Ads by Google Ads by Google

Tolopo fonotaga Polynesian Leaders Group

TAPUNIA AOGA UMA I AMERIKA SAMOA MO LE 30-ASO

                          

O le aso lenei, Mati 23, e aloaia ai le tapunia o aoga a le malo, aoga tua, Kolisi Tu’ufa’atasi a Amerika Samoa ma day care centers mo le 30-aso i lalo o se suiga o le poloaiga a Kovana Lolo Matalasi Moliga, aua le taumafai e aua ne’i pepesi le fa’ama’i coronavirus, COVID-19, i totonu o le teritori.

 

Fa’ailoa e le Taitaifono o le Komiti Fa’afoe a le Coronavirus i Amerika Samoa, Iulogologo Joseph Pereira, “Ua mae’a nei ona fa’atulaga mai le suiga e le afioga Kovana Lolo Moliga, le tapunia o aoga uma i Amerika Samoa i le lisi o aiaiga mo le Code Blue, ae le o le Code Yellow e pei ona fa’atulaga muamua ai.”

 

“E tusa ai ma suiga fou ua matauina i le vave ona fa’ateleina o tagata e pesia pe a oo ina ulufale le Coronavirus i so’o se atunuu, ua matua tapena ai le Komiti Fa’afoe ma le fa’auluuluga o le tatou Malo, ina ia matua puipuia lava le tatou atunuu, ma ua le manatu lava ina ia tuuina se avanoa e mafai ai ona oo mai ai le Coronavirus ma a’afia ai se tasi o le atunuu.”

 

TAPUNIA UMA PAKA MA MALAE TA’ALO MO LE LAUTELE

 

Ua fa’ailoa e le Matagaluega o Paka ma Malae Taalo le tapunia o paka a le malo i totonu o le atunu’u, e pei ona i ai aiaiga a le malo e fa’asaina fa’atasiga mo le toatele o tagata i nofoaga faitele.

 

“Ona o le tulaga e fa’amalosia a’ia’i fa’asa ua fa’atulaga mo nisi e fia  fa’apotopoto fa’atasi mo fa’atasiga a aiga, sosaiete ma ta’aloga, ua fa’ailoa fa’alaua’itele ai, ua le toe talia foi ni fa’atasiga e faia i laufanua faitele a le malo, lea e va’aia fa’apitoa e le matagaluega o Paka & Malae Ta’alo mo Ta’aloga ma fa’atasiga a le mamalu lautele o le tatou Malo,” o se tala lea mai le ali’i fa’atonu Ken Tupua.

 

Nofoaga tapunia: Paka Liona i Tafuna;  Paka i Fagaalu;  Paka i Utulei; Paka o le Suigaula;  Fagatogo Malae o le Talu; Paka i Fagatogo Square; Paka i Malaloa; Paka i Pago Pago; Paka i Onesosopo; Paka i Amanave ma le Paka i le Malae Pesipolo Tafuna.

 

AOINA MEA’AI TU’UAPA MO HOPE HOUSE - SPED & AOGA MATAFAO

 

I le aso Faraile na te’a nei, sa galulue fa’atasi ai faia’oga i le a’oga tulaga muamua i Matafao e tu’ufa’atasia le foa’i o mea’ai tuu apa ua tapena e fanau a’oga, ose latou fesaosoani fa’ameaalofa na fuafua e fa’ao’o i le Hope House i le fa’aiuga o lenei masina, lea e fa’apitoa mo le fanau uma o aofia i le Polokalama o le SPEd i le Matagaluega o A’oga.

 

“O se fa’ataua lava lea ua leva ona fuafua e le matou foi vaega o le SPEd i Matafao Elementary. Ia faia uma le matou fa’ataua mo le polokalama ma le fanau ua auai ai, o galuega tima’i ma le taumafaiga fa’apitoa ina ia a’oa’oina tutusa nei fanau ma isi uma o fanau a’oga i totonu o Matafao. O se galuega alofa fo’i le foa’i mo le fa’amoemoe mo i latou o lo’o tausia i le Hope House i Fatuoaiga,” o se tala lea a le ta’ita’i o le SPEd program i Matafao Elementary i le aso Faraile na te’a nei.

