Ads by Google Ads by Google

Toe aafia i le tulafono le ali’i na ta’usala muamua i le gaoi ma le talepe fale


[ata: SN]
ausage@samoanews.com

Pago Pago - AMERIKA SAMOA

 

O le ali’i lea na ta’usala e le Fa’amasinoga Maualuga i le 3 tausaga talu ai  le gaoi ma le talepe fale, ua toe taofia nei o ia i le Toese i Tafuna ma molia i lona umia faasolitulafono o fualaau faasaina, e mafua mai i le faalavelave lea na taofi ai e Leoleo lana ta’avale i le alu soona saoasaoa ae maua ai fualaau fa’asaina.

 

O le masina na te’a nei na tula’i ai Filisounu’u Albert  i luma o le Fa’amasinoga Faaitumalo. Ua molia nei o ia i le solitulafono o le umia faasolitulafono o vaega o le pauta faasaina o le aisa, o se solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e mafai ona oo atu i le $20,000, poo le faasala foi i faasalaga uma ia e lua.

 

E $5,000 le vaega tupe lea ua fa’atulaga e le Faamasinoga e totogi ona faatoa mafai lea ona tatala Godinet i tua mai le Toese i Tafuna.

 

Afai ae tatala Albert i tua, e le mafai ona ia toe taumafai e faafesootai tagata na aafia i lana gaioiga poo nisi fo’i o lona aiga, a ia avea o ia ma tagata e usita’i ma tausisi i tulafono uma a le malo i soo se taimi.

 

TAGI A LE MALO

 

O le mataupu e pei ona molia ai le susuga a Albert na alia’e mai i le taeao o le aso 27 o Tesema, 2021 ina ua taofi e Leoleo se pikiapu i luma o se Faleoloa i Iliili ina ua iloa e Leoleo ua leva ona mae’a le aoga o le laisene e faataga ai lea taavale ona fealua’i i luga o le alatele. 

 

E to’atolu ali’i sa i totonu o le ta’avale i le taimi na taofi ai e Leoleo. O i latou nei e aofia ai le ali’i sa faafoeina le ta’avale, o le susuga a Albert, faapea ai ma le isi ali’i e 18 tausaga le matua.

 

A o talanoa Leoleo i le ave ta’avale, sa maitauina e le isi Leoleo le minoi solo o le susuga a Albert ma taumafai e tago i totonu o le taga o lona ofu o lo o fai. Sa vaaia fo’i e Leoleo le faasaga o le susuga a Albert i le alii sa i le nofoa pito i tua o le taavale ma talanoa i ai, ae le i lagona atu ana tala sa faia. Na i’u lava i le talosaga o le susuga a Albert i le Leoleo e faataga o ia e alu ona e i ai lana mataupu o lo o fia vave alu i ai.

 

Na faailoa e le Leoleo ia Albert, e le mafai ona alu ona o lo o i ai le faaletonu i le ta’avale, ma, e tatau fo’i ona suesueina i laua ina ia tusa ai ma auala e faatino ai e Leoleo puipuiga tau solitulafono i luga o le alatele. 

 

Na taofia e Leoleo le ta’avale ma toso loa aga’i i le Ofisa o Leoleo i Tafuna ona ua mae’a le aoga o le laisene e faataga ai ona fealua’i. Na avatu faatasi ai fo’i ma Albert ma le ave ta’avale i le Ofisa o Leoleo i Tafuna mo suesuega. 

 

A o le i auina atu le susuga a Albert ma le ave ta’avale i le Ofisa o Leoleo i Tafuna, na faia se suega faapitoa i o la tino ina ia mautinoa la te le o tauaveina ni aupega poo ni fualaau fa’asaina.

 

E leai ni aupega poo ni fualaau faasaina na maua i le ave ta’avale, ae ina ua sailia e Leoleo le tino o le susuga a Albert na maua ai se paipa tioata o lo o i ai vaega o le pauta faasaina i le taga o lona ofu sa fai. Sa maua ai fo’i pepa iila e faaaoga e utu ai le aisa ma faatau atu, faapea ai ma cut-up straws ua mae’a ona ta tipi tulimanu e masani ona fa’aaoga e utu ai vaega o le pauta o le aisa.

 

E eseese potu na ave i ai le susuga a Albert ma le ave ta’avale i le taimi na fesiligia ai i laua e Leoleo e tusa ai o lenei mataupu.

 

Ina ua fesiligia e Leoleo le susuga a Aleber e uiga i lenei mataupu, sa ia taua ai e faapea, o ia sa nofonofo i luma o se Faleoloa i Fagaima ae ona vaaia loa le ta’avale pikiapu a lana uo o alu ane i le alatele, o lea na ia taofia ai loa le ta’avale ma amata ai loa le la ti’eti’ega. Sa ia taua i Leoleo, na te le i iloaina ua mae’a le aoga o le laisene o le ta’avale o lo o la tietie ai.

