Ads by Google Ads by Google

Toe fa’atasiga fetufa’i mea’ai paleni mo le tausiga lelei o le tino


O le vaega sa latou talimalo i le Aoaoga Fa'apitoa mo le Tautuina o Mea'ai Paleni mo le Mamalu o le atunu'u sa fa'atautaia lea e le DOH Tobacco Diabetes ma le SLP. [ata: Leua Aiono Frost]

A'o le'i o'o i le toe aso o le fa'amoemoe e fa'amautu atili ai le so'otaga i le Koalisi Tobacco/Diabetes ma fale'aiga o lo'o tautua ai le atunu'u, sa mua'i fa'atino le folasaga a le susuga le Registerd Dietion a le ASCC Land Grant, Travis Flemming, e fa'atatau i so'o se ituaiga o vaiinu suamalie po'o apa inu fo'i o lo'o ta'atele ma ua fa'atau mai i faleoloa ma fale'aiga eseese i le atunu'u.

 

O lana folasaga i le aso Tofi ua te’a i le fonotaga i le va o le au Faipisinisi Fale'aiga ma sui fa’apitoa o lo'o mataituina le tausiga o le tino i mea'ai paleni mo le soifua Maloloina o tagata lautele.

 

"O apa inu uma, o loo ua fa'atumu i le ea ina ia maua ai fo'i se oloa e fa'atau atu mo se polofiti a le 'au faioloa. O le afuaga lea e ese ai lau fa'alogo i lou moa, pe a mae'a ona e inumia se vaega o lau apainu, ae maise lava le taimi faato'a tatala ai le apainu,” o tala lea a Travis.

 

“I le tino o le apainu o lo'o i ai se vaega o lo'o lomia ai le tele o mea esese ua fa'aopoopo i le vai suamalie lea e i totonu o le apainu, ma o le a e inumia i taimi uma lava e inua ai le apainu. E ao ia te oe, ona e fa'ataua uma aotelega o nei mea esesese o le a e inunia i soo se taimi e lagona ai lou galala i le fia inu.”

 

“O le aotelega o le suka o lo'o i ai i totonu o vaiinu suamalie fa'apea ma apainu o so'o se ituaiga, ua o'o lava i faguinu o lo'o fa'alauiloa e aoga tele mo tagata ta'a'alo, Gatorade, o loo tele lava le pasene o le suka o lo'o aofia ai."

 

Ua fa'ailoa mai fo'i e Travis, o le ASCC Land Grant o lo'o i ai fo'i nisi e to'atele o lo'o mataituina le soifua maloloina i ituaiga o fuala'au 'aina e ao ina totoina mo aiga uma e fa'aaoga i a latou kuka o mea'ai taumafa mo latou aiga.

 

"E aoga lou totoina lava o au fuala'au 'aina ma toe fa'aaoga i kuka a tou aiga mo tou mea'ai paleni, nai lo lou alu e fa'atau mai le faleoloa. O nisi o oloa ua leva ona tu'u 'aisa mai, ma ua lusi ai fo'i lo latou felesi e mo'omia ma aoga tele i le tino o tagata soifua."

 

O nei folasaga uma sa faia, a'o i ai lava sui ta'itasi mai Pisinisi Fale'aiga sa vala'aulia fa'apitoa mai le aso muamua ma le lua fo'i. Ua fa'apena fo'i le aso lona tolu, peita'i, o le aso lea o le a faia ai folasaga a ali'i Fapisinisi Fale'aiga.

 

Na malaga mai le Fale'aiga ma aumai kuka ua latou silafia, ua usita'ia ai e i latou le mau, "Ia tausia lelei le tino i kuka ua gaosia i Mea'ai Paleni!"

 

Mai le fale'aiga a le Sunny's Restaurant mai Nuuuli, sa latou aumaia ai le apa atoa o le 'aiga ua mae'a falai fa'atasi le fuala'au 'aina ma sina a'ano o le moa. Ua le fa'aaogaina e a le ga'o masani ai ae ua fa'aaogaina le ga'o olive lea ua latou silafia o se ga'o e lelei mo kuka. Ua auamai fo'i e ia le Mamoe Tao, lea matua alumia lava i tagata Samoa uma fa'apea fo'i ma isi tagata atumotu. O le mamoe lea ua mae'a ona saka lelei ia malu, ua ave'ese atu ai ma le ga'o, ona toe falai loa lea fa'amu le pa'u ina ia manogi lelei ma fa'atosina ai le fia tausami o le to'atele.

