Pago Pago - AMERIKA SAMOA

O se alii o loo nofovaavaaia mo le 5 tausaga e mafua mai i le faalavelave lea na ta’usala ai o ia e le Fa’amasinoga Maualuga i lona le usitaia o tulafono tau i Fualaau Faasaina a le teritori, ua toe aafia nei foi o ia i isi soliga tulafono mamafa e aofia ai le faaoolima ma le umia faasolitulafono o fualaau faasaina.

O tu’uaiga fou faasaga i le alii ua molia e aofia ai lona ulufale faamalosi i totonu o se fale ma faaoolima i le tamaitai sa avea ma ona to’alua faaipoipo, atoa ai ma lona faaoolima atu ai i se alii ua mafuta nei ma le tamaitai sa avea muamua ma ona to’alua.

[Talu ai puipuiga o le tulafono i mataupu e aafia ai sauaga i totonu o aiga, o le a le mafai ai ona faalauiloa suafa o i latou o loo aafia i lenei mataupu].

O le masina na te’a nei na tula’i ai le ua molia i luma o le Fa’amasinoga Faaitumalo mo le iloiloina o lana mataupu, ma faatulaga ai loa e le Fa’amasinoga le tupe e $25,000 e tatala ai o ia i tua. 

Afai ae tatala o ia i tua, e le mafai ona toe taumafai e faafesoota’i le tamaitai ma lana fanau o loo aafia i lenei mataupu, e le mafai fo’i ona ia toe ulufale i le fale o loo nonofo ai i latou, pe taumafai foi i soo se auala lava e saili se fesootaiga ma i latou.

E lua tagi ua faila e le malo faasaga i le alii ua molia.

I le tagi muamua, ua molia ai o ia i le moliga o le faaoolima i le tulaga lua e aofia ai sauaga i totonu o aiga; tasi le moliaga o le talepe fale i le tulaga lua, o solitulafono mamafa o le vaega D e mafai ona faasala ai se tasi i le Toese mo le umi e oo atu i le 5 tausaga, pe faasala foi i le salatupe e le silia i le $5,000, pe faasala foi i faasalaga uma ia e lua; atoa ai ma moliga mama o lona faia o gaioiga e ono lamatia ai le saogalemu o fanau laiti.

I le tagi lona lua, ua tu’uaia ai le ua molia i le moliaga o le umia faasolitulafono o vaega o le pauta faasaina o le aisa, faapea ai ma le moliaga o le umia faasolitulafono o le laau faasaina o le mariuana, o ni solitulafono mamafa e mafai ona faasala ai se tasi i le Toese mai le 5 e oo atu i le 15 tausaga, pe faasala foi i le salatupe e oo atu i le $20,000, poo le faasala foi i faasalaga uma ia e 2. 

TAGI A LE MALO

O lenei mataupu na tofu atu i le Ofisa o Leoleo i Tafuna ina ua talosagaina e se Tina se fesoasoani a Leoleo, e mafua mai i se faalavelave na tula’i mai i le fale o lana uo tama, lea na alu atu ai le alii na avea muamua ma ona to’alua ma faaoolima ia te ia i totonu o le fale o lana uo tama, ma fasi faatasi atu ai lava ma lana uo tala.

Na taua e le Tina lea i Leoleo lona fefe ma le popole ina ne’i tula’i mai se isi faalavelave e sili atu ona matuia, ona o lea ua folafola e le alii sa avea ma ona to’alua lona fasiotia o ia ma lana uo tama, i le mae’a ai lea ona ia fa’aaoga o se fasi paipa u’aiea e faaoo ai manu’a ia te i lava.

E lei umi se taimi na maua ai e Leoleo i Tafuna le valaau ae taunu’u loa le ta’avale Leoleo muamua lava i le nofoaga na alu atu ai le valaau ma maua ai loa le avanoa e faatalatalanoa ai e Leoleo le alii na manu’a, o ia fo’i lea e ana le fale na tula’i mai ai le faalavelave.

Na taua e le alii na aafia i lana faamatalaga i Leoleo e faapea, na faateia o ia ina ua ulufale faamalosi se tagata i totonu o lona fale pe tusa o le itula e 5:00 i le vaveao ma ia faaoolima i lana uo tamaitai faatoa tasi le masina talu ona la masani ma la mafuta, sosoo ai loa ma le aafia atu ai o ia.

Na taua e le alii na aafia i Leoleo e faapea, ua manino i lona mafaufau, o le alii lea na alu atu ma faatupu le vevesi, o le to’alua muamua lea o le tamaitai lea ua avea nei ma ana uo. E lagona lona faanoanoa i le auala na faatino ai e le tagata lea le solitulafono, e ala i le ulufale faamalosi i totonu o lona fale e aunoa ma se faaaanaga ma faaoolima i lana uo tamaitai faapea ai ma ia.

Ina ua fesiligia e Leoleo le alii na aafia e faamatala pe na faapefea ona tula’i mai le faalavelave, na tali le alii na aafia e faapea, o ia sa i totonu o lona potu o loo tau su’e lona miti afu e alu ai e tamo’e, ae o lana uo tamaitai o loo i luma o le potu malolo o lo o matamata lana TV.

