Ads by Google Ads by Google

Toe faila malo le tagi faasaga i le Pule muamua Ofisa o le Litaea


[ata: foa'i]
ausage@samoanews.com

Pago Pago, AMERIKA SAMOA

 

O le vaiaso na te’a nei na toe faila ai e le malo le latou tagi fa’asaga i le ali’i sa avea muamua ma Pulesili o le Ofisa o le Litaea a le malo, le susuga Luatua Filisouaiga Ta’afua, i le silia ai lea o le tausaga talu ona solofua e le Fa’amasinoga Maualuga lenei mataupu.

 

O le vaiaso na te’a nei na tula’i ai Luatua i luma o le Fa’amasinoga Faaitumalo mo lana ulua’i iloiloga. O le ali’i Loia tua ia Marcellus T. Uiagalelei o lo o tula’i mo Luatua, ae o le tama’ita’i Loia Sili lagolago ia Hanna Kim na tula’i mo le malo.

 

E 28 moliaga ua faila e le malo fa’asaga ia Luatua, o ia moliaga e aofia ai moliaga e 14 o le gaoi faapea ai ma moliaga e 14 o le ave faagaoi o meatotino sa tu’uina atu i lalo o lana vaavaaiga, o le vaega C uma ia o solitulafono mamafa, lea e mafai ona fa’asala ai se tasi i le Toese mo le umi e le silia i le 7 tausaga, pe faasala i le salatupe e le silia i le $5,000, poo le faasala fo’i i le isi fa’asalaga lea e mafai ona oo atu i le $20,000 le maualuga.

 

E $50,000 na fa’atulaga e le Fa’amasinoga e tatala ai i tua Luatua, ae i le mae’a ai ona faafofoga o le Fa’amasinoga i se talosaga a Uiagalelei mo se avanoa e fa’aitiitia ai le tupe e tatala ai i tua Luatua, na talia ai loa e le afioga i le ali’i Fa’amasino ia Elvis P. Patea le talosaga ma fa’aitiitia ai loa i le $35,000 le tupe e tatala ai i tua le ua molia.

 

Na taua e Uiagalelei i lana folasaga e faapea, o le tagi lea ua toe fa’aulu faasaga ia Luatua, o le tagi lava fo’i lea na molia ai o ia e le malo i ni tausaga ua mavae, lea na solofua e le Fa’amasinoga i le masina o Fepuari o le tausaga na te’a nei.

 

Na faailoa e Uiagalelei e faapea, sa tatala i tua e le Fa’amasinoga ia Luatua i le taimi a o faagasolo ai le mataupu muamua e faatali ai se faaiuga a le fa’amasinoga. I le taimi atoa na tatala ai o ia i tua ina ua mae’a ona ia totogi se vaega tupe, sa ia usitaia tuutuuga uma lava a le fa’amasinoga.

 

O Luatua, e pei ona finau Uiagalelei, e le o se tagata e ono sola ese ma Amerika Samoa pe afai ae tatala i tua, o lona aiga ma lona atunuu lenei, o loo i ai uma fo’i lona aiga ma i latou e lagolagoina o ia. O ia o se Tama e tausia se aiga, o se tasi fo’i ua faatuatuaina e le nuu ma le ekalesia.

 

Ina ua fesiligia le finagalo o le malo, na taua ai e le tamaitai loia ia Kim le leai o sona silafia e fa’atatau i lenei mataupu.

 

E tele isi faamaumauga sa fia malamalama atili i ai le Fa’amasinoga. E le gata o le aso na solofua ai le tagi faasaga ia Luatua, ae o le aofa’i o moliaga na tuuaia ai o ia i le ulua’i tagi ma le taimi lea ua toe faaulu i le taimi nei.

 

Saunoa Patea e faapea, e ui i tulaga lelei uma ua fa’ailoa e Uiagalelei faatatau ia Luatua, o loo silasila le Faamasinoga i le matuia o tu’uaiga faasaga ia te ia, atoa ai ma le tele o moliaga ua molia ai o ia e le malo. Ona o lea tulaga, na saunoa ai Patea e faapea, e tatau lava ona i ai se vaega tupe feololo e fa’atulaga e tatala ai i tua Luatua a o faagasolo ai taualumaga o lana mataupu.

 

O le aso Tofi o le vaiaso nei lea i le itula e 1:30 i le aoauli ua faatulaga e faia ai le ulua’i iloiloga o lenei mataupu.

 

TAGI A LE MALO

 

E pei ona taua e le malo i le latou tagi lea ua toe faaulu nei e fa’apea, o le aso 20 o Iulai 2015 na manu a’e ai lenei mataupu, ina ua faatonu e le afioga i le ali’i Kovana ia Lolo Matalasi Moliga le Komesina o Leoleo sa i ai i lena vaitaimi, afioga Save Liuato A. Tuitele e faagasolo se suesuega tau soligatulafono e uiga i le fa’aaoga le talafeagai o le tele o tupe mai Teuga Tupe a le Ofisa o le Litaea a le malo.

 

O Luatua e pei ona taua i le tagi a le malo, o ia lea sa avea ma Pulesili o le Ofisa o le Litaea, o ona tiute tauave e aofia ai le faamaopopoina o faamaumauga, teugatupe atoa ai ma meatotino uma lava a le Ofisa o le Litaea a le malo.

