Ads by Google Ads by Google

Tofia kovana sili fa’atonu mo ofisa e tolu o le malo


Kovana, Lemanu Peleti Mauga [ata: SN]

Pago Pago - AMERIKA SAMOA

 

O le vaiaso ua te’a sa auina atu e Kovana, Lemanu Peleti Mauga, i ta’ita’i o le Fono Faitulafono, suafa o i latou ua ia tofia e avea ma fa’atonu sili mo ofisa e tolu o le malo:

 

• Lisa Tautalatasi Tuato’o, fa’atonu sili o le Ofisa o Pulega o Fesoasoanni mo Fa’alavelave ma le Suau’u (ODAPM);

 

• Dr. Misipati Salanoa, fa’atonu sili, o le Ofisa o le Enetia; ma 

 

• Aoelua Solomona Vaioletama Aoelua, fa’atonu sili, o le Ofisa o Fa’amatalaga Fa;alauaitele, le ofisa o le malo lea o lo’o fa’afoeina le KVZK-TV. 

 

I se vaega o lana tusi i ta’ita’i o le Fono, na fa’apea ai le kovana, o Lisa Tuato’o ua silia i le 20 tausaga o lana tautua i le malo o Amerika Samoa. “O lona tomai masani i le pulea o fesoasoani tau tupe mai fafo ma le pulea o ia gaoioiga ua avea ai o ia ma filifiliga lelei mo lenei galuega,” o se vaega lea o le tusi a le kovana. 

 

Mo le tofiga fa’atonu sili o le Ofisa o le Enetia, sa fa’ailoa e Lemanu i lana tusi i ta’ita’i o le Fono, e fa’apea o Dr. Misipati sa auau i le teritori mo le 34 tusaga. “O lona tomai i le tele o tausaga o lana auaunaga i le tusia o ripoti, galuega i tua, ma fesootaiga ua tele ai lona silafia mo lea avanoa ma ou matua fiafia e fa’ailoa atu lona agava’a,” o se vaega lea o le tusi a le kovana sili. 

 

I le fa’atonu o le ofisa mo le KVZK-TV, sa fa’ailoa e le kovana sili e fa’apea o Aoelua e i ai lona tomai masani i le Ofisa o Fa’amatalaga Faalauaitele ona sa galue ai o se pu’eata ma iu ina siitia lona tulaga e fai ma fa’atonu o le vaega e tu’afa’atasia polokalama a le KVZK-TV. 

 

“O lona tomai i pulega ia e fa’aopoopo i lona iloa o gaoioiga tau fa’asalalauga ua avea ai ia ma filifiliga sili mo lenei tofiga,” o a Lemanu lea i lana tusi i le Fono Faitulafono. 

 

O le aso Faraile ua te’a sa fa’auluina ai nei tofiga a le kovana sili i le Maota Maualuga ma ua fa’atulaga ai iloiloga e pei ona masani ai e le Fono. 

 

Ua tuuina atu foi e le Ofisa o le Kovana i le Fono Faitulafono fa’amaumauga o agava’a o nei tofiga e aofia ai tulaga o aoaoga ma tikeri ua latou uumia.

 

O le taeao ananafi sa faia ai iloiloga a komiti e lua a le Maota Maualuga mo Aoelua ma Dr. Salanoa, ae o le iloiloga mo Tuato’o ua fa’amoemoe mo le taeao nei. 

 

Ma o le taeao nei foi ua fa’amoemoe le Maota Maualuga e palotaina ai tofiga uma nei e tolu mai le kovana sili.