Ads by Google Ads by Google

Toe aafia i le tulafono se alii o loo nofovaavaaia i fualaau faasaina


[ata: SN]
ausage@samoanews.com

Pago Pago, AMERIKA SAMOA

 

O se ali’i mai Samoa o loo nofovaavaaia mo le 5 tausaga e mafua mai i le umia faasolitulafono o fualaau faasaina, na pu’e faapagota e Leoleo i le masina na te’a nei ona o tu’uaiga i lona fa’aaoga lea o se u’amea e faaoo ai manu’a i lona tuaoi. Ae ina ua pue faapagota e Leoleo le ua molia, na maua i ai fualaau faasaina ia te ia faapea ai laavale.

 

O le masina na te’a nei na tula’i ai Aleki Vaifou i luma o le Faamasinoga Faaitumalo mo lana ulua’i tula’i. 

 

Ua molia nei o ia i le moliaga o le umia faasolitulafono o vaega o le pauta faasaina o le aisa; tasi le moliaga o le umia faasolitulafono o le pauta o le aisa ma le fa’amoemoe e tulei ma faatau atu i isi tagata; tasi le moliaga o le umia faasolitulafono o vaega o le mariuana; tasi le moliaga o le umia faasolitulafono o mariuana ma le faamoemoe e tulei ma faatau atu i isi tagata; o ni solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e oo atu i le $20,000, poo le faasala foi i faasalaga uma ia e 2; faapea ai ma isi moliaga e pei o le faaoolima i le tulaga lua; faaleaga meatotino i le tulaga muamua; tua fua i le fale ma le fanua o le isi tagata, atoa ai ma le faatupu vevesi i nofoaga faitele.

 

E $15,000 lea ua faatulaga e le Faamasinoga e tatala ai i tua Vaifou.

 

Afai ae tatala o ia i tua, e le mafai ona ia toe taumafai e faafesoota’i le na aafia i lenei mataupu poo nisi o lona aiga i soo se auala. E le mafai foi ona ia toe alu i le fale ma le nofoaga na tula’i mai ai le fa’alavelave, a ia avea o ia ma tagatanu’u lelei e tausi i tulafono a le malo i taimi uma, ma ia auai i soo se taimi e valaau ai lana mataupu.

 

TAGI A LE MALO

 

O le po o le aso 23 o Setema, 2021 na faafesootai ai e se Tina mai Ottoville le Ofisa o Leoleo i Tafuna mo se fesoasoani, ona o lana tama e 29 tausaga le matua na manu’a ina ua faaoolima i ai se ali’i o le latou tuaoi e ala i lona fa’aaoga o se uamea e faaoo ai manu’a ia te ia. Na taua atili e le Tina na ia ripotia lenei mataupu i Leoleo e faapea, o le ali’i o loo masalomia i lenei mataupu, o le susuga lea a Aleki Vaifou, o ia o se uo mamae a lana tama ua manu’a, e le o manino fo’i i le latou aiga le mafua’aga o le faalavelave.

 

E to’atele Leoleo na tali atu i le valaau ma maua ai loa le avanoa e talanoa atu ai i le ali’i na aafia ma lona aiga e tusa ai o lenei fa’alavelave. Na muamua lava saili e Leoleo le nofoaga atoa mo le tau sailia o le ali’i o loo masalomia na faatinoina lenei fa’alavelave, peita’i o faamatalaga mai molimau faapea ai ma tagata o le aiga o le ali’i na aafia na faamaonia ai le sola ese o le ali’i o Vaifou mai le nofoaga na tula’i mai ai le fa’alavelave ina ua mae’a ona ia faaoolima i le ali’i na a’afia. 

 

O le tulaga matuia i manu’a o le ali’i na aafia  na mafua ai loa ona talosagaina se fesoasoani mai le Vaega a le EMS mo le faia o ni togafitiga mo ia atoa ai ma le auina atu o ia i le Falema’i o le LBJ mo nisi togafitiga.

 

Na taua e le Tina na ripotia lenei faalavelave i Leoleo e faapea, o ia, o lona to’alua ma le la fanau sa i totonu o le fale i le taimi o le afiafi, ae o lona nephew na aafia sa i le pito i tua o le fale. E le i leva ona mae’a le faigalotu o le afiafi ae ona vaaia moli o se ta’avale ua afe atu i le latou fale, ma sulugia ai le isi itu o le fale.

 

E le i umi se taimi ae ona faalogoina loa se tagata ua valaau atu i le igoa o lona nephew. Sa ia lagona le leo o loo valaau ma ia iloa ai, o le leo lea o le ali’i o Vaifou. E masani i le leo o Vaifou ona ua tele taimi e alu atu ai i le latou fale ma latou tafafao ai. Sa ia vaaia lona nephew ua savali i fafo ma le fale ma aga’i atu loa i le pito i luma o le fale o loo sau ai le valaau.

