Ads by Google Ads by Google

Toalua molia i le umia o fualaau faasaina ina ua mae’a tuliga ma leoleo


[ata: foa'i]

Pago Pago - AMERIKA SAMOA

O Filipo Shai ma Fogavai Anetere’a o lo’o taofia ona o moliaga o fualaau faasaina ma ua fa’atulaga e le fa’amasinoga le ta’i $15,000 e tatala ai i tua i laua nei.  O le vaiaso ua te’a na tutulai ai i laua nei i luma o le Fa’amasinoga Fa’aitumalo.

E tusa ai ma le tagi a le malo, o le aso Sa, Fepuari 26 na valaauina ai le Vaega o le Vice and Narcotics a le Matagaluega o le Puipuiga o le Saogalemu Lautele a le malo, ina ua maua i la’ua ua molia faatasi ai ma fualaau faasaina ma vaega o fualaau faasaina, i le mae’a ai lea o se sailiga o taavale i Ottoville.

O lo’o fa’ailoa i le tagi a le malo e fa’apea, na taofia se taavale ona o le laisene. Ina ua talosagaina e leoleo se laisene ave ta’avale, e foliga mai na tau pai atu le ave ta’avale i vaega o le taavale (glove compartment), ae mulimuli ane sola ese ma le saoasaoa o le taavale. 

E toafa tagata sa i totonu o le taavale e aofia ai ma le avetaavale. Na tuliloa e leoleo le ta’avale ae fesoasoani isi vaega o leoleo i le tuliga.

“Na maitauina le ulufale atu o le ta’avale i auala pito i tua i le vaega o Ottoville ma tu ai ina ua taia le itu o se fale nofoia,” o se vaega lea o fa’aupuga o le tagi a le malo. 

“O Leoleo na taunu’u ane i le nofoaga na latou matauina ai le to’atolu o ali’i na o ese mai le ta’avale. O Fogavai lea sa nofo i tua o le pasese pito i luma sa mau i totonu o le ta’avale ma mafai ai e leoleo ona pu’eina o ia a’o taumafai e sola.”

I le suesuega o itutino o Fogavai a’o le’i tuuina o ia i totonu o le ta’avale a leoleo, na maua ai e leoleo se tama’i taga uliuli o lo o i ai ‘straws’ ua uma ona tipitipi, ma o lo’o i ai le pauta fa’asaina ma paipa laiti e lua e ula ai le aisa. Sa maua ai foi ma le $170.

Na mafai e isi leoleo ona pu’e Filipo lea na maua ai mea a faaogaina mo fualaau faasaina. 

O lo’o fa’ailoa i le tagi a le malo e fa’apea e le’i maua le ave taavale fa’atasi ai ma le isi pasese sa i totonu o le taavale. 

Ua le gata i lea, o suesuega a leoleo na iloa ai le laisene o le ta’avale, e ese mai i faamaumauga a le Ofisa o Taavale Afi i Tafuna. 

Ina ua taunu’u i le Ofisa o Leoleo i Tafuna, sa faia ai loa e Leoleo le su’esu’ega o vaega o mea sa maua i ali’i e to’alua. Na maua i'uga lelei mo le methamphetamine - po o le pauta faasaina o le aisa.