 

Sa alu le la ti’eti’ega i Vaitogi, o Futiga, ma faasolo ane ai i Malaeloa ma sau ai i luma o le faleoloa i Iliili lea na taofia ai loa le latou ta’avale e Leoleo.

 

A o alu le la ti’eti’ega, sa taua atili e le ali’i ua molia lona fai i le ave ta’avale pe mafai ona la ag’i atu i le fale o le isi ana uo se’i piki mai ai fafie mo lana suavai o le aso Sa e sosoo ai. Na la taunuu i le nofoaga e piki mai ai fafie ma meamata mo le umu, ma ia vaaia ai ua mae’a ona tu’u i totonu o ato. 

 

Sa lilo i loa manatu o loo i ai ni fualaau faasaina i totonu o le ato sa i ai meamata o ulu ma fa’i, ae ina ua tago e la’u i fafo ulu, ae tau ai i le tama’i ato uliuli o loo i ai fualaau faasaina. O lea na ia tago ai loa ma tu’u fualaau faasaina i totonu o le taga o lona ofu.

 

 Ae ina oso i totonu o le ta’avale, sa ia faailoa i le ave ta’avale mea sa ia maua, ae na fai atu le ave ta’avale ia te ia, e taofi se’i oo i le fale ona vaelua lea ma laua. Na taua e Albert i Leoleo e faapea, sa lilo i lona manatu e taofi e Leoleo le la ta’avale i le aso lea.

 

Na matua tete’e malosi le ali’i ua molia e le o ia e ana le paipa tioata lea na maua i ai vaega o le pauta faasaina o le aisa.

 

Na maua le avanoa e fesiligia ai e Leoleo le ali’i ave ta’avale i le mafua’aga na fealua’i ai le ta’avale i luga o le alatele ae ua leva ona mae’a le aoga o le laisene. Na faatoese le ave ta’avale i Leoleo ona o le tulaga faaletonu na tula’i mai i le ta’avale. Sa ia taua e fa’apea, na te lei iloa ua mae’a le aoga o le laisene o le ta’avale, ona o le ta’avale a lona uncle e fai lona Fale Inisinia lea na alu atu ai.

 

Na teena e le ave ta’avale le faamatalaga a le ali’i ua molia fai mai o laua na tietie solo i le tele o nofoaga ma faai’u ai loa i le fale o lana uo e piki mai fafie ma meamata. Na taua e le ave ta’avale i Leoleo, e le masani tele i le ali’i ua molia nei, ae sa avea le Fale Inisinia a lona uncle lea e masani ona alu e fesoasoani ai ma auala na la masani ai loa ma le ua molia pe tusa o le 2 aso talu ai. 

 

A o alu le la ta’avale, sa talanoa atu le ua molia ia te ia pe mana’o i mea ula mo ia, ae sa ia talu i ai, “ou te le faia na mea”. Na te le i iloaina o lo o i ai ni fualaau faasaina ia Albert i le taimi na la ti’eti’e ai, ae na ia masalosalo ina ua taofi e Leoleo le la ta’avale, ae faafuase’i loa ona fai atu Albert ia te ia, e vaai se vaega o le taavale e nana ai le paipa, pepa iila ma straws o lo o i totonu o lana taga, peita’i sa ia fai i ai, e tu’u pea ia te ia se’i o ese Leoleo.

 

Na taua atili e le ave ta’avale, na te le iloa poo fea e sau ai Albert ma fualaau faasaina sa ia te ia, e leai fo’i ona iloa tele e faatatau ia Albert ma lona olaga, pau le itu na te iloa, o ia o se tagata e faigofie ona faauo i ai se tagata.

 

Ina ua mae’a ona fesiligia e Leoleo le ali’i ave ta’avale, sa tuuina atu ai loa pepa sala i lona faafoeina lea o se ta’avale ae ua mae’a le aoga o le laisene. Na toe tatala le ave ta’avale i tua ina ua mae’a ona fesiligia o ia e Leoleo, ae taofia ai na o Albert i le Toese i Tafuna e faatali ai le taimi e tula’i ai i luma o le Fa’amasinoga.

 

SOLITUALFONO MUAMUA

 

O le masina o Me o le 2017 na faasala ai e le Fa’amasinoga Maualuga ia Albert e nofovaavaaia mo le 5 tausaga, ina ua ta’usala o ia i solitulafono mamafa e 2 o le gaoi ma le talepe fale, e mafua mai i le faalavelave lea na la osofaia ai ma sana uo se faleoloa.

 

O se faalavelave na tula’i mai i le masina o Ianuari o le 2016, na osofa’i ai e le ua molia ma sana uo se faleoloa ae ave faagaoi oloa sa i ai i totonu. E faalua ono osofa’i e le ua molia ma lana uo lea faleoloa. 

 

O le talia ai e le Faamasinoga o le maliliega na sainia e Albert ma le malo, na solofua ai loa isi moliaga mamafa e 2 sa totoe ai i le tagi a le malo. O se tasi o tuutuuga o le nofovaavaaia a le ua molia o lona tuliina lea o masina e 28 i le Toese i Tafuna.