Na faateia o ia ina ua ia faalogoina se pao leotele o se mea e sau mai le pito i tua o le fale, o le mafua’aga lea na vave ai lana tula’i ma tamoe i fafo o le potu e vaavaai poo ai lea e pao mai i tua o lona fale.

E fetaui le oso mai i fafo o le alii e ana le fale mai totonu o lona potu moe ae ona vaaia loa se alii o savali aga’i mai i le potu malolo o loo i ai lana uo tamaitai o loo matamata lana TV ma faaoolima loa ia te ia e aunoa ma se upu na gagana ai, e ala i lona titina o le ua o lana uo tamaitai ma tatu’i ona foliga.

Ina ua tu i luga lana uo tamaitai ma taumafai e sola ese mai i le alii lenei, na ia vaaia le tago o le alii lea i le fasi paipa uamea na alu atu ma ia faaoo ai manu’a i lona papatua ma lona ulu.

O le taimi lea na faasaga atu ai loa le alii lea ma fai atu ia te ia, poo le a lana mea ua fai i lona to’alua. Na tali le alii na aafia, o le tamaitai lea na ia faaoolima i ai o lana uo tamaitai, na te le i iloaina e fai sona aiga. 

O le mae’a ai ona fesiligia e Leoleo o le alii na aafia, na aga’i atu ai loa i le fale o le alii ua molia e tau saili mai o ia, peita’i e lei maua atu i ai le ua molia i lona fale. E 2 aso o taumafai Leoleo e saili le ua molia se’i fesiligia e tusa ai o lenei mataupu peita’i ua le iloa poo fea ua sola i ai o ia.

Ae i le tuana’i ai o aso e 3 talu ona mae’a le faalavelave, na talosagaina ai e se Tina mai le pito nu’u o Vaitogi le Ofisa o Leoleo mo se fesoasoani, ina ua faaoolima le alii sa avea ma ona to’alua ia te ia. 

Na vave ona taunu’u Leoleo i le nofoaga na tula’i mai ai le faalavelave na maua atu ai le Tina na talosagaina se fesoasoani, atoa ai ma se alii o loo i totonu o le fale, faatasi ai ma ni tamaitai laiti se to’a 5.

Na faailoa e le Tina i Leoleo, o ia lea na aafia i le faalavelave lea na tula’i mai i le fale o lana uo tama i le 3 aso talu ai, a’o lea fo’i ua toe aafia o ia ina ua alu atu le alii sa avea ma ona to’alua poo le Tama o lana fanau ma fasi o ia i le fale o lona aunt o loo nonofo ai ma lana fanau.

Na auina atu le Tina ma lana fanau i le Ofisa o Leoleo mo le faatalatalanoaina o le mataupu. Na taofia faapagota fo’i e Leoleo le ua molia ma auina atu foi i le Ofisa o Leoleo i Tafuna mo le fesiligia o ia e uiga i lenei mataupu. 

A o le i auina atu le ua molia i totonu o le ta’avale a Leoleo, na saili e Leoleo lona tino pe maua i ai ni aupega mo le saogalemu o alii Leoleo. I totonu o le taga o le ofu a le ua molia sa faia, na maua i ai e Leoleo se paipa tioata o loo i ai vaega o le pauta faasaina o le aisa, ma se pepa iila o loo i ai ni sikaleti mariuana se 2 ua mae’a ona taai.

Ina ua fesiligia e Leoleo le Tina na aafia, na ia taua ai e faapea, ua silia ma le tausaga talu ona la tete’e faaletulafono ma lona to’alua, peita’i e le misi le alu atu i le fale a lona aunt o loo faamautu ai ma lana fanau e asi atu lana fanau. E i ai taimi e faatonu ai e lona to’alua muamua o ia e aua ne’i toe mafuta atu i se isi alii ae ia nofo lelei e tausi le la fanau.

O le alii lea na faaoolima i ai le ua molia, e pei ona taua e le Tina na aafia i lana tagi i Leoleo, o lana uo fou lea ua atoa le masina talu ona la mafuta. O le 3 aso talu ai e pei ona faamatala e le Tina na aafia i Leoleo, na ulufale faamalosi ai le ua molia i totonu o le fale o lana uo ao la i ai ma faaoolima loa ia te i laua e ala i lona fa’aaogaina o se paipa u’amea e sasa ai lona tino ma lona ulu.

Na taua fo’i e le Tina na aafia le folafola e le ua molia o lona fasiotia o laua ma lana uo pe afai na te toe maua i laua o faia pea le la mafutaga lea. 

Ina ua fesiligia e Leoleo le alii ua molia e tusa ai o lenei mataupu, sa ia ioeina ai lona faaoolima i le Tina o lana fanau faapea ai ma le alii ua la mafuta nei. Sa ia faatoese i Leoleo e tusa ai o le solitulafono sa ia faia, e mafua mai ina ua vave lona ita. 

Sa ia faailoa i Leoleo, o fualaau faasaina na maua ia te ia, na faatau mai i lana uo i Fagatogo