Ads by Google Ads by Google

Toe filifilia Tuaolo i le tofi Senatoa a Pago Pago mo le isi 4 tausaga


Le afioga i le ali’i Senatoa ia Tuaolo Vaivao Manaia Fruean ma le Faletua ia Fiapaipai Fruean, faapea ai ma le grandchild i le latou ata sa pu’eina i lona Maota i Pago Pago i le vaiaso nei, i le mae’a ai lea ona toe filifilia o ia e le afioaga i Pago Pago na te tauaveina le tofi Senatoa mo le isi 4 tausaga o loo lumana’i nei. [ata AF]
ausage@samoanews.com

Pago Pago, AMERIKA SAMOA

 

Ua toe filifilia nei le Tofa a Tuaolo Vaivao Manaia Fruean na te tauaveina le nofoa o le afioaga i Pago Pago mo le isi 4 tausaga o loo lumana’i nei a le Maota Maualuga o le Fono Faitulafono. 

 

O le faaiuga na autasi uma i ai le Pulega a ali’i ma faipule o le atunu’u, i le mae’a ai lea ona Filitagaga le tofa ma le faautaga i se fonotaga na usuia i le Malae i Gagamoa i le faaiuga o le vaiaso na te’a nei.

 

O le afioaga o Pago Pago lava le ulua’i afioaga i le atunu’u ua mae’a ona filifilia le latou Senatoa mo le isi nofoaga fou o loo lumana’i nei. 

 

O le fonotaga a le afioaga i Pago Pago na taitaia lea e le afioga i le Maoputasi, o ia fo’i lea o le Failautusi o le Ofisa o Mataupu Tau Samoa, le afioga Mauga Tasi Asuega, lea fo’i sa auai uma sui o ali’i ma faipule.

 

Na taua e le tofa Tuaolo i se faatalatalanoaga ma le Samoa News i lona Laoa i Pago Pago i le aso Gafua o le vaiaso nei e faapea, ina ua amata le fono a le afioaga, na muamua lava faaleo lana talosaga ma faaleo lona finagalo, ina ia toe tuu atu le tofi o le afioaga na te tauaveina mo le isi 4 tausaga o loo lumana’i nei.

 

“O le agaga atoa lava na mafua ai ona ou toe talosaga mo le tofi, e le uma lava le fia tautua mo lo’u nu’u faapea le malo ma le atunu’u atoa. O le 55 lenei o tausaga o la’u tautua i le malo o Amerika Samoa, peita’i o loo lagona lava le malosi e fa’aauau ai la’u tautua mo o’u tagata,” o le saunoaga lea a Tuaolo.

 

Saunoa atili Tuaolo e faapea, o le mafua’aga autu lea na ala ai ona ia talosaga i lona afioaga pe mafai ona toe maua sona avanoa e tautua ai i le nofoaga o le isi 4 tausaga, o le fia galue lava mo le atunu’u.

 

Sa ia sauni fo’i i soo se tali e avatu e le afioaga, i le talia poo le le talia o lana talosaga. 

 

“Ae na maofa lo’u loto ina ua talia ma le agaga fiafia e si o’u nu’u la’u talosaga, lea ua mafua ai ona ou toe nofoia le nofoa o le itumalo i le Senate mo le isi 4 tausaga o lo o lumana’i i ai,” o le saunoaga lea a Tuaolo. 

 

Ina ua fesiligia le afioga i le ali’i Senatoa i sona finagalo ina ua toe filifilia o ia e lona afioaga i le nofoa, na ia taua ai lona agaga faafetai ma le loto faagaeetia ina ua talia ma le fiafia e le mamalu a le pulega a ali’i ma faipule lana talosaga faaoloolo maau na tuuina atu i ai.

 

“O se faaeaea maualuga ua tuuina mai e lo’u nu’u ia te a’u, e mafua mai ina ua latou talitonuina a’u i le tofi,” o le saunoaga lea a Tuaolo.

 

Sa ia taua fo’i e faapea, “Sa ou sauni lava fo’i i le taimi e faapea mai ai le paia o lo’u nu’u ou te malolo ae saili se isi, peita’i, o le tofa maualuga i le afioga i le Maoputasi, Tei ma Anoalo, Matua ma Nofofanau, Anoaloifale, le Falefa o Tulafale ma le Launiu Saelua, ua mafua ai ona lagona le fiafia ma le loto maualalo e fa’aauau pea le tautua mo lo’u nu’u faapea le malo ma le atunu’u atoa.”

 

Ina ua fesiligia e le Samoa News i nisi o mataupu ua ia finagalo e ave i ai lana faamuamua pe afai ae nofoia le Nofoaiga fou a le Fono Faitulafono i le tausaga fou, na taua ai e Tuaolo lona manatu e ave lana fa’amuamua i le faamautuina lea o ni Ofisa o afioga i Senatoa ma Faipule.

 

E ui o se tasi lea o mataupu sa vavao ai le atunu’u i se taimi e le i mamao atu, ma tu’uaia ai le Fono i le fa’aaoga le tatau o le ta’i $10,000 na fai meaalofa atu i ai le faigamalo mo le fausiaina o ni a latou Ofisa, peita’i na taua e Tuaolo e faapea, e vaai pea lava ma le faanoanoa i le tele o taimi e aga’i atu ai Senatoa ma Faipule i le Fono Faitulafono, e lea ni o latou Ofisa e aga’i sa’o i ai, ae nofo nofo solo i le Fale Samoa.

