To’aono ua molia i suesuega faafuasei e lua a leoleo sa faia mo le sailiga o fualaau faasaina
Pago Pago - AMERIKA SAMOA
I ni tala ua salalau e uiga i ni suesuega faafuasei a leoleo se lua sa faataunuuina i le afioaga o Pago Pago mo Fualaau faasaina, o lo o ta’ua ai le a’afia o ni tagata se to’a 24. Ua mafai ona faamanino atili lenei mataupu ona o ni molimau faamaumauina se lua mai i le faamasinoga, ma e foliga mai o le a iai nisi tagata faaopoopo, o le a molia i lenei mataupu.
O le Aso Tofi, Aukuso 31, 2023 ma le Aso Faraile, Setema 1, 2023 sa faapea ona faataunuuina ai ni suesuega faafuasei se lua, a leoleo, i lalo o se faatonuga mai i faamasino. O nei suesuega faafuasei sa faataunuuina i Pago Pago, ae na lokaina mai ai se tasi mai i le afioaga o Fagatogo.
E toaono nei i latou ua molia i luma o le faamasinoga, ona o lenei mataupu. Ae e iai se toatasi na loka ae peitai, na toe tatalaina o ia i tua, ona o sona gasegase.
AUKUSO 31, 2023
O lo o ta’ua i faamaumauga a le faamasinoga e faapea, i le ta o le 8:15 i le taeao o le Aso Tofi, Aukuso 31, 2023, na faatino ai e le ofisa a leoleo se faatonuga faaletulafono mo le sueina o se alii e suafa ia Monte Carlo Ieremia i le afioaga o Pago Pago. Ina ua taunu’u sui malu o le malo i le fale o Ieremia, sa vaaia ai ni tagata matutua se toalima ma se talavou i totonu o le fale.
Ina ua ulufale sui malu o le malo i le fale a Ieremia, na maua atu ai le tamaitai o Marlena Liaina, le tuafafine a Ieremia ma le alii o Filipo Sione.
Ina ua suesueina e sui malu o le malo ia Liaina, sa maua ai i totonu o lana ato, ni taga pepa iila laiti o iai i totonu se pauta. Sa faamaonia e Liaina, o mea uma ia na maua e leoleo i totonu o lona potu moe, o ana mea totino ia.
Sa suesueina foi e leoleo ia Filipo Sione ma maua ai ni ‘straws’ se lua ma tamai taga pepa iila na iai i totonu pauta papa’e. Sa suesueina nei pauta ma faamaonia ai o fualaau faasaina o le Aisa.
Sa ave faapagotaina foi Ieremia ma suesueina lona potu moe. E tusa ia ma faamaumauga a le faamasinoga, na mauaina i totonu o le potu moe a Ieremia ia ni ato uliuli ma ni masini na maua ai pauta papae, ia na suesueina ma faamaonia o le Aisa.
Na aveina atu loa Ieremia i le ofisa leoleo i Fagatogo. Ua molia uma Monte Carlo Ieremia, Marlena Liaina ma Filipo Sione i lo latou umia o fualaau faasaina o le Aisa.
O le tupe sa faatulagaina mai e le faamasinoga e mafai ona tatalaina ai i latou i tua, e $20,000.
SETEMA 1, 2023
E toalua ni tagata sa ave faapagotaina e leoleo i le Aso Faraile, Setema 1, 2023 ma ua molia nei i la’ua i le tulafono.
O Edward Floor sa ave faapagotaina mai i le faleoloa o le Pago Pago Supermarket, ina ua faatinoina e leoleo ia se faatonuga faaletulafono mai i faamasinoga, mo le suesuega o tagata, taavale, pasika ma le fale o Edward Floor, pe maua ai ni fualaau faasaina.
Ina o suesueina e leoleo Floor sa maua ai se ‘straw’ i totonu o le tagata o lona ofu, ma i totonu o lea ‘straw’ sa mauaina ai se pauta.
Na aveina atu e leoleo ia le alii o Floor i lona fale i Pago Pago ma na o iina na fetaui ai ma le alii o Sonny Tui.
Na fa’ailoa atu e leoleo ia Tui lo latou o’o atu mo le suesueina o lona fale. Na maua ai e leoleo i totonu o le fale o lenei alii se la’au malosi (9mm), sa nana i totonu o se taga aluga, faatasi ai ma seisi la’au malosi (3030 rifle) na maua i totonu o lana pusa tu. Ona o le tulaga i lona soifua maloloina, e ui ina sa lokaina mai Tui i lena taimi, ae peitai, sa toe tatalaina o ia i tua, i se taimi mulimuli ane.
Ina ua fa’aauau suesuega a leoleo i le potu moe a Floor, sa mauaina ai ni taga pepa iila laiti se valu, na iai totonu ni pauta, o ni ‘straws’ tipitipi, sa faapena foi ona maua ai ni pauta, o ni sikaleti taai ma se tamai taga pepa iila na iai totonu ni laulaau lanu meamata. Sa maua ai foi ni pulufana, o se tinoitupe e $240, o ni afi (lighters) o masini e fua ai pauna ma isi lava tulaga e fa’aaogaina i fualaau faasaina.
O pauta ma laulaau lanumeamata ia sa maua i le potu a Floor, sa mafai ona suesueina ma faamaonia, o Fualaau faasaina o le Aisa ma le Mariuana.
O isi tulaga na mafai ona fa’aalia i faamaumauga a le faamasinoga e faapea, o le aso lava lea e tasi, i le 12:02 i le aoauli, na ave faapagotaina ai e leoleo se alii e suafa ia Itula Sappa, ia po o Stula e pei ona lauiloa ai o ia e tagata, i le afioaga o Fagatogo. Na mafua ona lokaina e leoleo ia Sappa, ona sa molimauina se fefaatauaiga i le va o Sappa ma Floor i le faletalimalo o Vaivao i Pago Pago.
Ina ua suesueina e leoleo le tino o Sappa, na maua ai ni ‘straw’ o iai pauta, ma sa faamatala e Sappa i luma o leoleo, sa faatonuina o ia e se alii e alu e aumai ‘straws’ nei mai i se palagi (Floor).
Na mafai ona suesueina ia pauta ia sa maua ia Sappa ma faamaonia ai o se vaega o fualaau faasaina, o le Aisa.
O loo ua molia nei Floor i moliaga e fa, e aofia ai lona umia faasolitulafono o Fualaau faasaina o le mariuana ma le aisa, ma se faamoemoega e faatauina atu i isi. E $40,000 le tupe totogi e pei ona faatulaga mai e le faamasinoga, e mafai ai ona tatala i tua ia “Floor.
Ae o Sapp aua molia foi o ia i lona umia faasolitulafonoina o vaega o fualaau faasaina, e aofia ai le aisa ma e $20,000 ua faatulagaina e mafai ona tatalaina ai o ia i tua.
O Edward Floor lea o lo o fa’aaogaina e le Samoa i lenei lomiga, ae i totonu o faamaumauga a le faamasinoga, o le suafa o lenei alii o Edward Floors. Ae e pei ona faamaonia mai e se molimau maumaututu, o le faai’u o lenei alii, o Floor ma o isi taimi e valaau ai o ia e tagata, o ‘Eddie’.