Ads by Google Ads by Google

Toe aafia i le tulafono le ali’i o lo o nofovaavaaia i le gaoi ma le talepe fale


[ata: foa'i]
ausage@samoanews.com

Pago Pago, AMERIKA SAMOA

 

O se ali’i o lo o nofovaavaaia mo le 7 tausaga talu ai le fa’alavelave lea na la osofaia ai ma se isi ali’i ni fale o ni aiga faapea ai ma se Faleoloa i le 2017, ua toe aafia nei fo’i o ia i le tulafono, ina ua tu’uaia o ia i lona umia fa’asolitulafono o fualaau fa’asaina.

 

O le susuga a Kalolo Brown, lea e fa’apea mai fa’amaumauga a le malo e le fou lona tula’i i luma o le Fa’amasinoga, na toe tula’i i le vaiaso na te’a nei mo lana ulua’i iloiloga.

 

E 2 tagi ua faila e le malo fa’asaga ia Brown. I le tagi muamua, o lo o tu’uaia ai o ia i le moliaga mamafa o lona umia fa’asolitulafono o vaega o le laau fa’asaina o le mariuana ma le fa’amoemoe e tulei ma fa’atau atu i isi tagata.

 

Ae i le tagi lona lua, o lo o tu’uaia ai o ia e le malo i moliaga mamafa e 2 o lona umia faasolitulafono o vaega o le pauta fa’asaina o le aisa, faapea ai ma le moliaga o lona umia faasolitulafono o vaega o le laau fa’asaina o le mariuana.

 

E $2,000 le tino i tupe lea ua fa’atulaga e le Fa’amasinoga e tatala ai Brown mo le tagi muamua fa’asaga ia te ia, ae $5,000 le tupe e tatala ai o ia mai le tagi lona lua a le malo.

 

Na talosaga le loia a Brown, le susuga i le alii Loia Fautua lagolago ia Ryan Anderson i le fa’amasinoga mo se avanoa e fa’aitiitia ai i le $2,000 le tupe e tatala ai Brown mai ana mataupu uma e lua.

 

Na taua e Anderson e fa’apea, o Brown, o se tagatanu’u o Amerika Samoa ua leva ona tautua i le malo e ala i le totogiina o lana lafoga, o se Tama fo’i e to’a 3 ona ‘alo laiti, o lona aiga lava Amerika Samoa, e leai se isi atunu’u e ono sola i ai o ia.

 

Saunoa atili Anderson e faapea, afai ae talia le talosaga ma faaitiitia le tupe e tatala ai Brown i le $2,000, o le a ia fautuaina o ia ina ia mautinoa e auai i soo se taimi e valaau ai lana mataupu.

 

Na tete’e malosi le loia a le malo ia Robert Morrison III i le talosaga a le itu tete’e. Na taua e le loia a le malo e fa’apea, o moliaga ia ua tuuaia ai Brown, e mafai ona faasala ai o ia i le salatupe e oo atu i le $20,000. Sa ia taua fo’i e fa’apea, o lo o nofovaavaaia le ua molia a o lea fo’i ua toe molia mai i le isi fo’i solitulafono mamafa, ma ua atagia mai ai lona le usitaia o poloaiga a le fa’amasinoga.

 

Na talia e le afioga i le ali’i Fa’amasino le fa’afinauga a le malo, ma ia fa’atumauina ai pea lea o tupe ua mae’a ona fa’atulaga e tatala ai Brown.

 

Afai ae mafai ona totogi e le ua molia vaega tupe e pei ona fa’atulaga e le fa’amasinoga, ua fautuaina o ia ina ia auai i soo se taimi e valaau ai lana mataupu, fesoota’i vavalalata ma lana loia, aua fo’i ne’i ona toe solia se tulafono a le malo.

 

Ua poloaina fo’i e le Fa’amasinoga le ua molia e aua ne’i ona taumafai e faafesoota’i molimau a le malo, e aofia ai ma le ulugali’i lea na logoina Leoleo e tusa ai o le mataupu e pei ona molia ai nei o ia.

 

Ina ua aga’i atu le Leoleo e faa saini Brown i kopi o tagi a le malo fa’asaga ia te ia, sa musu le ua molia e saini lona aao. Sa ia fa’ailoa i le Leoleo, e mafua ona ia le sainia pepa sa tuuina atu ia te ia, ona e le moni tu’uaiga ua faia fa’asaga ia te ia.

 

E pei ona taua e le malo i le latou tagi e fa’apea, i le 3 vaiaso talu ai na faafesoota’i ai e se Tina e 35 tausaga le matua le Ofisa o Leoleo mo se fesoasoani, ona o sikaleti mariuana e 2 sa ia maua i totonu o le tago o le ofuvae faigaluega a lona to’alua.

 

Na taua e le Tina lea i Leoleo le uma o lona onosa’i i le amio a lona to’alua o lo o faia pea, o le fa’aalu lea o tupe o lona totogi i vaiaso totogi uma lava e fa’atau mai ai fualaau fa’asaina mai se tasi o alii o lo o faia le amio o le tulei o fualaau fa’asaina i tagata e igoa ia “NASH”.

