Ads by Google Ads by Google

Toe aafia i le tulafono se ali’i o loo nofovaavaaia i le umia o fualaau faasaina


[ata: SN]
ausage@samoanews.com

Pago Pago, AMERIKA SAMOA - Ua toe aafia i le tulafono se ali’i e 48 tausaga le matua o loo nofovaavaaia mo le 5 tausaga i le umia faasolitulafono o fualaau fa’asaina, ina ua taofi e Leoleo lana ta’avale i le masina na te’a nei i le soona alu saoasaoa i luga o le alatele ae maua ai e Leoleo fualaau fa’asaina i totonu o lana ta’avale. 

 

O le masina na te’a nei na tula’i ai Kaleti Tafito i luma o le Fa’amasinoga Fa’aitumalo mo lana ulua’i iloiloga. 

 

O lo o tu’uaia o ia e le malo i le moliaga o le umia faasolitulafono o vaega o le pauta faasaina o le aisa; umia faasolitulafono o vaega o le pauta o le aisa ma le faamoemoe e tulei ma faatau atu i isi tagata, o solitulafono mamafa ia e mafai ona faasala ai se tasi i le Toese mail e 5 e oo atu i le 10 tausaga, pe faasala foi i le salatupe e mai le $5,000 e oo atu i le $20,000 le mamafa, poo le faasala foi i faasalaga uma ia e lua.

 

O lo o tu’uaia fo’i e le malo ia Tafito i le moliaga o le tete’e atu i Leoleo ao taumafai e pu’e faapagota o ia, o le vaega D lea o solitulafono mamafa, lea e mafai ona faasala ai se tasi i le Toese mo le umi e mafai ona oo atu i le 5 tausaga, poo le faasala i le salatupe e mafai ona oo atu i le $5,000, pe faasala fo’i i faasalaga uma ia e lua.

 

O le aso Tofi o le vaiaso nei lea ua fa’atulaga e faia ai le ulua’i iloiloga faapitoa o lenei mataupu. E $15,000 le vaega tupe lea ua fa’atulaga e le afioga i le ali’i Fa’amasino ia Elvis P. Patea e tatala ai i tua le ua molia.

 

TAGI A LE MALO

 

O le afiafi o le aso 5 o Iuni na te’a nei i le itula e 8:19, na maitauina ai e ni alii Leoleo se to’alua sa tiute i luga o le alatele i Iliili se ta’avale pikiapu e sau mai Sasa’e e aga’i atu i Sisifo ua mae’a le aoga o le laisene o lo o pipii i le pito i luma o le ta’avale. 

 

Na faafesoota’i e ali’i Leoleo le Ofisa autu o Leoleo i Fagatogo mo le tau sailia mai o ni faamaumauga e faatatau i le laisene o le ta’avale lea ua laua molimauina i luga o le alatele. O le ripoti na tuuina atu i le Ofisa autu i Fagatogo, o le laisene o le pikiapu e pei ona fesiligia na mae’a lona aoga i le 3 tausaga talu ai.

 

O le mae’a ai ona maua e Leoleo o faamaumauga e fa’atatau i le ta’avale, na faia ai loa gaioiga masani o le tuliloa o le ta’avale ma faaola moli emoemo ina ia faailoa atu ai i le ave ta’avale o le pikiapu e tatau ona afe i tua.

 

Na afe le pikiapu a le ua molia i luma o se faleoloa Asia i se vaega o Iliili e fa’atali ai le aga’i atu o Leoleo e fa’ailoa atu le mafua’aga ua taofi ai lana ta’avale. A o savavali atu Leoleo e aga’i atu i le ta’avale a Tafito, sa vaaia e Leoleo gaioiga a le ua molia i totonu o le ta’avale, e foliga mai o lo o aapa lona lima i le taga o lona ofuvae ma le faamoemoe e aveese mai se mea i fafo.

 

Na taunu’u alii Leoleo ma faailoa ia Tafito le mafuaaga ua taofia ai lana ta’avale, ona ua ua 2 tausaga talu ona mae’a le aoga o le laisene o lana ta’avale. Na tete’e le ua molia i le faamatalaga a Leoleo ma finau atu i ai, o le masina o Aperila o le tausaga na te’a nei na faafou ai le laisene o lana ta’avale faapea ai ma le Inisiua.

 

Na fesili Leoleo ia Tafito e avatu lona laisene ave ta’avale, peita’i na faailoa e le ua molia, o lo o galo lana laisene ae o lo o lelei fo’i lona laisene. E fai lava talanoaga a Leoleo ma le ua molia, ae vaaia lava le taumafai o le ua molia e aapa i le taga o lona ofuvae ao ona mata o lo o autilo solo.