 

Na taua e le Tina i Leoleo le leai o sona manatu e ono tula’i mai se fa’alavelave, peita’i na faateia o ia ina ua tamo’e atu lana tama teine e 18 tausaga le matua ma tagi ma valaau atu ia te ia e vili Leoleo o Tai ua manu’a na faapo e Vaifou i le u’amea. Na toe valaau atu fo’i lana tama teine ia te ia e sili le EMS e ave ai Tai i le falema’i ona e matuia le manu’a o loo aafia ai lona ulu.

 

Na tula’i le Tina ma savali atu loa i fafo i le vaega o loo tula’i mai ai le fa’alavelave i lona fia manino lelei i le mea ua tupu. E fetaui lava le taunuu atu o le Tina i fafo o le fale ae faapea loa ma le tala a Vaifou, “Aua ne’i toe faia lau amio lea o lou faia o ni faamatalaga le sa’o faasaga ia te a’u, aua o le isi taimi e te toe faia ai faamatalaga faapea, ona sili atu loa lea o se isi mea e oo atu ia te oe.”

 

Na mae’a loa le faamatalaga lea a Vaifou, tago loa ua peti le faitoto’a o le ta’avale a le aiga o le ua molia i le u’amea sa uu i lona lima, ma pu ai le faitoto’a o le ta’avale. Na ona uma lava ona faaleaga e Vaifou o le ta’avale, liliu loa ma alu i le atoa, ae o le taimi lea na alu atu ai loa le aunty ma fesoasoani i lona nephew ma ona manu’a.

 

Na taua e le ali’i na aafia i Leoleo e faapea, i po e 2 ua tuana’i atu ao lei tula’i mai le faalavelave e pei ona aafia ai o ia, na faia ai se latou fiafia i le fale o Vaifou, o le fiafia mo le aso fanau o se tasi o a latou uo. O Vaifou, na te faaigoaina o se tasi o ana uo mamae lava i lona olaga, e pei fo’i laua o se uso i le tele o aso.

 

Ina ua mae’a le latou fiafia i le po lea, na latou taape fiafia e aunoa ma se faaletonu na tula’i mai. Sa la toe talanoa fo’i ma Vaifou i luga o le telefoni i le taeao na sosoo ai, ma toe faamanatu mea sa tutupu i le latou mafutaga i le po ua mavae.

 

Ae o le afiafi na tula’i mai ai le faalavelave, na faateia ai o ia ina ua valaau atu Vaifou i lona igoa ao fai lana telefoni i le pito i tua o le latou fale. Na mae’a lana telefoni ona savali mai loa lea i fafo i le vaega o loo tu atu ai Vaifou e aunoa ma lona iloa o se mea o le a tupu.

 

Na taua e le ali’i na aafia le faateia o ia ina ua ia vaaia Vaifou o loo tu mai ma se uamea i lona lima. Na fesili atu Vaifou ia te ia e faatatau i tala ua ia alu ma faasalalau o ia (Vaifou) o loo tuleiina fualaau faasaina i totonu o le latou pitonu’u. A o taumafai le alii na aafia e tali atu ia Vaifou, na faafuase’i ona osofa’i e Vaifou o ia e ala i lona tu’iina o ona foliga ma palasi ai i lalo.

 

Na kiki e le ua molia lona papatua ma lona itu ma ia lagona ai le tau puni o lana manava. A o taatia i lalo, na faateia o ia ina ua ta e le ua molia lona ulu i le uamea ma ia faalogoina ai le tafe mai o le toto i ona foliga. Na ia valaau atu ia Vaifou e soia ae sa faaauau lava ona faaoolima Vaifou ia te ia. O lona popole ina ne’i uma atu ai ma lona ola i gaioiga a Vaifou, na tu malosi ai loa i luga ma tamo’e i le atoa ae fetaui loa fo’i ma le taunu’u atu o lona aunty ma tuli ese Vaifou.

 

Na fiu Leoleo e saili Vaifou i le po lea ae ua sola ese. E 2 aso talu ona mae’a le faalavelave ae maua loa e Leoleo le ali’i o Vaifou o loo taumafai e solomuli mai lana ta’avale i luma o se faleoloa i Iliili, ma laga atu ai loa Leoleo ma taofi o ia ae faailoa i ai le tusi saisai mai le Faamasinoga ua mae’a ona saini e pu’e faapagota ai o ia.

 

Ao le i auina atu Vaifou i le Ofisa o Leoleo mo isi suesuega, na saili e Leoleo lona tino poo i ai ni aupega atoa ai ma ni fualaau faasaina. Ina ua saili e Leoleo le tino a le ua molia, sa latou maua i ai fualaau faasaina o le aisa ma le mariuana, e le gata i lona tino ae faapea fo’i totonu o le ta’avale.

 

O fualaau faasaina na maua e Leoleo ia Vaifou, na faamaonia ai o loo aafia o ia i le tuleiina atu o fualaau faasaina i isi tagata.