuana’i atu na tutula’i uma ai Manuele ma Alofa i luma o le Fa’amasinoga.

Ua molia e le malo ia Manuele i moliaga o le umia faasolitulafono o vaega o le pauta faasaina o le aisa; tasi le moliaga o le umia faasolitulafono o le pauta faasaina o le aisa ma le faamoemoe e tulei ma faatau atu i isi tagata, ma le moliaga e tasi o le umia faasolitulafono o vaega o le laau faasaina o le mariuana, o ni solitulafono mamafa uma ia e mafai ona faasala ai se tasi i le Toese mo le umi e oo atu i le 20 tausaga, poo le faasala i le salatupe e oo atu i le $20,000.

Ua molia e le malo ia Alo i le moliaga o le umia faasolitulafono o vaega o le pauta faasaina o le aisa, faapea ai ma le moliaga o le umia faasolitulafono o vaega o le laau faasaina o le mariuana.

E $20,000 lea ua faatulaga e tatala ai Manuele, ae $5,000.

O le vaiaso fou lea ua faatulaga e faia ai ulua’i iloiloga o nei mataupu.