 

Sa ia taua e faapea, o le Fono Faitulafono, o le isi lea vaega Tu Maoti e tolu i ai Vaega Faapitoa a le faigamalo, ae foliga mai e le o manatu mamafa i ai le faigamalo i le fausia lea o ni Ofisa e mapu i ai sui o le Fono, aemaise ai nofoaga e autova’a atu i ai le atunu’u.

 

“Afai ae sopo le soifua ma le ola i le tausaga fou, aemaise ai fo’i o lea ua tula’i mai i le isi faigamalo fou, o le a ou talosaga i le faigamalo fou mo se vaega tupe e fausia ai ni Ofisa mo Senatoa ma Faipule,” o le saunoaga lea a Tuaolo.

 

O fualaau faasaina, o se tasi lea faafitauli numera tasi ua faatupulaia i le atunu’u i le taimi nei. Ae o le fesili o lo o tula’i mai, e faapefea ona sao mai fualaau faasaina i totonu o le atunu’u ae o lo o malu puipuia pea lava le puipuiga o nofoaga e pei o le uafu ma le malae ta’avale.

 

“E tasi lava le auala o loo ulufale mai ai faamomoli eseese i le atunuu ma isi uta mai fafo e aofia ai tagata malaga mai, ae le o le malae va’alele o le Uafu i Fagatogo. Ae o le fesili o loo tula’i mai, poo faamaoni tagata faigaluega i le faatinoina o latou tiute,” o le saunoaga lea a Tuaolo.

 

Saunoa le ali’i Senatoa e faapea, afai e le faamaoni tagata faigaluega i le faatinoina o latou tiute, lona uiga, o tagatanu’u lava o Amerka Samoa lea o loo mafua ai ona ulufale mai fualaau faasaina ma isi mea e le faatagaina i totonu o le atunu’u.

 

“E le fou le faafitauli i fualaau faasaina i Amerika Samoa, ua sosolo faa faama’i ma ua mana’omia ai le vave faia o se auala e foia ai. E tasi lava le auala e foia ai lenei faafitauli, ia faamaoni tagata faigaluega i le faatinoina o a latou tiute, ma ia galulue faatasi le malo, afioaga ma nu’u i le tafiesea o lenei faafitauli i le atunu’u,” o le saunoaga lea a Tuaolo.

 

Sa ia taua atili fo’i e faapea, o le faafitauli lava fo’i lea e tasi o loo pagatia ai le malo tuaoi o Samoa, lea e pei ona manino i saunoaga mai ona Ta’ita’i e aofia ai le afioga i le ali’i Palemia ia Tuilaepa Sailele Malielegaoi faapea ai ma le Komesina o Leoleo ia Fuiavailiili E. Keil. 

 

“Ua mana’omia le galulue faatasi o tagata uma ma faamaoni le tagata i le faatinoina o ona tiute, ae sili ai i lo lena, ia toaaga e o i le lotu, pau lea o le auala e mafai ai ona foia lenei faafitauli, o le faalavealve o tatou olaga i le Atua,” o le isi lea saunoaga a Tuaolo.

 

E 10 tausaga na tautua ai Tuaolo i le tofi Faipule mo le afioaga o Pago Pago i le Maota o Sui, ae filifilia loa o ia mo le ulua’i taimi e avea ma Senatoa mo nofoaiga sosoo se 2, mai le 2001 e oo atu i le 2008.

 

Na mae’a nofoaiga sosoo e 2 a Tuaolo ona filifilia ai loa lea o ia e avea ma Komesina o le Matagaluega o le Puipuiga o le Saogalemu Lautele mo le 4 tausaga, mai le 2009 e oo atu i le 2012. 

 

Na mae’a lea ona sosoo ai loa lea ma le filifilia o ia e avea ma Komesina o le Ofisa o Palotaga a le malo mo le isi 4 tausaga, ae o le taimi lea ua nofoia ai e le afioga i le Maoputasi ia Mauga le nofoa o le afioga i le tofi Senatoa. 

 

Toe 2 tausaga mae’a le nofoaiga a le afioga i le Maoputasi ia Mauga, ae tofia loa o ia e le afioga i le ali’i Kovana ia Lolo Moilga i le masina o Aperila 2015 e avea ma Failautusi o le Ofisa o Mataupu Tau Samoa, ma filifilia ai loa e le afioga o Pago Pago le tofa Tuaolo na te fa’aauau ina tausaga e 2 na totoe o le nofoaiga a Mauga seia mae’a i le 2016. 

 

Ao le i mae’a le nofoaiga e pei ona faaauau mai e Tuaolo, sa ia talosaga atu i lona afioaga mo se avanoa na te fa’aauauina ai le tofi a le afioaga mo le isi 4 tausaga, lea fo’i na talisapaia ma le agaga fiafia e le afioga, ma nofoia ai loa e Tuaolo le nofoa talu mai le 2017 seia oo mai i le taimi nei.

 

O le toe filifilia ai o ia e le afioaga na te tauaveina le nofoa mo le isi 4 tausaga, ua atoa ai loa le 18 tausaga o le tautua a Tuaolo i le Maota Maualuga i le Senate.

 

Ina ua fesiligia poo i ai sona finagalo e fia tauva i le tofi Peresetene, na saunoa Tuaolo e faapea, o loo i ai lona faanaunauga e fia tautua i le Maota Maualuga mo le tofi Peresetene, ae o loo faatalitali lava poo ai ni isi o le a filifilia e o latou itumalo mo le Nofoaiga fou.