Pago Pago, AMERIKA SAMOA

I le aso Gafua sa taumafai ai le Komiti Fa’afoe o le Covid-19 e soalaupule se faiga e oo i le va’a oloa o lo’o i ai le to’atolu o latou tagata faigaluega o lo ua fa’amaonia i suega ua maua i le coronavirus. 

Ua talia e Kovana Lolo Moliga le fa’atagaina o le 7 aso e taula ai lea va’a i fafo atu o le sone o Amerika Samoa se’ia mae’a aiaiga e tusa o le uta o pusa oloa e fia tuu i inei ae avatu ese le 200 o pusa oloa tetele o uta ua tapena a le Star Kist Samoa.

Fa’aalia e le ali’i foma’i Dr Aifili John Tufa o le Matagaluega o le Soifua Maloloina, “E fa’alua na faia suega o le Covid-19 e faaaoga ai masini uma e lua, le Abbot ma le GeneXpert ma sa faia uma tui o le aufaigaluega a le DOH e to’a 9, lua le aufaigaluega a le Port, pailate o le Va’a Oloa ma ma sa taofia mo le aso atoa i le nofoaga fa’apitoa e nofo va’ava’aia ai, ae leai lava a se auga o le gasegase o va’aia ia i latou nei.”

I le taimi nei o lo’o tumau pea le atunuu i le Fa’atulagaga Lanu Moana, o lona uiga e le’o i ai se tasi ua maua i le Covid, se’i vagana ai i latou e toatolu lea ua taofia pea i latou i luga o le Fesco Askold.

O le aso Gafua i le itula e 9:00 i le taeao na malaga ese ai le va’aoloa mai le uafu i Fagatogo ae taula mai i fafo atu o le atunu’u ma sa tapunia ai foi le uafua i lea vaitaimi, ae fa’atoa toe tatalaina i le taeao o le aso Lua, Novema 10. 

Ua tima’ia le atunuu e alii foma’I, “Ua tatau nei ona usita’ia uma aiaiga tamau o le fa’asa o le fa’atulagaga lanu moana, ia fa’aaoga le pupuni fofoga, ia vava mamao ma isi, ua faasaina le faasaina foi i le to’atele na’ua i nofoaga e tasi ma ia matua fufulu lelei nofoaga uma ma faamama ia leai ni e pesia mai isi ua maua i lea fa’ama’i.”

I le itula e 1:20 i le aoauli o le aso Gafua ae va’aia loa le oo ane o le pikiapu ua i ai masini e fana ai le vaila’au fa’amama, le uafu ma ua va’aia ai le aufaigaluega o ali’i ua la’eia ofu samasama uma lava fa’apea ma pupuni fofoga, e oo lava i se’evae puti, ua iloga ona malutia ai le tino atoa, e fanaina le vaila’au fa’amama ua amata atu lava i le faitoto’a e ulufale atu ai i le uafu. 

Ona o le Uafu lea ua avea nei ma nofoaga tonu o lo’o ua uia mai e nisi ua mua’i maua i le Coronavirus, o lea ua fa’atino ai lea fuafuaga lelei ua mae’a fa’ataoto mo so’o se vaega e tau ulufale mai ai le fa’ama’i i le atunuu. Na o ese uma tagata leoleo faitoto’a a lea matagaluega mai totonu o le latou Ofisa ae se’i fa’amama le latou ofisa, ma fa’asolo atu ai lea galuega lelei i le Ofisa tele o le Uafu tele i Fagatogo.

O le aso Gafua lava fo’i sa taofia ai galuega a le Uafu mo le to’atele o tagata faigaluega, ae se’I fa’amama muamua le uafu, lea na toe tatala i le taeao o le aso Lua. 

