Pago Pago - AMERIKA SAMOA

O ripoti ua maua e le Task Force mai afioga i Faipule faapea ai nisi o le atunu’u ua atagia mai ai le to’atele o tagata o loo faanofoesea i aiga ina ua aafia i le faama’i, e le o faamaoni i ta’iala ma tulafono na tuuina atu e le Soifua Maloloina.

O le iloiloga a le Komiti o le Soifua Maloloina a le Maota o Sui i le vaiaso na te’a nei ma sui o le Task Force, na faailoa ai e afioga i Faipule i sui o le Task Force ripoti e faatatau i lenei faafitauli.

O sui o le Task Force na auai i le iloiloiga e aofia ai le Faatonusili o le Matagaluega o le Soifua Maloloina ia Motusa Tuileama Nua, o le Faatonusili o le Ofisa o le Medicaid ia Sandra King Young, faapea ai ma le Foma’i ia Dr. Elizabeth Lauvao.

O le iloiloga, lea na taitaia e le afioga i le ali’i Faipule ia Logoitua’u Mark Atafua, o le sui taitai komiti, na faatulaga ina ia maua ai le avanoa e afioga i Faipule e fesiligia ai sui o le Task Force i nisi o mataupu e fesootai ma puipuiga o le faama’i ua pepesi i le atunu’u.

O nisi o ia mataupu e aofia ai le faamaninoina o le auaunaga a le Talofa Pass i Hawaii faapea ai ma le tautua fou mo Manu’a, atoa ai fo’i ma le auala o loo faamalosia ai e le Soifua Maloloina ta’iala ma tulafono mo i latou o loo faanofoesea i totonu o aiga ona ua faamaonia le aafia i le faama’i.

Na faamanino e Motusa e faapea, o le faamalosia o ta’iala ma tulafono mo aiga ua faanofoesea ona o le faama’i, o lo o gafa lea ma le Task Force, faapea ai le tele o isi Matagaluega a le malo, ae mafuli lava i le Vaega o Leoleo faapea ai le Ofisa o Mataupu Tau Samoa i susuga i Pulenu’u.

O i latou nei o lo o taamilo i tua i nuu ma aiga e vaavaai poo usitaia e tagata o loo faanofoesea ta’itala ma tulafono.

O le fesili pe o usitaia e aiga o loo faanofoesea ta’iala ma tulafono mo le puipuiga o le faama’i? O le tali, e le mautinoa.

Saunoa Motusa, o loo tuuina atu i le Task Force ripoti mai le vaega o loo faamalosia ta’iala ma tulafono, ina ia mautinoa ai le faatinoina o le galuega.

Saunoa King Young e faapea, o le galuega o loo faatino e le Talofa Pass, e ala i le mulimulita’i i nofoaga o loo i ai aiga ua aafia, o loo fesoasoani malosi lea i le tufatufaina atu o meaai mo aiga o loo aafia.

O le Ofisa o Aoga a le malo ma le polokalame o le School Lunch, o i latou ia o loo gafa ma le tufatufaina atu o mea’ai mo aiga ua aafia. 

Na faafetaia e Faimealelei le tautua a le Task Force, atoa ai ma le taumafaiga ina ia puipuia le atunuu mai le faama’i, ae i lona talitonuga, e tele se galuega e moomia le toe faaleleia ina ia mautinoa le saogalemu o nu’u ma aiga e le o aafia i le faama’i.

E mafua lea tulaga ona e talitonu le afioga i le alii faipule mai Aua, e i ai nisi o tagata o aiga o loo faanofoesea e le o usita’i i tulafono ma ta’iala.

Mo se faataitaiga o lona afioaga i Aua, e i ai se alii e mau paolo atu i se tamaitai Aua o loo faanofoesea uma le latou aiga ona ua faamaonia le aafia, ae o loo vaaia pea lea alii e fealua’i i lana ta’avale i vaega o le nuu ma le taulaga.

Sa o atu i ai le aumaga ma faatonu le alii lea e nofo i le fale, peita’i e le faalogo ma usita’i, ae atili ai ona fealua’i i lana ta’avale, pei lava e le o aafia lona aiga.

O le popolega e pei ona saunoa Faimealelei, ina ne’i avea le le popole o lenei tagata ma auala e pipisi ai le faama’i i isi tagata ma aiga o le nu’u e le o aafia. 

Sa ia taua lona fautuaina o sui o le aumaga e vili Leoleo ma faailoa i ai le faafitauli, ae aua ne’i toe o i ai nisi i le fale ina ne’i aafia se isi i le faama’i.