 

O NASH e pei ona taua e le malo, o le isi lea igoa o le susuga a Kalolo Brown, le ua tu’uaia nei i lenei mataupu.

 

Na taua atili e le Tina i Leoleo e fa’apea, ina ua ia fesiligia lona to’alua poo fea e aumai ai sikaleti mariuana sa maua i lana taga, ae na tali lona to’alua, sa fa’atau mai i lana uo ave taxi o NASH.

 

O le 2 vaiaso talu ai na loka ai e Leoleo le to’alua o le Tina lea ma tu’uaia i le fa’atupu vevesi i totonu o le la aiga. O lea fa’alavelave na mafua mai ina ua maua e le Tama le tala, ua mae’a ona fa’afesoota’i e lona to’alua Leoleo e tusa ai o mariuana na ia fa’atauina mai ia NASH.

 

I le vaiaso na te’a nei a o pisi Leoleo e tau saili poo fea e nofoaga latou te maua i ai Brown, na fa’afuase’i ai ona latou vaaia le ua molia o nofonofo mai ma nisi o ali’i i luma o se Faleoloa i Tafuna. Na ave loa i ai Leoleo ma fa’ailoa ia Brown le tusi saisai mai le fa’amasinoga e pu’e fa’apagota ai o ia, ona o le mataupu e pei ona fa’ailoa atu e le Tina ia te ia.

 

A o le i auina atu Brown i totonu o le taavale a Leoleo, sa faia muamua se siaki faapitoa i lona tino ina ia mautinoa ai na te le o umia ni a’upega poo ni fualaau fa’asaina.

 

I le taimi na siaki ai e Leoleo le tino a le ua molia, sa latou maua ai se tama’i taga pepa iila o lo o i ai ni sikaleti mariuana se 3 ua uma ona taai i le isi taga o lona ofuvae sa faia, ae o le isi taga sa maua i ai se paipa tioata e fa’aaoga e ula ai le aisa, lea fo’i o lo o i ai vaega o le pauta oona o le aisa.

 

Na faia se suega i fualaau fa’asaina sa maua i le tino o Brown ma faamaonia ai, o vaega ia o fualaau fa’asaina o le mariuana ma le aisa.

 

Ina ua fesiligia e Leoleo ia Brown mo ana fa’amatalaga, sa matua teena e le ua molia le faia o sana fa’amatalaga i Leoleo. Sa ia faailoa i Leoleo, e le mafai ona faia sana fa’amatalaga se’i vagana ua talanoa i lana loia fautua.

 

Sa ia taua atili fo’i i Leoleo, e leai se aoga e toe tau faia ai sana fa’amatalaga, o lea ua maua o ia faapea ai ma fualaau fa’asaina i lona tino.

 

Ina ua fesiligia o ia e Leoleo pe moni tuuaiga sa ia fa’atauina atu fualaau fa’asaina i ni isi o tagata, na tali le ua molia, e le moni na tu’uaiga, na te le i fa’atauina atu fo’i ni fualaau fa’asaina i ni tagata lautele.

 

O le tausaga e 2017 na fa’asala ai e le Fa’amasinoga Maualuga ia Brown faatasi ai ma se isi ali’i talavou e nofosala i le toese i Tafuna mo le 28 masina, o se tasi lea o tuutuuga o lana nofovaavaaia e 7 tausaga, ina ua ta’usala o ia i le moliaga o le talepe fale i le tulaga muamua ma le gaoi.

 

O le mea sa tupu na mafua ai ona nofosala le ua molia, na la osofaia ma se isi ali’i talavou ni fale o ni aiga se to’alua faapea ai ma se Faleoloa i Tafuna, ma gaoi mai ai le tele o meatotino ma oloa sa le mafai ona toe maua e aiga ma le Faleoloa.

 

O ni isi o oloa sa gaoia e aofia ai lavalava, pea seevae, filifili, uati, telefoni ma ni laptops se 2.

 

O le mafuaaga na maua ai e Leoleo i laua nei, ina ua vaaia e le Tama e ana le isi fale na osofaia le mitiafu a lona afafine o loo ofu atu ai se isi tama’ita’i o le latou pitonu’u. Ina ua fesili le Tama lea i le tama’ita’i poo fea na te aumaia ai le ofu o loo ia laeiina, ae na tali le tama’ita’i, o le ofu na aumai i lona tuagane. 

 

O le tuagane a le tama’ita’i lea, o ia lea na molia fa’atasi ma Brown i le talepeina o fale o aiga.

 

O le mafua’aga lea na tofu atu ai loa le mataupu i Leoleo, ma i’u ina molia ma ta’usala ai Brown ma lana uo.

 

O le vaiaso fou lea ua faatulaga e toe tula’i ai le ua molia i luma o le Faamasinoga Maualuga mo sana iloiloga faapitoa, i le mae’a ai lea ona faila e le Ofisa Nofovaavaaia o se talosaga i le Faamasinoga e faaleaoga poloaiga o le nofovaavaaia, ae faatonu loa le ua molia e tuli le faasalaga faa falepuipui na faamalumalu mai le mataupu na ta’usala ai o ia i le talepe fale ma le gaoi i le tolu tausaga talu ai.