Ads by Google Ads by Google

To’atasi ua faamaonia le maliu i le faama’i o le KOVITI-19

ausage@samoanews.com

 

Pago Pago - AMERIKA SAMOA

 

Ua faamaonia mai le maliu ai o se Tama matua i le Falema’i o le LBJ i Faga’alu, e mafua mai i le faama’i o le KOVITI-19.

 

I se saunoaga mai le Taitai o le atunu’u, le afioga i le alii Kovana ia Lemanu Peleti Sialega Palepoi Mauga i luga o le alaata faasalalau a le KVZK-TV i le taeao ananafi, na faamaonia mai ai e le Kovana lenei tala faanoanoa mo le atunu’u.

 

Sa ia taua e faapea, o le Tama matua ua maliu, e tele nisi gasegase sa aafia ai o ia, peitai ua faaopoopo atu i ai ma le Koviti, ma ua atili ai ona pagatia lenei Tama.

 

E pei ona taua e Lemanu i lana saunoaga, sa taumafai lava le faigamalo i le malosi e gata mai ai, ina ia puipuia le atunuu mai le faama’i, atoa ai ma le oo atu i le tulaga e le talia gofie e tagata.

 

“E lagona le vaivai o le loto ma le agaga ona o le tulaga e pei ona tula’i mai, a o taumafai pea lau faigamalo e fai mea sili ina ia lavea’i o tatou tagatanuu’,” o le saunoaga lea a Lemanu.

 

Sa ia taua atili e faapea, o le a faaauau pea galuega a le malo ma le Task Force i le faia lea o gaioiga uma, ina ia puipuia ai le atunu’u mai lenei faama’i.

 

E pei ona valoia a le Task Force i le vaiaso nei, o suesuega ua faia e Foma’i popoto faavae mai lea i numera ma faamaumuaga o i latou ua aafia i le faama’i, ua atagia mai ai le i ai o soifua o nisi o le atunu’u e ma’imau ona o lenei faama’i.

Tau ina ia faamaise le agaga o le Atua i le aiga o le Tama matua ua aafia.