Ads by Google Ads by Google

Tofia e le Kovana ia Dr. Aifili John Tufa, totino Komiti Faafoe o le Falema’i


[ata: SN]

Pago Pago - AMERIKA SAMOA

E ui i le talosaga a nisi o foma’i e fa’aauau ai pea le nofoaiga a le Sui Ta’ita’ifono o le Komiti Fa’afoe a le falema’i o le LBJ, ia Dr Jean Anderson, ae ua tofia e le afioga i le kovana sili ia Dr. Aifili John Tufa e avea ma totino o le Komiti, e suitulaga ia Dr Anderson, o lona taimi e muta ia Mati 30, 2023.

Na fa’amaonia mai lea tulaga i se i’ugafono na folasia i luma o le Senate i le aso Tofi ua te’a. O Dr Tufa o se foma'i fa'ama'i, ua fa'atulaga e tula'i i luma o le Maota Maualuga i le taeao nei, Aso Gafua, ma lana iloiloga i lea tofiga a le kovana. 

E pei ona lipotia muamua e le Samoa News, e 4 tusi na tuuina atu e foma’i e fa’amalosia ai le toe tofia o le Ta’ita’ifono o le Komiti Fa’afoe o le LBJ ia Dr. Malo Tuiolosega ma le Sui Ta’ita’ifono ia Dr. Jean Anderson, i le fa’ai’uga o le masina nei. O tusi na sainia e fomai mai le Emergency Room, Pediatric, ma isi vaega o le tausiga o le soifua maloloina a le falemai, faapea foi ma faifeautalai faafomai mai le Ekalesia a Iesu Keriso o le Au Paia o Aso e Gata Ai.

“O Dr. O Tufa o le a suitulaga ia Dr. Jean Anderson, lea e mae’a lona taimi i le aso 30 Mati, 2023. Na avea Dr. Tufa ma foma’i fa’ama’i o Amerika Samoa i le Matagaluega o le Soifua Maloloina mai le 2018 se’ia o’o i le 2022,” o se vaega lea o le tusi a le kovana i le Maota Maualuga. 

“O lona fa’amaoni i le su’esu’eina o le soifua maloloina i totonu o le Pasefika atoa ai ma lona poto masani i fa’ama’i pipisi o le a avea ai o ia ma aseta i le Komiti Fa’afoe,” o se tala lea a le kovana ai lana tusi i le Peresitene o le Senate, Tuaolo Manaia Fruean. 

O Dr Tufa sa taulamua i le taimi na feagai ai le teritori ma le misela i le 2019 faapea foi ma le COVID pandemic mai le 2020 seia oo mai i le taimi nei.

I lalo o tulafono o lo’o i ai nei, e na o le Senate e fa’amonia tofiga a le kovana mo totino o le Komiti Fa’afoe a le LBJ.