 

O lo ua fa'apea fo'i ona ia fa'ailoa mai, "Ona o lo ua iloga nei le fiafia tele o tagata i le Lu'au, o se tasi la lea ituaiga o mea'ai o le a fa'aopoopo i le lisi o a'u mea'ai gaosi mo le fofoga taumafa o le mamalu lautele o le atunu’u.

 

O le Shan Js, sa sau o ia ma lana Ipu Mafolafola tele, ua mae'a fa'atumu e ia i mea'ai eseese lea e matele ina fiafia i ai le to'atele i taimi o fa'alavelave tetele o aiga.

 

Manaia le felanulanua'i o lea ipu, ua atoa fo'i i ai le vasega o mea'ai fa'apaleni ai lau 'aiga e tasi ma ua matua alumia lea ipu a le tama'ita'i kuka lenei, ona ua ia taga'i i lea tulaga, i le taimi na ia tapenaina ana ipu e tautu ai le mamalu lautele i fa'alavelave sa totogia ai o ia e sapalai le mea'ai.

 

Na fua lelei e le Komiti ma le fa'apotopotoga le Ipu Mea'ai Tele lea, ma ua iloga mai le naunauta'i o le Komiti e fa'ata'ita'ia lea ituaiga o ipu mea'ai paleni.

 

Na soso'o lea ma le sao o le Paradise Pizza. Lea sa latou aumaia ai Pizza ua fa'asamoa ona tu'ufa'atasia ma le fa'aitalia o lea fo'i tausami manaia. Ioe ua sau i luga le Luau Pizzarea, Oka oka o le alumia ona ua fa'asamoaina lea taumafa. O le isi ituaiga ua faia le Tuna Pizzarea, lea ua fai sa'o a le Pizza lea i le fa'a-Amerika Samoa. O le Chicken Pizzarea, ae salani loa i le Vegetable Pizza.

 

Tomuli ai i le folasaga a le McDonalds. Lea ua le avanoa mai le ali'i Pule Sili o le McDonalds e faia le folasaga, ona faliu ane lea o le susuga le Taitaifono o le Koalisi a le DOH Tobacco/Diabetes fa'atino. Na aumaia e i latou le latou Hamburger Quarter Pounder, e la'ititi le a'ano manu e fa'aaoga ae salani i le tele o le Latisi, tamato ma le aniani. O le Big Mac foi e i ai le fuala'au 'aina e tova ai le a'ano manu fasi ma le pani fa'apea ma le sisi, ae tolu i le Fish Burger. Ua silafia e le to'atele, e i ai le latou salati e fa'atau ese, o le latou laina fo'i meainu suamalie ua palu fa'atasi uma i ai ituaiga o fuala'au aina eseese. O a laotu tausami ia ua manatu e aoga mo le vasega o i tatou uma ua mana'o ina ia fa'aitiitia le mamafa o le tino.

 

I se tautalaga a le tama'ita'i o Farrah Lesa e tusa o le toe aso ma lona fa'amoemoe, sa ia fa'ailoa ai, "O le tatou lava Malo o Amerika Samoa, ua fa'amanuiaina e le Atua i le tele o mea tausami matagofie ua i ai, ua mafai fo'i ona tausamia e le to'atele o tatou tagatanu'u i so'o se taimi. O se manuia e le laumaua i nisi malo uma o le lalolagi. O lea la, o tatou gasegase fo'i o po'ia ai i tatou, e afua mai ina ua tele le tausami matagofie. Peita'i a tatou iloa ona fa'aaoga tatau, fa'aitiitia le tele o le aiga, ma fa'amalositino ae inu le vaiauli, ua mae'a le fa'afitauli lea ua feagai nei ma i tatou."

 

Sa ia fa'afetai tele i vasega o pisinisi fale'aiga sa vala'aulia ma faia lo latou sao mai le tolu o aso o lenei taumafaiga.

 

Sa auai foi le tama'ita'i tausala lalelei o Amerika Samoa, sa tula'i ai ma faia lana folasaga, o le tapenaga o Kuki e fa'aaogaina le ga'o ititi ma le Oatmeal po'o le poleni i lona paluga. O se tasi o tausami e fiafia i ai le fanau iti, ae tatau fo'i i le tina ona agava'a i lea ituaiga o kuka, e faamalie gofie ai loto ole fanau iti.

 

Ua fa'ailoa mai e faia le Fa'atofala'iga lona lua o lenei faamoemoe, ma o le a vala'aulia ai le tele o fale'aiga tetele ma faletalimalo i le Vaega Lua ia Fepuari 6 - 8, 2019. O fale'aiga o le a vala'aulia fa'apitoa e aofia ai: Tradewinds, Sadies, DDW, Koko Bean; Carl's JR; ma isi uma.