Pago Pago - AMERIKA SAMOA

O lo’o ua ta’ua i faamaumauga a le malo, ia le o’o mai o se valaau i le Ofisa a Leoleo i Tafuna, i le 10:23 i le Taeao o le aso 14 o Aukuso, 2024, e uiga i ni alii se toatolu, o lo’o tau’aia tala ale i luma o se faleoloa i Vaitogi.

Ina ua taunuu leoleo, na sola le tasi ae lokaina mai e leoleo le toalua.

O i la’ua ua molia i le tulafono, o Leututu Toloafa ma Desmon Poutasi.

Ma le lona tolu e le’i maua Lona suafa se na vaaia e leoleo o lo’o u’uina se agaese. Lea sa aveina e leoleo ma tu’u i totonu o le latou taavale.

Na taumafai le alii o Poutasi e sola mai i leoleo ae na vave ona mau ai se tasi o leoleo. Sa taumafai le alii o Poutasi e po ese le lima a le leoleo ma taumafai e sola ese ma leoleo.

Ae o le taimi foi Lena, o lo o taumafai ai Toloafa ma le alii lona tolu e sosola ese foi mai i leoleo.

Na fai sina umi o fetosoa’i leoleo ma Poutasi.

O lo’o ta’ua foi i faamaumauga a le malo le taumafai o Toloafa e ave le agaese mai i le faa ale a leoleo a’o tauivi pea leoleo ma Poutasi.

Na liliu mai leoleo ma tuli Poutasi se faasaga mai Toloafa ma ma’a, i leoleo.

Na i’u lava ina lokaina e leoleo ia Poutasi ma Toloafa ma aveina atu loa la’ua i le Ofisa a Leoleo.

Ae e le’i maua le alii lona tolu.

O le taeao lava lea e tasi, na toe fo’i ai leoleo i le faleoloa i Vaitogi e vaai pe iai se ata vitio a le faleoloa.

O lo’o ta’ua i faamaumauga a le malo, le vaaia e leoleo i le vitio ia ni alii se toatolu o savavali i se taavale na paka i fafo o le faleoloa.

Ma na vaaia le alii lea e le’i maua e leoleo, Poutasi, ma Toloafa, o savali atu i se taavale o iai se tagata i totonu, ae o lo’o u’u e Poutasi ia se laupapa.

Na vaaia foi le oso mai i fafo o le tagata sa i totonu o le taavale ma se agaese ma tuliesea ai le toatolu lea.

Ae tamom’e i latou ua molia, pe a ma le 20 futu le mamao mai i le taavale, ma tau’ai mai le taavale, i ma’a.

Na le gata ina ta’e ia moli o le taavale ae na faapea foi ona faaleagaina le tino o le taavale, i ma’a sa tau’ai mai e i latou ua molia.

Ina faatalanoaina e leoleo Poutasi ma Toloafa, na faamatalaina e Poutasi, na o la aisi sikaleti mai i le tagata lea sa i totonu o le taavale ae fia fusu mai le alii lea.

Na ta’ua foi e Poutasi, le ‘a’apa o le alii lea i le nofoa i tua, ma u’u mai le agaese.

Lea, na o latou sosola ese ai ma tau’ai mai le taavale, i ma’a.

O le aoauli o lea lava aso, na o’o atu ai le na a’afia i lenei faalavelave, i le ofisa a leoleo ma lana taavale sa faaleagaina, aua faamaumauga a leoleo.

Na faamatalaina e le na aafia le mafuaaga na la o ai ma le toalua a lona tausoga i le faleoloa, ina ia faatau mai se ti o le taeao a le fanau.

Ae faatu le la taavale e se alii I luga o le auala, mo se fesoasoani i le aveina o ana fualaau ‘aina i le faleoloa.

Ma a’o latou aga’i atu i le faleoloa, na valaau mai le toatolu ua molia ae e le’i tu ai le latou taavale.

Sa ta’ua e le alii na afaina, lona iai i totonu o le faleoloa ae ona faalogo mai i ni tagata o ‘e’e ma palauvale i fafo o le faleoloa.

Ina ua ia savali mai i fafo, na ia vaaia ia alii e toatolu lea na i luga o le auala, o lo o tau’aia le taavale.

Ma sa o latou tuli’esea ese nei alii ma na ona fesoasoani ifo nisi o le nu’u ia latou.

Sa faapena foi le molimau a leisi alii sa iai i totonu o le taavale.

Ma sa ta’ua e lenei alii, na o latou pasi mai i le au toatolu faatupu faalavelave i luga o le auala, o palauvale atu ia i latou.

Ma ina ua paka le latou taavale i luma o le faleoloa, sa aisi mai se tasi o i latou ua molia, mo se sikaleti, lea na ia tali atu iai,  e leai sana sikaleti se lu’i mai o ia e Poutasi.

Ma o le taimi foi lea na vaaia ai le alii lea e le’i maua e leoleo, oi ia o lo’o u’u ina se agaese.

Sa ta’ua e le na aafia, lona iloa lelei, o le a osofa’ia o ia e i latou ua molia.

O le mafuaaga lea na ia aapa i tua o le taavale ma u’u mai le agaese ma savali atu loa e tuli’esea.

Ua molia nei le toalua i moliaga, e Sofia ai;

Faitauga 1:  Tete’e i leoleo i le faatinoga o latou tiute; o se vaega ‘A’ o solitulafono mama, e mafai ai ona nofosala i le le sili atu ma le tausaga , po o se sala tupe e le silia ma le $1,000; po o faasalaga uma e lua.

Faitauga 2&3:  Faaoolima i lona tulaga e tolu, o se solitulafono e le silia ma aso e sefululima, po o se sala tupe e le sili ma le $300; po o faasalaga uma e lua.

Faitauga 4:  Faaleagaina o meatotino i lona Tulaga Muamua; o se vaega ‘D’ o solitulafono mamafa; po o se sala tupe e le sili ma le $5000; po o faasalaga uma e lua.

E $5,000 le vaegatupe sa faatulagaina e tatalaina ai i latou ua molia, e faatalitali ai a latou faamasinoga.