Ads by Google Ads by Google

Toe aafia i le solitulafono mamafa alii e to’alua o loo nofovaavaaia


[ata: foa'i]
ausage@samoanews.com

Pago Pago - AMERIKA SAMOA

 

E to’alua ni ali’i na pu’e faapagota e Leoleo i le masina na te’a nei ina ua maua i ai fualaau faasaina o le aisa ma le mariuana. Na pu’e faapagota e Leoleo le to’atasi o i laua nei i lona le usitaia o poloaiga a le Fa’amasinoga, ae o le isi alii na pu’e e Leoleo e ala i le taofi e Leoleo o lana ta’avale i luga o le alatele i Futiga.

 

O i laua e to’alua ua molia i lenei mataupu e aofia ai Faalogo Tiliata ma Figao Kapeli. E eseese taimi na pu’e faapagota ai e Leoleo ia Tiliata ma Kapeli. O Tiliata na pu’e faapagota i le taimi a o paka lana ta’avale i luma o se Faleoloa i Tafuna ae o Kapeli na pu’e faapagota ina ua taofi e Leoleo lana ta’avale i Futiga.

 

Na avea le le usitaia e Tiliata o tuutuuga a le Fa’amasinoga ma auala na tuuina atu ai loa e le Faamasinoga sana poloaiga e sailia ai le fale ma le ta’avale a Tiliata, po o ia umia ni fualaau fa’asaina poo aupega mata’utia.

 

Ina ua faataunuu e Leoleo le poloaiga a le Faamasinoga, na maua ai loa e Leoleo fualaau faasaina ia Tiliata. Na maua atu ai fo’i ma fualaau fa’asaina ia Kapeli ina ua taofi e Leoleo lana ta’avale ae maua ai fualaau fa’asaina i le taga o lona ofu.

 

O le 2 vaiaso talu ai na tutula’i ai Tiliata ma Kapeli i luma o le Fa’amasinoga mo le la ulua’i iloiloga. 

 

O lo o molia e le malo ia Tiliata i le moliaga e tasi o le umia faasolitulafono o vaega o le pauta faasaina o le aisa; umia faasolitulafono le pauta o le aisa ma le faamoemoe e tulei ma faatau atu i isi tagata; tasi le moliaga o le umia faasolitulafono o vaega o le laau faasaina o le mariuana; o ni solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e mafai ona oo atu i le $20,000.

 

E $20,000 le vaega tupe lea ua fa’atulaga e totogi ona mafai lea ona tatala Tiliata i tua mai le Toese i Tafuna. 

 

Afai ae tatala o ia i tua, e le mafai ona ia toe taumafai e faafesootai molimau a le malo, pe taumafai fo’i e sola ese ma le atunu’u, ae ua poloaina o ia ina ia usita’i i tulafono uma a le malo ma auai i soo se taimi e valaau ai lana mataupu.

 

O le susuga a Kapeli o lo o molia i le moliaga o le umia faasolitulafono o vaega o le pauta faasaina o le aisa, o se solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e oo atu i le $20,000.

 

E $5,000 le tinoitupe lea ua faatulaga e tatala ai i tua Kapeli. Afai ae tatala o ia i tua, ua poloaina o ia e le Fa’amasinoga ina ia aua ne’i ona toe tagofia le ‘ava malosi poo ni fualaau faasaina, a ia avea o ia ma tagatanu’u lelei e tausisi i tulafono uma a le malo.

 

TAGI FAASAGA IA TILIATA

 

O le taeao o le aso 20 o Oketopa pe tusa o le 10:30 a o galulue Leoleo Suesue e tau saili le ta’avale a Tiliata lea o loo taua i totonu o le poloaiga a le Fa’amasinoga e tatau ona saili pe maua i ai ni fualaau fa’asaina, na latou maua atu ai le ta’avale o loo paka i luma o se Faleoloa Asia i Tafuna.

 

Na aga’i atu Leoleo i le vaega o loo paka ai le ta’avale ma latou iloa ai ni alii se to’alua o loo i totonu o le ta’avale. O le alii ave ta’avale na mulimuli ane iloa, o ia lea o Faalogo Tiliata, ma lana uo o loo saofa’i i le nofoa o le pasese. O loo taua fo’i i totonu o le tagi a le malo le igoa o le uo a Tiliata sa i ai i totonu o le ta’avale i le aso lea.

 

Na faailoa e Leoleo ia Tiliata le poloaiga a le Fa’amasinoga e saili ai lana ta’avale, o lona fale ma lona tagata, ma sa malie fo’i i ai le ua molia. Na faatonu e Leoleo Tiliata ma lana uo e o i fafo ma le ta’avale ae se’i amata le latou galuega.

