E tusa ai ma se fa’asalalauga fa’alauaitele a le Kamupani Telefoni a le Bluesky, ua fa’ailoa mai ai, “Ua matua toe fa’atula’ia uma lava tautua masani a le Bluesky i le motu o Tutuila nei. O le Moana Cable ma laina telefoni uma lava o lo’o fa’atautaia e le Bluesky, ua toe fa’aleleia uma lava, ona o le galulue malosi ma le punoua’i o le matou aufaigaluega inisinia tau laina o feso’ota’iga.”

“Ua matou fia fa’afetaia foi le onosa’i o matou pa’aga fa’apisinisi uma, ina ua matauina fo’i ua i ai mea na fa’aletonu i le tautua, ae ua tuu avanoa i latou i le aufaigaluega ina ia toe fa’aleleia mea uma, ma ua mae’a nei la galuega nei ua toe aluga lelei mea uma mo i tatou uma,” o se tala lea a le ali’i pule sili Raj Deo.

Ua le gata la i le latou fa’afetaia o a latou pa’aga fa’apisinisi, ae ua latou faafetaia mai le galulue malosi o sui uma o lo’o tiute i le EOC fa’apea ma sui uma ua tofia mo le vaega e ta’imua mai i fesoasoani e fa’atula’ia mo nisi e pagatia ona o le tetele o matagi ma timuga i le atunuu.

O le isi fa’afetai fo’i mo le aufaigaluega a le ASPA, ona o le latou va’aia toto’a o le eletise ma le suavai taumafa mo le sapalaia o le atunuu i nei vaitau louloua o le tau.