Ads by Google Ads by Google

Tofia afioga Fai’ivae Iuli Godinet, Kovana Itumalo Falelima i Sisifo


[ata: foa'i]

Pago Pago - AMERIKA SAMOA

 

I se tusitusiga a le afioga i le kovana sili ia Iuni aso 02, ma sa fa’alauiloa i le aso ananafi e le Ofisa o le Kovana, ua fa’ailoa ai e Kovana Lemanu P.S Mauga lana tofiga aloaia o le afioga ia Fai’ivae Iuli Godinet, e avea ma Kovana Itumalo o le Falelima i Sisifo.

 

E tusa ai ma aiaiga o le Fa’avae Toeteuteuina o Amerika Samoa ma tulafono fa’alotoifale, na taua ai e le kovana e fa’apea, ua mae’a ona fono le Fono a le Itumalo i Sisifo ma tuuina atu ai le latou fautuaga e ala i le Failautusi o Mataupu Tau Samoa.

 

Ma mai lea fonotaga, na filifilia ai Fai’ivae e avea ma Kovana Itumalo.

 

E talitonu le Samoa News, o le masina na te’a nei na fono ai ta’ita’i fa’aleaganu’u ma matai o le Itumalo i Sisifo lea na filifilia ai Fai’ivae i lea tofiga.

 

O le filifiliga na faia ina ua tuumalo ia Mati o le tausaga nei le afioga i le ali’i Kovana Itumalo i Sisifo o Fuamatu Joseph Fuamatu ua maliu.

 

Ona tuuina atu lea o le filifiliga a Fai’ivae i le Failautusi o Mataupu Tau Samoa, ma tuuina atu ai loa le suafa i le kovana mo le tofiga aloaia.

 

O le afioga ia Fai’ivae sa avea ma senetoa o le Itumalo o Fofo talu mai le tausaga e 2007 ma lea ua fa’atulaga e fa’avae mai i lea tofiga mo lona tofi fou, Kovana Itumalo Faleilma Sisifo.

 

I lalo o tulafono fa’alotoifale, pe a tula’i mai avanoa i le Senate, e tatau i le Kovana ona tu’uina atu ni tusi o le palota fa’apitoa e fa’atumu ai ia avanoa. Ae e lei maua se fa’amatalaga i le taimi na fa’asalalau ai e le Ofisa o le Kovana, po’o afea e tu’uina atu ai e Lemanu pepa o le palota fa’apitoa lea e fono ai ta’ita’i fa’aleaganu’u a Fofo e filifili ai le isi Senatoa.

 

O lo o malolo le Fono Faitulafono i le taimi nei ma toe taliu mai ia Iulai mo le Fono Lona Lua a le Fono Faitulafono lona 38.