O le galuega a pulenu’u i le faamalosia lea o ta’iala mo i latou o loo aafia, o se tasi lea o itu na taua i le saunoaga a Faimealelei. Sa ia taua lona vaai alofa i le pulenu’u a lona nu’u i Aua, i le faigata o le galuega o loo ia faatinoina, o le alu lea e tufa taumafa i aiga o loo aafia, e aunoa ma ni laei e mafai ai ona puipuia o ia mai le aafia i le faama’i.

Na talosaga Faimealelei ia Motusa, ina ia silasila toto’a i le tulaga lea, ma vaavaai pe ono mafai ona tufa ni laei e puipuia ai le saogalemu mo pulenu’u, ina ia mafai ona malu puipuia i latou mai le ono aafia.

Sa ia fautuaina fo’i le tatau lea ona aga’i pulenu’u e fai a latou suega faatasi i le vaiaso, ina ia mautinoa o loo saogalemu i latou.

Na lagolagoina e le Sui Fofoga Fetalai o le maota, afioga Fetu Fetui Jr le fautuaga a Faimealelei, ma ia talosagaina ai Motusa ina ia silasila toto’a i lea mataupu taua.

Na faafetaia e Fetu le tautua a le Task Force ae faapitoa lava i Foma’i ma Tausima’i o le Soifua Maloloina ma le Falema’i o le LBJ.

O le tautua ma le galuega fita o loo faatino e Foma’i ma Tausima’i e pei ona saunoa Fetu, e le mafai e se isi tagata ona faatino. 

“O i latou nei o loo faamoemoe i ai le ola ma le soifua manuia o tagata uma, e tuuina atu o latou ola e togafiti ma puipui ai i latou ua mama’i. E tusa lava pe aafia atu ai ma i latou i le faama’i, e le solomuli lava, ona o le latou tautoga lea i le Atua, e tausi ma puipui le soifua o le atunuu,” o le saunoaga lea a Fetu.

E tutusa finagalo o Faipule ma lagona na faasoa mai e nisi o tagatanu’u o le atunu’u, e faatatau i nisi o aiga o loo faanofoesea ona ua aafia i le faama’i, ae o loo vaaia le feofeoa’i solo i vaega o le atunu’u.

Na taua e se Tina mai Tafuna se isi o aiga o le latou tuaoi o loo faanofoesea ina ua aafia le Tina, ae o loo vaaia pea lava le Tina lea o fealua’i i lana ta’avale e fai a latou faatau mo le aiga. 

Na taua e le Tina na valaau mai i le Samoa News e faapea, e 3 lava aso na nonofo ai le aiga lea i le latou fale ina ua faatoa faanofoesea, ae amata loa ona vaaia ua feoa’i solo i fafo.

Sa vaaia le taavale a le aiga o paka i luma o se faleoloa, ma iloa ai, o le Tina o le aiga na alu atu e faatau.

E faapena fo’i lagona na faasoa mai e se alii i Nu’uuli e faatatau i se Tama latou te tuaoi, o ia fo’i o se Faifeau, na faamaonia le aafia o lona aiga i le vaiaso na te’a nei ma faanofoesea ai, ae vaaia lava le fealua’i solo i lenei alii Faifeau e fai faatau a le latou aiga.

Na taua e le alii lea i le Samoa News, o totonu o le faleoloa i Nu’uuli na la fetaui ai ma le faifeau, ae na musu e fai i ai sana tala ona e fa’aaloalo o ia le Failotu, peita’i o lana amio ua le talafeagai ma ta’iala o lo o tuuina mai mo le puipuia o le faama’i.

I le polokalame a le Task Force i le vaiaso nei, na toe fautuaina malosi ai e le Taitaifono, le afioga i le Lutena Kovana ia Talauega Eleasao Ale le atunuu ina ia faataua ta’iala ma tulafono ua tuuina atu e le Soifua Maloloina, pe afai e faamaonia ua aafia se isi o le aiga ma faanofoesea mo se taimi e oo atu i le 14 aso.

Saunoa Talauega, e tatau i le atunuu atoa ona faataua puipuiga o le faama’i, ae aua ne’i manatu mama i ai, ina ne’i toe aafia ane se soifua o se isi ae ua tuai.

O le fautuaga fo’i lea mai le afioga i le Faatonusili o le Soifua Maloloina ia Motusa. Sa ia fautuaina afioga i Faipule ina ia logo o latou itumalo ma tagata uma o le atunu’u, e le tatau ona manatu mama se isi i ta’iala ua tuuina mai, ina ia ma’imau se soifua i le faama’i.