Ads by Google Ads by Google

Toe a’afia fo’i se ali’i na falepuipui muamua i le soliga o le tulafono


[ata: SN]
ausage@samoanews.com

Pago Pago, AMERIKA SAMOA

 

O le ali’i lea na tau saili e Leoleo i lona fao faamalosi o se ato tupe a se isi tagata, atoa ai ma lona gaoia o se tupe mai totonu o se faleoloa i Tafuna i le 3 masina talu ai, ua taofia nei i le toese i Tafuna, ina ua tu’uaia fo’i o ia i lona osofaia o se fale o se aiga i Malaeimi ae ave faagaoi le tele o meaaoga sa i totonu i le masina na te’a nei.

 

O le vaiaso nei na tula’i ai le ali’i o Tevita Fatu i luma o le Fa’amasinoga Fa’aitumalo mo lana ulua’i iloiloga. O le loia ai le Ofisa Loia Fautua mo tagata lautele ia Ryan Anderson o lo o tula’i mo le ua molia, ae o le ali’i loia sili lagolago ia Robert Morrison III o lo o tula’i mo le malo.

 

E 3 tagi eseese a le malo o lo o faia fa’asaga ia Fatu. I le tagi muamua, o lo o tu’uaia ai o ia i moliaga o le gaoi. I le tagi lona lua, o lo o tu’uaia ai o ia i moliaga mamafa e 2 o le gaoi ma le talepe fale i le tulaga muamua. Ma le tagi lona tolu, o lo o tu’uaia ai fo’i o ia i moliaga mamafa e 2 o le gaoi ma le talepe fale i le tulaga muamua.

 

E $20,000 le tupe lea ua fa’atulaga e le afioga i le ali’i Fa’amasino ia Elvis P. Patea e tatala ai i tua le ua molia. Afai ae mafai ona tatala o ia i tua, ua fautuaina o ia e usita’i i tulafono uma a le malo, aua ne’i ona toe soli se tulafono, aua fo’i ne’i toe taumafai e fa’afesoota’i molimau a le malo, e aofia ai ma i latou o lo o a’afia i soo se auala.

 

Ua fautuaina le ua molia ina ia tu’uina atu lona tusi folau e taofi e le loia a le malo, fesoota’i vava lalata ma lana loia i soo se taimi, ma ia auai i soo se taimi e valaau ai lana mataupu i luma o le fa’amasinoga.

 

Na teena e le fa’amasinoga le talosaga mo se avanoa e faaitiitia ai le tupe e tatala ai le ua molia i tua. Na taua e le loia fautua ia Anderson e fa’apea, e ui i tagi eseese e 3 faasaga i le ua molia, peita’i e atagia mai i le ripoti a Leoleo, e le tele ni oloa atoa ai ma se vaega tupe na aofia i le solitulafono a le ua molia.

 

Na taua atili fo’i e le loia fautua i lana talosaga e fa’apea, o le ua molia o se tagata o Amerika Samoa, e le o i ai fo’i se faanaunauga na te tuua le atunu’u ae malaga ese atu. E le o ia o se tagata e ono masalomia le sola ese ma Amerika Samoa, aua o lona aiga moni lava o lo o nofo ma aumau ai i le taimi nei.

 

Na tete’e le loia a le malo i le talosaga ina ia faaitiitia le tupe e tatala ai le ua molia i tua. Na taua e le itu a le malo e fa’apea, e ui e le tele ni meatotino na aafia i gaoiga a le ua molia, peita’i o le auala sa ia faatinoina ai nei solitulafono uma, ua atagia mai ai le mata’utia o gaioiga sa faia e le ua molia.

 

Na taua atili fo’i e le malo e fa’apea, e le o se taimi muamua lenei ua aafia ai le ua molia i le tulafono. Na falepuipui fo’i o ia i le Falepuipui o Tamaiti i Tafuna (JDC), ina ua ta’usala o ia e le fa’amasinoga i ituaiga solitulafono lava nei a o avea ai o ia ma tagata e talavou i lalo o le tulafono.

 

I le mae’a ai ona fa’afofoga o le fa’amasinoga i fa’afinauga a loia e tusa ai o le tupe e tatala ai le ua molia i tua, na faia ai loa e Patea le faaiuga e teena le talosaga mo se avanoa e faaitiitia ai le tupe e tatala ai le ua molia i tua.

 

Saunoa Patea e fa’apea, o le tupe ua faatulaga e le fa’amasinoga, ua tatau ma onomea i le solitulafono sa faatinoina e le ua molia.

