O le ali’i lea na ta’usala e le Fa’amasinoga Maualuga i le 3 tausaga talu ai i lona talia o ni oloa na ave faagaoi e ni isi tagata mai se Faleoloa i Fagaima, ua taofia nei o ia i le Toese i Tafuna ina ua taofi e Leoleo se ta’avale na ti’eti’e ai ae maua ai fualaau fa’asaina ia te ia.

O le aso Gafua o le vaiso nei na tula’i ai Muka Anthony Godinet i luma o le Fa’amasinoga Faaitumalo. Ua molia nei o ia i le solitulafono o le umia faasolitulafono o vaega o le pauta faasaina o le aisa, o se saolitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e mafai ona oo atu i le $20,000, poo le faasala foi i faasalaga uma ia e lua.

E $5,000 le vaega tupe lea ua fa’atulaga e le afioga i le ali’i Fa’amasino ia Elvis P. Patea e totogi ona faatoa mafai lea ona tatala Godinet i tua mai le Toese i Tafuna.

O le vaiaso fou lea ua fa’atulaga e faia ai lana ulua’i iloiloga mo lenei mataupu.

TAGI A LE MALO

O le mataupu e pei ona molia ai Godinet na alia’e mai i le taeao o le aso 22 o Aperila ina ua taofi e Leoleo se pikiapu i luma o le aoga a le Manumalo ina ua iloa e Leoleo ua leva ona mae’a le aoga o le laisene e faataga ai lea taavale ona fealua’i i luga o le alatele.

E to’alua ali’i sa i totonu o le ta’avale i le taimi na taofi ai e Leoleo, o le susuga a Godinet ma le ali’i ave ta’avale, o ia fo’i lea e ana le ta’avale.

A o talanoa Leoleo i le ave ta’avale, sa maitauina e le isi Leoleo le minoi solo o Godinet ma taumafai e tago i totonu o le taga o lona ofu o lo o fai. Na i’u lava i le talosaga o Godinet i le Leoleo e faataga o ia e alu ona e i ai lana mataupu o lo o fia vave alu i ai.

Na faailoa e le Leoleo ia Godinet, e le mafai ona alu ona o lo o i ai le faaletonu i le ta’avale, ma, e tatau fo’i ona suesueina i laua ina ia tusa ai ma auala e faatino ai e Leoleo puipuiga tau solitulafono i luga o le alatele.

Na taofia e Leoleo le ta’avale ma toso loa aga’i i le Ofisa o Leoleo i Tafuna ona ua mae’a le aoga o le laisene e faataga ai ona fealua’i. Na avatu faatasi ai fo’i ma Godinet ma le ave ta’avale i le Ofisa o Leoleo i Tafuna mo suesuega.

A o le i auina atu Godinet ma le ave ta’avale i le Ofisa o Leoleo i Tafuna, na faia se suega faapitoa i o la tino ina ia mautinoa la te le o tauaveina ni aupega poo ni fualaau fa’asaina.

E leai ni aupega poo ni fualaau faasaina na maua i le ave ta’avale, ae ina ua sailia e Leoleo le tino o le susuga a Godinet, na maua ai se paipa tioata o lo o i ai vaega o le pauta faasaina i le taga o lona ofu sa fai. Sa maua ai fo’i pepa iila e faaaoga e utu ai le aisa ma faatau atu, faapea ai ma cut-up straws ua mae’a ona ta tipi tulimanu e masani ona fa’aaoga e utu ai vaega o le pauta o le aisa.

E eseese potu na ave i ai Godinet ma le ave ta’avale i le taimi na fesiligia ai i laua e Leoleo e tusa ai o lenei mataupu.

Ina ua fesiligia e Leoleo ia Godinet, o ia sa nofonofo i luma o se Faleoloa i Fagaima ae ona vaaia loa le ta’avale pikiapu a lana uo o alu ane i le alatele, o lea na ia taofia ai loa le ta’avale ma amata ai loa le la ti’eti’ega. Sa ia taua i Leoleo, na te le i iloaina ua mae’a le aoga o le laisene o le ta’avale o lo o la tietie ai.

Sa alu le la ti’eti’ega i Vaitogi, o Futiga, ma faasolo ane ai i Malaeloa ma sau ai i Malaeimi, seia oo mai loa i luma o le aoga a le Manumalo i le vaega tonu na taofi ai i laua e Leoleo.

