Ads by Google Ads by Google

To’atele pea tagata o le atunu’u e le i faia tui puipuia o le COVID-19


[ata: foa'i]
ausage@samoanews.com

Pago Pago, AMERIKA SAMOA

 

Ua faailoa mai e le Komiti Faafoe e gafa ma puipuiga o le faama’i o le COVID-19, e le i taitai ona oo le aofa’i o tagata ua mae’a ona faia tui puipuia i le maualuga e tatau ai ona mautinoa ua malu puipuia Amerika Samoa pe afai ae oo mai i ona laufanua le siama o le faama’i oti o le COVID-19.

 

I se fonotaga ma le Au Faasalalau i le vaiaso nei, na taua ai e Foma’i faapitoa o le Komiti Faafoe, e na o le 59.3% o le faitau aofa’i o Amerika Samoa ua mae’a ona faia tui puipuia mo le faama’i. 

 

Na taua ma le agaga maualalo e le Taitaifono o le Komiti Faafoe, le afioga i le Lutena Kovana ia Talauega Eleasalo Ale le tatau lea i tagatanu’u uma o Amerika Samoa ona faautagia mai lenei faasilasila taua, ma aga’i mai mo le faia o tui puipuia ina ia mautinoa e puipuia aiga ma faapea tagatanu’u uma o Amerika Samoa.

 

O le aofa’i o tagata ua mae’a ona faia tui e lua mo le faama’i e tusa ma le 21,893, tusa lea o le 59.3% o le faitau aofa’i o le atunu’u i le taimi nei. Ae o le aofa’i o i latou ua mae’a ona faia le tui e tasi, e tusa ma le 24,856, tusa lea o le 63.7% o le faitau aofa’i o le atunu’u.

 

O le fuafuaga a le malo ua i ia e pei ona faamanino e le Lutena Kovana ia Talauega, e toe 2 malaga faapitoa o loo tapena e le malo o loo totoe, ona tatala loa lea o le avanoa mo malaga masani a le vaalele o le Hawaiian i le masina o Aokuso.

 

O le faanaunauga o loo i ai, ia tatala ane malaga masani a vaalele i le masina o Aokuso ae ua toatele le aofai o tagata o le atunu’u ua faia tui puipuia mo le faama’i. Na toe faamamafa e le Taitaifono o le Komiti Faafoe, e tatau i tagata uma ona faataua le faia o tui puipuia mo le saogalemu o le atunu’u atoa.

 

“Aua e te manatu faapitoa mo oe lava, aua e te manatu faatauva’a i le saogalemu o lou aiga ma le atunuu atoa. Ia e faia le tui ona o lona manatu alofa i lou aiga, o lau fanau ma lou to’alua faapea ai le atunu’u atoa. Afai e aafia le teritori i le faama’i ae toatele e lei faia tui puipuia, o le a toatele le atunuu e aafia ma ono tulai mai ai se tulaga faaletonu,” o le saunoaga lea a Talauega.

 

Ua ia talosagaina le atunuu ina ia agai atu i nofoaga eseese o loo faagasolo ai tui mo le faia o latou tui.

 

 “E talosaga atu ma le loto maualalo i le mamalu o le atunu’u faamolemole, afifio mai e faatino a outou tui puipuia ina ia mautinoa e saogalemu le atunu’u atoa aemaise ai aiga ma nai fanau laiti,” o le saunoaga lea a Talauega.

 

“E te le faia lenei tui ona o lou alofa ia te oe lava, ae mafua ona e faatinoina le tui lenei, ona o lou alofa i lou aiga ma lau fanau, faapea ai le atunu’u atoa. Afai ae toatele i latou e faatino a latou tui puipuia, o le faaitiitia fo’i lea o le avanoa e mafai ai ona aafia se tasi i Amerika Samoa i auga o lenei faama’i oti,” o le saunoaga lea a Talauega.

 

“Ia faailoa lou alofa i lou aiga e aofia ai lou Tama ma lou Tina, o lau fanau faapea ai nai ou tei laiti e le o mafai ona agava’a i le faatinoina o le tui. Tatou galulue faatasi e puipui Amerika Samoa mai aafiaga o lenei faama’i oti.”

 

Saunoa le Foma’i Sili o le LBJ ia Dr. Iotamo Saleapga e faapea, e le tatau i tagata o le atunuu ua faalagolago i le Atua e puipuia i latou, ona mumusu ai lea e faia tui puipuia. I lona talitonuga, e tatau ona o faatasi le faatuatua i le puipuia a le Atua ma galuega, o lou alu lea e fai lou tui puipui ina ia malu puipuia lou aiga ma le atunu’u atoa.

 

Mo malaga a vaalele e pei ona saunoa Talauega, o le vaalele lea na malaga mai i le vaiaso na tea nei, e to’a 249 le pasese na malaga mai ai. O le to’a 200 lea sa nonofo i le Fale Talimalo o le Tradewinds Hotel na tatala i tua i le aso Lulu o le vaiaso nei, ae o le isi vaega e silia i le to’a 30 na nonofo i le Fatuoaiga ua faamoemoe e tatala i tua i o latou aiga i le aso, aso Faraile, Iuni 25, 2021.

 

O ananafi lea na taunuu mai ai le vaalele mai Hawaii mo le pikiina atu o le pasese mai Amerika Samoa nei ma le faamoemoe e fia malaga i Hawaii mo talavai ma isi mafua’aga tatau. E leai se pasese na malaga mai ma le va’alele lea.

 

O le malaga lona 7 a vaalele faapitoa ua faamoemoe e taunu’u mai i le aso 9 o Iulai, ona totoe ai loa lea o le malaga mulimuli o loo faatulaga ma faatautaia e le malo ua faamoemoe e taunu’u mai i le aso 29 o Iulai.

 

O nei malaga uma e pei ona saunoa Talauega, o le a uia lava ala masani o le aiaiga ma tuutuuga o le puipuiga, e pei o le faamautu i Fale Talimalo ma nofoaga faapitoa mo ni nai aso, ona faatoa tatala ai loa lea i tua i o latou aiga. O loo fautuaina malosi pea lava pasese o loo fia malaga mai i le atunuu ina ia faia tui puipuia.

 

O le masina fou o Aokuso lea ua faamoemoe e toe tatala ai malaga a vaalele i le va o  Samoa ma Amerika Samoa, pau le suiga, e le mafai ona toe ausia le pisi ma le tele o malaga a vaalele i le aso e tasi e pei ona i ai ao lei tulai mai le faama’i, ae laa fuafua lava pe 2 i le 3 malaga a le va’alele i le vaiaso.

 

O le a mataituna foi e le malo tagata malaga uma ina ia mautinoa e faia tui puipuia mo le faama’i.

 

Mo tui puipuia o fanau e tai 12 tausga le matua e oo atu i le 15 tausaga le matua, o le Maota o le Ekalesia EFKAS i Matuu ma Faganeanea lea ua faamoemoe e faataunuu ai tui mo le itu i sasa’e, ae o le nofoaga o le Kolisi Tuufaatasi, le ASCC mo le itu i sisifo.