 

O le fa’amoemoe sa tuu e amatalia i le aso Gafua i le latou talotaloga i le amataga o le taimi mo aoga i le Laumua, ma o le latou fa’alauiloa lea i le mamalu lautele e tusa ai o le latou fa’ataua o le fanau uma ua a’otauina e saili le atamai i le SPEd.

 

Peita’i ona o le poloa’iga ua fa’amamaluina e taofia ai a’oga mo le masina atoa e afua ia ona le taunuu ia fa’amoemoega uma, ae ua faia loa lava ma le tuufa’atasiga o le meaalofa mo le Hope House e molita’i e aui faia’oga a le SPEd i Matafao, ae ua le fa’ataunuuina nisi o mea masani ona faia a le Matafao Elementary i tausaga ta’itasi mo lea polokalama.

 

TAGATA MALIU I LE CORONAVIRUS TERITORI O GUAM

 

I se lipoti o fa’asalalauga o lo’o fa’ailoa ai o le tina e 68 tausaga le matua, sa togafitia fa’apitoa i le Coronavirus ua maliu o ia i le teritori o Guam i le Guam Memorial Hospital i le fa’aiuga o le vaiaso ua te’a.

 

O le ali’i foma’i Dr Mike Cruz, o ia lea o se tasi o loo auai o se sui o le Komiti fa’apitoa a Guam e va’aia toto’a le fa’ama’i pepesi o le Coronavirus ma ona a’afiaga i le mamalu lautele o lea teritori o le Malo tele, sa ia saunoa mai, “E tele isi gasegase sa a’afia ai lenei tina, ma ua fa’aopoopo atu i ai ma le Covid-19, ua maliu ai nei o ia.”

 

O nisi o gasegase sa togafitia ai lea tina matua, e aofia ai ma le fa’amamaina o lona toto. Ua fa’ailoa mai fo’i e Cruz ua atoa le 15 o i latou ua taofia ma taumafai ona togafitia i le Coronavirus i le taimi nei i Guam talu mai ona ulufale atu lea Fa’ama’i pipisi i ona laufanua.

 

O le to’alima o nei sui na muai maua ai i le Coronavirus na malaga mai fafo ma ulufale atu i Guam, o le to’atele sa malaga mai i Filipaina.

 

TAMAITAI TAUTU HAWAIIAN AIR MAUA I LE CORONAVIRUS

 

I le lipoti fa’asalalau mai Honolulu, o lo’o fa’ailoa ai o se tasi o tamaita’i tautu i luga o le va’alele a le Hawaiian Air ua mae’a suesuea ma ua maua ane o lo’o maua i le Coronavirus. Ua fa’ailoa mai fo’i e se sui iloga o le Kamupani Va’alele a le Hawaiian Air, “Ua matou maua mai se tala ua fa’amaonia ua maua se tasi o matou tamaitai tautu uaina i luga o matou va’alele i le coronavirus.”

 

“O lea lava tama’ita’i ua maua i le Coronavirus sa faia lana malologa mai le galuega, ma ina ua toe taliu mai e faigaluega, ae vaaia loa ua gasegase ia Mati 18, 2020 ae le’i toe amata mai ona faigaluega.”

 

Ua ia fa’ailoa fo’i, “O se mea lelei sa ia va’aia le foma’i ma ua fa’amaonia ai, o loo maua o ia i le Covid-19.” Ua faailooa mai o lo ua latou fa’amalosia le latou sui faigaluega ina ia tumau i togafitiga ma fautuaga uma ua tuuina atu fa’apitoa e foma’i ina ia vave ona malosi lelei o ia, ma o lo’o tausia fa’apitoa nei o ia. O i latou uma fo’i o feso’ota’i ma lea sui, ua va’ava’aia toto’a i latou e foma’i ma ua usita’ia uma lava fa’atonuga mai le CDC ma foma’i fo’i e fa’atatau i le Covid-19.