A o alu le la ti’eti’ega, sa taua e Godinet lona fai i le ave ta’avale, soo se taimi la te tau ai i faaputuga o lapisi u’amea i tafatafa o le alatele, ia faatu le ta’avale ae la’u i luga lapisi u’amea ia e ave e fa’atau e maua ai se la tupe. O le tele o taimi na taofi ai le la ta’avale i tafatafa o le alatele ae la’u i tuga o le pikiapu lapisi u’amea.

O se tasi o lapisi sa ia tau ai i se mafa ta’avale tuai ua pala, o lea na ia tago ai loa ma sii le mafa taavale tuai lea i tua o le pikiapu. Na faateia o ia ina ua pau mai i totonu o le mafa taavale se pepa iila o loo i ai le paipa tioata o loo i ai vaega o le pauta faasaina o le aisa, faapea ai ma isi tama’i pepa iila ma straws ua uma ona ta tipi tulimanu.

Sa ia tago loa ma tu’u mea ia na maua mai totonu o le mafa taavale i le taga o lona ofuvae sa fai. Ae ina oso i totonu o le ta’avale, sa ia faailoa i le ave ta’avale mea sa ia maua, ae na fai atu le ave ta’avale ia te ia, e taofi se’i oo i le nofoaga e lafoa’i ai le lapisi ona tia’i ai loa lea ma mea sa ia maua.

Na matua tete’e malosi Godinet, e le o ia e ana le paipa tioata lea na maua i ai vaega o le pauta faasaina o le aisa.

Na maua le avanoa e fesiligia ai e Leoleo le ali’i ave ta’avale i le mafua’aga na fealua’i ai le ta’avale i luga o le alatele ae ua leva ona mae’a le aoga o le laisene. Na faatoese le ave ta’avale i Leoleo ona o le tulaga faaletonu na tula’i mai i le ta’avale. Sa ia taua e fa’apea, na te lei iloa ua mae’a le aoga o le laisene o le ta’avale, ona o le ta’avale a lona uncle e fai lona Fale Inisinia lea na alu atu ai.

Na teena e le ave ta’avale le faamatalaga a Godinet o laua na tietie solo i le tele o afioaga e su’e ni lapisi u’amea e la’u i tua o le ta’avale. Na taua e le ave ta’avale i Leoleo, e le masani tele ia Godinet, ae sa avea le Fale Inisinia a lona uncle lea e masani ona alu e fesoasoani ai ma auala na la masani ai loa ma Godinet pe tusa o le 3 aso talu ai.

A o alu le la ta’avale, sa talanoa atu Godinet ia te ia pe mana’o i mea ula mo ia, ae sa ia talu i ai, “ou te le faia na mea”. Na te le i iloaina o lo o i ai ni fualaau faasaina ia Godinet i le taimi na la ti’eti’e ai, ae na ia masalosalo ina ua taofi e Leoleo le la ta’avale, ae faafuase’i loa ona fai atu Godinet ia te ia, e vaai se vaega o le taavale e nana ai le paipa, pepa iila ma straws o lo o i totonu o lana taga, peita’i sa ia fai i ai, e tu’u pea ia te ia se’i o ese Leoleo.

Na taua atili e le ave ta’avale, na te le iloa poo fea e sau ai Godinet ma fualaau faasaina sa ia te ia, e leai fo’i ona iloa tele e faatatau ia Godinet ma lona olaga, pau le itu na te iloa, o ia o se tagata e faigofie ona faauo i ai se tagata.

Ina ua mae’a ona fesiligia e Leoleo le ali’i ave ta’avale, sa tuuina atu ai loa pepa sala i lona faafoeina lea o se ta’avale ae ua mae’a le aoga o le laisene. Na toe tatala le ave ta’avale i tua ina ua mae’a ona fesiligia o ia e Leoleo, ae taofia ai na o Godinet i le Toese i Tafuna e faatali ai le taimi e tula’i ai i luma o le Fa’amasinoga.

SOLITUALFONO MUAMUA

O le masina o Me o le 2018 na faasala ai e le Fa’amasinoga Maualuga ia Godinet e nofovaavaaia mo le 2 tausaga, ina ua ta’usala o ia i le solitulafono mama o lona taliaina lea o ni oloa na ave faagaoi e nisi tagata ma faatau atu ia te ia.

O se faalavelave na tula’i mai i le masina o Ianuari o le 2017 i Fagaima, na talepe ai e ni ali’i se to’alua se Faleoloa ae ave faagaoi le tele o oloa ma faatau solo i isi tagata. O nisi o ia oloa sa gaoia na faatau e le au gaoi ia Godinet.