Pago Pago - AMERIKA SAMOA

O lo’o ua faamaumauina i fa’amaumauga a le malo, se alii e 30 tausaga na tofu i le falepuipui ona o le le fa’alogo.

E tusa ai ma fa’amaumauga a le malo, o le po o le aso 26 o Aukuso, 2024, na vala’au ai e se ulugalii ia le Ofisa a Leoleo i Tabuna, ona o le susuga ia Fa’amanu Kitiona, na taumafai e gaoi le la taavale.

E taunu’u leoleo i le nofoaga na tupu ai le fa’alavelave, o lo’o taofiofi mai e le ulugalii ia Kitiona.

Sa faamatala e le tina, lona iai i totonu o le la potu moe ae o la fa’alogoina le ola o le la taavale.  Ma na o la tamomoe mai i fafo, ma maua mai ai le ua molia, i totonu o le taavale.

Ae na ta’ua foi e le tina, o le ki o le la taavale, sa i totonu o le fale.

Na faapea foi ona faamatalaina e le tamaloa lona va’aia o le ua molia, i se taimi o lea lava aso, o siakiina ia faxtoto’a o le taavale, e vaai pe mafai ona ia tatalaina.  Ma sa ia faatonuina ia le ua molia, e aua ne’i ona tago i le taavale.

Ae peitai, o le afiafi lava lea, a’o la i totonu o le la potu ma łona to’alua, są ia fa’alogo mai ai, ua ola atu le taavale.  Ae o le ki o le taavale sa i luga o se laulau sa i totonu o le potu malolo.

Na faapea loa ona ave faapagotaina e leoleo ia Kitiona ma molia o ia i;

Faitauga 1:  Faomea i lona tulaga muamua, o se vaega ‘B’ o solitulafono mamafa, e mafai ona faasala ai i le falepuipui i le va o le lima ma le sefululima tausaga.

Faitauga 2:  Faomea i lona tulaga e lua, o se vaega ‘B’ o solitulafono mamada, e mafai ona nofosala ai i le falepuipui, i le va fo’i o le lima ma le sefululima tausaga.

E $10,000 le vaegatupe na faatulagaina e tatala ai le ua molia, e faatalitali ai lona faamasinoga.