Ads by Google Ads by Google

Toe taofia Fetoai toese e aunoa ma se tupe tatala ai

ausage@samoanews.com

O le aso Lua na te’a nei na tuuina mai ai e le afioga i le Fa’amasino Sili ia Michael Kruse sana poloaiga, ina ia aloaia le faaiuga a le Faamasinoga Faaitumalo sa tuuina mai i le tausaga na te’a nei, e taofia ai le ali’i o Falaniko Fetoai i le toese e aunoa ma se tupe e totogi e tatala ai o ia.

 

O lea faaiuga na tuuina mai lea ina ua mae’a se iloiloga faapitoa sa faia i le aso Lua na te’a nei, lea sa tau saili ai e le Fa’amasinoga le mafua’aga ua tatala ai i tua le ua molia, e ui o lo o i ai le poloaiga na tuuina mai e le afioga i le ali’i Fa’amasino ia Fiti Sunia, e taofia ai le ua molia i le toese e aunoa ma se tupe e totogi, ina ua mae’a ona faila e le malo moliaga mamafa fa’asaga ia te ia i le masina o Tesema o le tausaga na te’a nei.

 

Na toe tolopo e Kruse le iloiloga a Fetoai lea na fa’atulaga e faia i le aso Faraile na te’a nei e toe fa’aauau i le taeao o le aso Lua o le vaiaso nei, i le tau sailiina lea o le mafua’aga na ala ai ona faia le faaiuga e totogi le tinoitupe e $3,000 e tatala ai le ua molia i tua.

 

O le tama’ita’i loia sili lagolago ia Christy Dunn na tula’i mo le malo i lenei iloiloga. O le tama’ita’i loia fautua mo tagata lautele ia Kate Hannaher na tula’i mo Fetoai i le aso Faraile na te’a nei, ae ina ua valaau lana mataupu i le aso Lua na te’a nei, o le ali’i loia fautua ia Ryan Anderson na tula’i mo ia.

 

Na taua e Dunn e fa’apea, o le mafua’aga na ala ai ona tula’i mai le fa’aletonu, ona ua lua faila eseese sa fa’amauina ai le tagi a le malo fa’asaga ia Fetoai.

 

O le faila muamua o lo o aofia ai moliaga mama ina ua fa’atoa faila le tagi fa’asaga i le ua molia i luma o le Fa’amasinoga Fa’aitumalo i le aso 29 Novema 2017, o le aso fo’i lea na tula’i ai le ua molia i luma o le Fa’amasinoga Fa’aitumalo.

 

I le taimi o le ulua’i tula’i a Fetoai i luma o le fa’amasinoga fa’aitumalo, na fa’ailoa ai e le malo i le fa’amasinoga, lo latou sauni e faila moliaga fa’aopoopo fa’asaga i lenei mataupu, pe afai ae mae’a suesuega a Leoleo.

 

O le iloiloga fo’i lea na talosaga ai loa le loia a Fetoai ia Anderson, mo se avanoa e tatala ai i tua le ua molia e aunoa ma se tupe e totogi, e fa’atalitali ai le taimi e faila ai e le malo moliaga fa’aopoopo fa’asaga ia te ia.

 

Na teena e le afioga i le ali’i Fa’amasino ia Fiti Sunia le talosaga a Anderson, ma ia fa’atulaga ai loa le tinoitupe e $3,000 e totogi ona fa’atoa mafai lea ona tatala Fetoai i tua mai le toese i Tafuna.

 

O le aso 30 Novema na faila ai loa e le malo moliaga faaopoopo fa’asaga i le ua molia, e aofia ai le moliaga mamafa o le fa’ao’olima i le tulaga muamua. O le mae’a ai ona faila e le malo o moliaga fa’aopoopo, na faia ai loa e Sunia le poloaiga ina ia taofia loa Fetoai i le toese e aunoa ma se tupe e tatala ai o ia i tua.

 

O lea fa’aiuga sa fa’avae mai lea i le tulaga matuia o le fa’alavelave e pei ona tu’uaia sa tula’i mai, lea sa taua i totonu o le tagi tusitusia a le malo.

 

O le aso 6 o Tesema 2017 na tula’i ai Fetoa’i i luma o le Fa’amasinoga Maualuga. O le aso na sosoo ai, Tesema aso 7, na faila ai loa e le loia a le ua molia se talosaga e tatala ai o ia i tua, i le mae’a ai lea ona totogi o le tinoitupe e $3,000. O lea talosaga na sainia e le afioga a Michael Kruse ma aloaia ai loa le tatalaina i tua o Fetoai.

 

Na faaalia e Dunn i le fa’amasinoga e fa’apea, o le faila o le tagi fa’asaga i le ua molia lea o lo o i ai moliaga mama, atoa ai ma le faaiuga e totogi le $3,000 ona mafai lea na tatala o ia i tua, o le faila lea sa tauaao atu i luma o le Fa’amasinoga Maualuga. Ae i le talitonuga o le malo, e le o le faila sa’o lea.

 

O le faila sa’o sa tatau ona tuuina atu i luma o le Fa’amasinoga Maualuga, o le faila lea o lo o i ai moliaga mamafa, atoa ai ma le poloaiga mai le afioga i le ali’i Fa’amasino ia Sunia, e taofia ai Fetoai i le toese e aunoa ma se tupe e totogi.

 

O le mae’a ai ona fa’afofoga o le fa’amasinoga i le folasaga a le malo, na faia ai loa e Kruse le faaiuga ina ia aloaia pea le poloaiga sa tuuina mai e le afioga a Sunia, e ala i le taofia pea o Fetoai i le toese e aunoa ma se tupe e totogi e tatala ai o ia i tua.

 

Ua poloaina fo’i e Kruse le Failautusi a le Fa’amasinoga ina ia toe fa’afo’i le $3,000 a le ua molia sa totogi e tatala ai o ia i tua.

 

O le mae’a ai o le iloiloga a Fetoai, na toe taofia ai loa o ia i le toese e fa’atali ai taualumaga o lana mataupu.