 

O le Ofisa o le Litaea a le malo, e 2 ana teugatupe i le Faletupe o Hawaii i lea taimi, o le teugatupe e totogi atu ai penefiti mo i latou uma ua agaavaa i faamanuiaga o le litaea, faapea ai ma le teugatupe e faatupe mai ai gaioiga uma ma fuafuaga faagasolo a le Ofisa.

 

Soo se taimi lava e tala ai se tupe pe saini se siaki, e 2 lava saini e maa’omia, pe afai e silia i le $250 le aofa’i o le siaki, ae afai o se siaki e i lalo mai o lea aofaiga, e na o le saini lava a le Pulesili e manaomia, poo le saini lea a le ua molia.

 

O lenei mataupu na manu a’e ina ua aga’i atu se tagata faigaluega ma fesiligia le Taitaifono o le Komiti Faafoe a le Litaea sa i ai i na taimi, lea fo’i ua lagomau mai Tia Sa, le afioga a Fanene Scanlan, e faatatau i le tele o tupe o loo alu e totogi ai kamupani o loo faatinoina galuega mo le Ofisa o le Litaea, e aunoa ma le mana’omia o le saini a Fanene i nei mau siaki e tele.

 

Talu ai tulaga e pei ona alia’e mai, na talosagaina ai loa le Ofusa Suetusi latou te sueina tusi a le Ofisa o le Litaea a le malo ma faamaonia ai e le Ofisa Suetusi lenei i le latou faaiuga na tuuina mai i le aso 13 o Novema 2015, le aofia lea o Luatua i le tele o gaioiga faasolitulafono e aofia ai le fa’aaoga sese o tupe a le Ofisa o Litaea, talu mai lava le tausaga e 2013, 2014 ma le 2015.

 

O le gaioiga muamua lava a Leoleo suesue na faia, o le latou talosagaina lea o se poloaiga a le Faamasinoga e aveese mai ai faamaumauga o teugatupe a le Ofisa o le Litaea faapea ai ma faamaumauga o teugatupe a le ua molia mai le Faletupe o Hawaii.

 

I suesuega a Leoleo sa faia na manino ai, e 3 kamupani pepelo na faia e Luatua ina ia faafoliga ai o loo i ai ni pisinisi faapea latou te faatinoina galuega mo le Ofisa o le Litaea ae totogi atu i ai tupe, peita’i o le mea moni lava, e leai ni faamaoniga atoa ai ma ni faamaumauga e faamaonia ai, o loo i ai ni pisinisi poo ni kamupani faapea i totonu o le atunuu.

 

O Kamupani poo Pisinisi nei e 3 na fausia lava e Luatua ina ia faafoliga ai, o i latou ia o loo faia galuega mo le Ofisa o le Litaea, ae emo ane le ata, o tupe uma lava mai teugatupe a le Litaea na totogi aga’i i kamupani nei e 3, na toe i’u uma lava i totonu o le teugatupe a Luatua

 

O le gaioiga fo’i sa faia e le ua molia e pei ona taua e le malo i le latou tagi, o le faaaoga faamalosi lea o le saini a le afioga a Fanene e aunoa ma sona silafia, e ala i le faaaoga le ‘rubber stamp’ o loo i ai le saini a Fanene ma tuu i luga o siaki uma lava na sainia e le ua molia.

 

O Kamupani poo Pisinisi pepelo e 3 na faia lava e le ua molia e aofia ai le Hardcord Cleaning Service (HCS); o le Star Company (SC); ma le Filiga Electronic Company (FEC).

 

KAMUPANI A LE HCS

 

I le va o le masina o Me ma Iuni o le 2015, na saini ai e Luatua siaki e 5 ma totogi atu i le HCS mo le faatinoina o galuega mo le Ofisa o le Litaea i le aofa’i e silia i le $10,000.

 

O ia siaki e aofia ai le siaki e $3,876.56 na totogi atu i le aso 13 o Me; sosoo ai ma le siaki e $1,998.23 na totogi atu i le aso 21 o Me; sosoo ai ma le siaki e $1,898.34 na totogi atui le aso 8 o Iuni; sosoo ai ma le siaki e $996.66 na totogi atu i le aso 11 o Iuni, ma le siaki lona 5 e $1,769.79 na totogi atu i le aso 16 o Iuni.

 

O siaki uma nei na totogi uma i le kamupani pepelo o le HCS, ae a mae’a ona faaliliu i le tinoitupe, ona totogi uma loa lea o le aofa’iga lea i totonu o le teugatupe a Luatua.

 

KAMUPANI A LE SC

 

E pei ona taua e le malo i le latou tagi, e 2 siaki mai teugatupe a le Litaea a le malo na totogi atu i le kamupani a le SC i le aofaiga e lata i le $3,000.

 

O le siaki muamua e $750 na totogi atu i le aso 3 o Iuni, 2015 ma le siaki lona 2 e $2,145 na totogi atu i le aso 5 o Iuni. O siaki uma nei na aumai i teugatupe a le Litaea a le malo na mafai ona faaliliu i le tinoitupe, mulimuli ane ona teu lea o le tinoitupe i totonu o le teugatupe a Luatua i le Faletupe o Hawaii.

 

O siaki e 5 na avae aga’i i le kamupani a le HCS ma siaki e lua na ave i le kamupani a le SC, na fa’aaoga faamalosi ai e Luatua le saini a Fanene e aunoa ma sona silafia.

 

Silasila i le lomiga a le Samoa News i le aso a taeao lea o le a faasalalau atu ai faatalatalanoaga a Leoleo ma molimau autu o lenei mataupu e uiga i nei faiga faasolitulafono.