Ua fa’aalia fo’i e le susuga le Taitaifono o le Komiti Fa’afoe o le Coronavirus i le atunuu, Iulogologo Pereira, “Ona ua vave lava ona fa’atino e le matagaluega o le DOH ma le Pulega o Ufu ma Malaeva’alele le tatu polokamala fa’ataoto ina ia faia pe a fa’aolioli mai le ulufale mai o nisi ma le covid-19 i le atunuu, ua vave ai ona taofia le fa’amai mai le pesia atu ai o nisi e to’atele. Ua mataituina fo’I i latou sa faia tiute i luga uma o va’a o lo’o ulufale mai ma oloa, ina ia faia tui suesue o le covid-19 ma nofo va’ava’aia mo le 14 aso. O tagata nei o tatou lava tama fanau o faigaluega i le DOH ma le Uafu, ina ia mautinoa lava e le o fa’auia mai ia te’i latou le fa’ama’i i o tatou laufanua.”

Fa’aalia  e le ali’i Harbor Master, “O le isi lea mea sa fa’atuai ai ona tete’e e se atu le va’a, aua ua iloga mai ua fa’atuai lava ona faia tiute masani o tagata faigaluega ona tu’uva’a ese atu ai lea o le Fesco Askold mai le Uafu. E leai se isi e fia nofo va’ava’aia mo le 14 aso ona ua feso’otai ma le galuega fai ma lea va’a.”

O mea ua mautinoa nei ua usita’ia, “Leai ma se tasi na galue feso’ota’i ma le auva’a ma le va’a o le Fesno e le o nofova’ava’aia ma suesueina pea poo a’afia i verusi o le covid-19. O lo ua malupuipuia uma lava le atunuu i le taimi nei, ona o le vave ona fa’agaoioi o le fuafuaga fa’ataoto a le Matagaluega o Uafu & Malaeva’alele i le taofia o ana tagata faigaluega ma suesue pe ua a’afia i le fa’ama’i.” 

O lo ua le feso’ota’i fo’i nei tagata faigaluega a le DOH ma le Port Admin ma nisi atu tagata faigaluega, aua o le feso’ota’i lava o le avea fo’i lea o oe  ma se tasi e nofo va’ava’aia. O le ala lea o le taofia o galuega ae tu’ua e tagata faigaluega uma a le Uafu le latou Ofisa, se’i toe fo’i ane i le aso Lua.

Ua nofoia nei le fale e nonofomau ai sui ua suesueina i le fa’ama’i i Tafuna e le to’a 11 o sui nei e faigaluega feso’ota’I ma va’a e ulufale mai, fa’apea ma tagata na o i luga o le va’a lea e i ai le to’atolu o lana auva’a ua fa’amaonia o maua i le covid-19, Ua aofia ai i nei sui o i latou na fa’atinoa tui suesue o le auva’a a le Fesco Askold.

O mea la nei o lo ua manatu ina ia silafia e le mamalu lautele o le atunuu. ”E leai ma se tasi o le auva’a a le Fesco Askold na oo mai i lalo i o tatou laufanua. Ua loka uma lava i latou i luga o le va’a, e ui ina sa taula lea va’a i le tatou Uafu tele ma fa’ato’a tu’uva’a ese atu i le itula e 9:00 i le taeao o le aso Gafua na te’a nei.”

“O tatou tagata uma fo’i sa fa’atinoa galuega feso’ota’i ma la va’a a’o taula mai, ma le taimi o le a faia ai tiute e feso’ota’i ma lea va’a a’o taula mamao mai le Uafu, o i latou uma na e nofova’ava’aia ma faia i ai suesuega uma, ina ia mautinoa e le o afaina i sina taimi lava ua galue ai ma oo ai i luga o lea va’a oloa. O le faiga lenei, ia mautinoa ai, e le nofo lava lenei fa’ama’i i le atunuu.”

Ona o lea galuega vave ua fa’atino e le Matagaluega o le Soifua Maloloina ma le matagaluega o Uafu ma Malaeva’alele, ua mautinoa ai, e le o ulufale mai lava lea fa’ama’i ia i tatou, ua mautu ai pea i tatou i le ‘Faatulagaga Lanu Moana.’

Manatua ia fa’aaogaina lau pupuni fofoga, ma ia le toe pa’i atu  tatou i nisi e to’atele, fa’avavamamao i tatou pe alaala fa’atasi i so’o se nofoaga, ma ia le to’atele na’ua tagata i se nofoaga e tasi.