 

Na saili e Leoleo le tino o le uo a Tiliata, e leai ni fualaau faasaina poo ni a’upega mata’utia na maua ai. Ae ina ua saili le tino o Tiliata, sa maua ai se silaleti mariuana e tasi i le taga pito i tua o lona ofu sa faia. O le taimi lea na musumusu atu ai Tiliata i le alii Leoleo na sailia lona tino, pe mafai ona ia fesoasoani atu ia te ia, ae na te avatu se taui lelei mo ia.

 

Na mae’a ona saili le tino o Tiliata, ona faasolo atu ai lea i totonu o lana ta’avale, ma maua ai e Leoleo se tama’i ato lanu uliuli o loo i ai pepa iila laiti e 4 o loo i ai vaega o le pauta paepae. Sa maua ai fo’i straws e 4 ua uma ona ta tipi tulimanu ua mae’a ona utu ai i totonu vaega o le pauta lanu pa’epa’e. Na maua ai fo’i e Leoleo i totonu o le ta’avale le tele o pepa iila laiti e masani ona fa’aaoga e utu i ai le aisa, faapea ai ma se tinoitupe e $730.

 

Na faia se suega i mea uma sa maua i totonu o le ta’avale faapea ai ma le tino o Tiliata ma faamaonia ai, o vaega ia o le pauta faasaina o le aisa faapea ai ma le laau faasaina o le mariuana.

 

A o le i tuuina atu e Leoleo le uo a Tiliata sa i totonu o le ta’avale e fo’i i lona aiga, ina ua mama o ia ma le taimi na sailia ai o ia e Leoleo, na maua le avanoa e fesiligia ai o ia e Leoleo e tusa ai o le mafua’aga na i ai i totonu o le ta’avale.

 

Na taua e le uo a Tiliata i Leoleo e fa’apea, na alu atu Tiliata e piki mai o ia e fesoasoani i le faapipi’iina o uaea eletise o le galuega o le fale a le Tina a Tiliata o loo faia i Vailoa. I le taimi na ulufale ai i totonu o le ta’avale, sa ia faalogoina ai le malosi o le manogi mariuana, ae ina ua ia fesiligia Tiliata poo a ia mea e manogi i totonu o lana ta’avale, na ata Tiliata ma faapea atu, “o mea e ave ma la’u aufaigaluega”.

 

Na saili e Leoleo le fale a le ua molia ma maua ai isi vaega o fualaau fa’asaina o le aisa. E leai ni fualaau faasaina na maua i totonu o le isi ta’avale a le ua molia sa paka i luma o lona fale.

 

Na faailoa atili e le uo a Tiliata i Leoleo e fa’apea, ao le i taofia i laua e Leoleo, sa umi se taimi o fai le la tietiega i luga o le alatele, ina ua la fo’i mai i Vaitogi mai le momoliina atu o fualaau fa’asaina i se tasi o alii e masani ai Tiliata. E $150 le tau o fualaau faasaina na faatau e le alii lea i Vaitogi.

 

Na taua atili e le molimau le tele o taimi e masani ai ona alu i le fale a Tiliata mo le faatinoina o ni galuega mo ia, na te vaaia ai fualaau faasaina i totonu o lana ta’avale poo totonu fo’i o le fale.

 

O le tausaga e 2013 na ta’usala ai e le Fa’amasinoga Maualuga ia Tiliata i le solitulafono o le umia faasolitulafono o vaega o le pauta fa’asaina o le aisa.

 

TAGI FAASAGA IA KAPELI

 

Pe tusa o le itula e 4:45 i le afiafi o le aso 20 o Oketopa, na taofia ai e Leoleo se pikiapu lanu  i Fagatogo ina ua faamaonia, o le ta’avale lea a le alii o loo latou tau sailia, le susuga a Figao Kapeli. Na taofi e Leoleo le ta’avale ma iloa ai, e na o le ave ta’avale lava o loo i totonu o le ta’avale, o ia lea o Kapeli.

 

Na faailoa e Leoleo ia Kapeli le mafua’aga o le taofi o lana ta’avale, ona o se poloaiga mai le Fa’amasinoga e saili ai lona tagata ma lana ta’avale mo fualaau faasaina. E ui i foliga fefe ma le te’i o Kapeli, ae na malie lava e tu’u le avanoa i Leoleo e faatino ai le latou galuega.

 

I totonu o le taga pito i tua o le ofu a Kapeli sa laei, na maua ai e Leoleo se pepa iila laiti o lo o i ai vaega o le pauta pa’epa’e o le aisa i totonu, faapea ai ma se paipa tioata i le isi taga o lona ofu o loo i ai fo’i vaega o le pauta faasaina o le aisa.

 

Na taua e Kapeli i Leoleo, o fualaau faasaina sa maua ia te ia na aumai i lana uo e nofo i Vaitogi. Na musu Kapeli e ta’u i Leoleo le igoa o lana uo. Sa ia taua atili e fa’apea, ua silia i le 4 masina talu ona ia tagofia fualaau faasaina, ma, e mafua ona ia faaaogaina ona e maua ai lona malosi e fa’atino ai ana galuega i lana fa’atoaga.