Pago Pago - AMERIKA SAMOA

Ua pasia nei e le Faigamalo a Amerika Samoa se visa 7 aso e le totogia mo tagata femalagai a le malo tuaoi o Samoa, ae peitai, sa le’i faamanuiaina sa latou talosaga mo le ave’eseina o le lafoga lea e totogi i le malae vaalele i Faleolo.

E ui o lo o tumau pea ia le pemita mo le 30 aso, mo i latou o lo o fia malaga mai i le teritori, ae ua le o toe manaomia ni kilia mai i le falemai ma le ofisa a leoleo, e pei ona faamalosia i taimi tuanai, pe afai e le o malaga mai e nonofo mau pe galulue i totonu o Amerika Samoa.

O lenei suiga sa amata faamalosia ia Aperila 10, 2023 ma sa faaleoina e le susuga i le Loia Sili i le fono a malo e lua, i le Atoa o Samoa, lea sa faataunu’uina i Amerika Samoa nei, i le vaiaso ua tuanai.

Ae peitai, sa le’I faamanuiaina se talosaga a Amerika Samoa mo le ave’esea o le lafoga lea e totogi I le malae vaalele I Faleolo.

Sa ta’ua i se tala tusia a le Samoa Observer, le faamaninoina e le afioga i le Palemia o Samoa, ia Fiame Naomi Mata’afa, o lea lafoga, e totogi e tagata faimalaga uma e afea Samoa, po o fea lava le itu lalolagi e malaga mai ai.

Sa ta’ua ai foi e Fiame e faapea, o lea lafoga e le o patino i tagata Amerika Samoa ae mo tagata faigamlaga uma, e tuua Samoa.  Ma o lea lafoga, o lo o aofia i totonu o le totogi o pasese o vaalele.

Ae mo tagata o Amerika Samoa, e le o aofia lea lafoga i totonu o pasese totogi mo vaalele, ona e le o totogi lafoga ia ofisa vaalele o le Samoa Airways ma le Talofa Airways i le ofisa o vaalele a Samoa, o le mea lea e fa’ato’a totogi ai e tagata o Amerika Samoa lea lafoga i le malae vaalele i Faleolo.

O le a toe maua nisi faamatalaga i mataupu sa soalaupuleina i le Atoa o Samoa, i nisi lomiga i le lumanai.