 

O le vaiaso fou lea ua fa’atulaga e toe faia ai le ulua’i iloiloga o lenei mataupu, ma o lo o taofia pea le ua molia i le toese se’i vagana ua totogi le tupe ua faatulaga ona faatoa mafai lea ona tatala o ia i tua mai le toese i Tafuna.

 

TAGI A LE MALO:

 

E pei ona taua e le malo i le latou tagi e fa’apea, e 2 vaiaso o tau sailia e Leoleo le tagata na ia fao faamalosi le ato tupe a se tagata fa’atau i totonu o se faleoloa, atoa ai ma lona gaoia o se tinoitupe mai totonu o le masini tali tupe a le isi faleoloa.

 

E pei ona taua e le malo i le latou tagi e fa’apea, e tusa ai o fa’amatalaga a molimau atoa ai ma le Tama e ana le ato na fao faamalosi e le ua molia, na atagia mai ai le fuafua lelei e le ua molia o lana gaioiga.

 

A o tu le Tama na a’afia i le laina e sauni e totogi lana fa’atau, na fa’afuase’i ona savali mai le ua molia mai le pito i tua o le faleoloa ma se’i ese le ato tupe a le Tama sa uu i lona lima ma alu loa i le atoa.

 

O le vave o gaioiga a ni isi o tagata na latou tuliina le ua molia, na mafua ai ona toe maua mai le ato tupe a le Tama na a’afia, ae lei mafai ona maua le ua molia.

 

A o fa’agasolo suesuega a Leoleo e tau saili ai le ua molia i le vaiaso lava lea, na fa’afuase’i ona maua mai se isi telefoni mai le pule o se Faleoloa Asia, e talosagaina ai se fesoasoani i le tau sailia o se ali’i talavou na ia fao faamalosi se tinoitupe mai totonu o le masini tali tupe a le faleoloa.

 

O se ata sa pu’eina e le masini pu’e ata a le Faleoloa na mafai ona ave e Leoleo ina ia fesoasoani ai i le latou sailiga sa faagasolo.

 

E tusa ai o le fa’amatalaga a le pule o le faleoloa na taua ai e fa’apea, a o pisi le tama’ita’i Tali Tupe i le faiga o fa’atau ma sui a tagata fa’atau, na fa’afuase’i ona alu atu le ua molia ma tago atu i totonu o le masini ma gaoi le tinoitupe ma alu i le atoa.

 

I le vaiaso na te’a nei, na talosagaina ai e se ulugali’i mai Fogagogo se fesoasoani a Leoleo, i se ali’i talavou na ulufale faamalosi i totonu o le la fale i le po ma ave faagaoi le tele o meatotino sa i ai e aunoa ma se faatanaga. O le fale na a’afia a le ulugali’i e tu i le isi itu o le la fanua, e leai se isi sa nofo ai i le taimi na talepe ma gaoia ai e le ua molia.

 

Na taunu’u Leoleo ma latou maua ai le ua molia, ma auina atu loa i le Ofisa o Leoleo i Tafuna mo le faatalatalanoaina o lenei mataupu.

 

Na taua e molimau i Leoleo e fa’apea, o le faalavelave na tula’i mai i le taimi a o pisi ai le ulugali’i i le taliina o a laua malo i totonu o le fale o lo o la nonofo ai, ae maua ai loa le avanoa e ulufale faamalosi ai Fatu i totonu o le isi a la fale e ala i lona talepe o le faitoto’a pito i tua.

 

Ina ua fesiligia e Leoleo le ua molia, sa ia ta’utino ai e moni ma fa’amaoni tu’uaiga fa’asaga ia te ia. E le gata sa ia gaoia le ato tupe a se Tama sa i totonu o le faleoloa, ae na ia gaoia fo’i se tupe mai totonu o le masini tali tupe a le faleoloa. E le gata fo’i i lea, sa ia ioeina fo’i lona gaoia o le tele o meatotino mai totonu o le fale a le ulugali’i na a’afia.

 

O le tausaga e 2010 na ta’usala ai e le Fa’amasinoga le susuga a Fatu i moliaga o le gaoi ma le talepe fale, ma fa’asalaina ai o ia i le toese i Tafuna mo le 28 masina, o se tasi lea o tuutuuga o lana nofovaavaaia e 7 tausaga.

 

O le o le tausaga e 2018i na mae’a ai le nofovaavaaia a Fatu, a o lea ua alia’e mai le isi mataupu fou e pei ona tu’uaia ai o ia e le malo.