 

Talu ai ua mae’a le aoga o le laisene o le ta’avale a le ua molia, atoa ai ma le leai o sona laisene ave ta’avale, na faatonu ai loa e Leoleo ia Tafito e oso i fafo ma lana ta’avale, ona o lea laa toso lana ta’avale e taofia i le Ofisa o Leoleo i Tafuna.

 

A o le i auina atu le ua molia ma lana ta’avale i le Ofisa o Leoleo i Tafuna, na muamua su’e e Leoleo le tino o le ua molia ina ia mautinoa na te le o umia ni aupega mata’utia poo ni fualaau fa’asaina.

 

Ina ua saili e Leoleo le tino o le ua molia, sa maua i ai se pepa iila feololo i lana taga taumatau o lona ofu sa fai. I totonu o lea pepa iila feololo sa maua i ai ni tama’i pepa iila laiti se 3 o lo o i ai vaega o le pauta pa’epa’e. Na faia se suega i pauta papa’e ia ma faamaonia ai, o vaega ia o le pauta faasaina o le aisa.

 

Na uma ona saili le tino o le ua molia, ona fa’asolo atu lea o Leoleo e saili totonu o lana ta’avale. I lalo o le nofoa o le ave ta’avale sa maua ai e Leoleo se tama’i ato o lo o i ai ni straws se 2 o lo o tutumu i vaega o le pauta pa’epa’e. Na faia se suega i pauta papa’e sa maua i totonu o le tama’i ato a faamaonia ai, o vaega ia o le pauta faasaina o le aisa.

 

FINAU LE MALO E FAALEAOGA LE NOFOVAAVAAIA A TAFITO

 

O le mae’a ai o le ulua’i iloiloga a Tafito i luma o le Faamasinoga Faaitumalo, na sosoo ai loa ma le isi ana iloiloga i le aso na sosoo ai i luma o le Faamasinoga Maualuga.

 

O lea iloiloga, e mafua mai i se talosaga a le malo ina ia faaleaoga tuutuuga o le nofovaavaaia a Tafito, ae poloaina loa o ia e tuli le faasalaga faa falepuipui o lo o faamalumalu e le Fa’amasinoga.

 

O le vaiaso fou lea ua faatulaga e toe valaau ai le mataupu a Tafito i luma o le Faamasinoga Maualuga, mo le tuuina atu o le faaiuga a le Faamasinoga e tusa ai o le le tausisia e le ua molia o tuutuuga o lana nofovaavaaia.

 

FAASALAGA NOFOVAAVAAIA

 

O le masina o Aokuso o le tausaga na te’a nei na faasala ai e le Faamasinoga ia Tafito e nofovaavaaia mo e 5 tausaga, ina ua ta’usala o ia i le solitulafono o lona umia faasolitulafono o vaega o le pauta faasaina o le aisa.

 

O le moliaga e pei ona ta’usala ai Tafito na mafua mai ina ua taofi e Leoleo i le aso 19 o Ianuari o le 2019 se ta’avale na malaga ai Tafito ma le isi ali’i, ae maua ai fualaau faasaina i totonu. Na molia uma e le malo ia Tafito faapea ai ma le alii na aveina le ta’avale i le umia faasolitulafono o fualaau fa’asaina o le aisa.

 

E 20 masina na manatu le Faamasinoga e faasala ai le ua molia i le Toese i Tafuna, o se tasi lea o tuutuuga o lana nofovaavaaia, ae talu ai talosaga a loia atoa ai ma le faatoesega a Tafito, na manatu ai le Fa’amasinoga e lava le umi e 7 masina lea na taofia ai Tafito i le Toese ao faatalitali se faaiuga o lana mataupu e fai ma ana fa’asalaga, ae o le umi o lo o totoe ai e 13 masina o le a faamalumalu lona tuliina sei’ vagana ua tuuina atu se isi poloaiga a le Faamasinoga.

 

I le aso na lau ai le faasalaga a Tafito, na matua fautuaina malosi ai e le Faamasinoga o ia ina ia faaaoga tatau le avanoa ua tuuina atu, e le toe fia vaai foi le Faamasinoga ia te ia i se isi lava solitulafono.

 

“Filifili oe poo fea le ala e te fia ui ai, poo le usita’i i tuutuuga o lau nofovaavaaia ma alo alo ese mai i le ava malosi ma fualaau faasaina, poo lou filifili e fa’aauau pea ona e tagofia ia tulaga, ma faasala ai oe i le Toese mo se taimi umi lava o lou olaga,” o le fautuaga lea a le Faamasinoga ia Tafito.