Pago Pago - AMERIKA SAMOA

O le aso Tofi, Aukuso 31, 2023 na auai atu ai le susuga i le Loia mo tagata lautele (PD), o David Vargas, i se iloiloga Aufaatasi a le komiti o Tupe a le Senate ma le Maota o Sui, aua le paketi o le tausaga tupe 2024, faatasi ai ma se sui mai i le ofisa a le kovana.

Sa fa’aalia e le sui Fofoga Fetalai, le afioga i le Faipule ia Fetu Fetui Jr., lona le fiafia tele i le auai le saunia mai o nei sui e toalua.  Ma na ta’ua e Fetu, ana o ia o lo o faafoeina lenei iloiloga, ua leva ona tutuli i fafo i la’ua.  Sa saunoa Fetu, ua loa ona auai Vargas i iloiloga faapenei ma ua tatau ona malamalaga i le faagasologa o nei iloiloga.  Ma sa ta’ua e Fetu e faapea, e leitioa foi tele tagata o lo o faatalitali a latou faamasinoga, ona o ia (faatatau ia Vargas).

O lea na faatulai ai loa e le sui Fofoga Fetalai se manatu ina ia toe tu’u atu se avanoa i le PD e toe foi ai e toe sauni atu mo le iloiloga.

Na faatulai e le Peresetene o le Senate, le afioga Tuaolo Manaia Fruean, se tusi mai i le alii Faamasino Sili o Amerika Samoa, lea sa aveina atu i le kovana sili, le afioga Lemanu P. S. Mauga, i le masina o Aukuso.  Na ta’ua e Tuaolo le ta’ua e faamasino sili i totonu o lana tusi, le manaomia o se loia mo le ofisa o Loia mot agata lautele (OPD) ona ua gasegase tele Vargas ma ua le toe mafai ona faafoeina lea ofisa.

E le gata i lea, na saunoa Tuaolo, le ta’ua i totonu o le tusi a le Faamasino Sili, le manaomia ona toe faaopoopo se vaegatupe i totonu o le paketi a lea ofisa, e mafai ai ona totogi se loia.  Na saunoa Tuaolo, afai ua le tali le Malo i le talosaga a le Faamasino Sili, ua tatau loa ona tulai mai le Fono e fai iai se fuafuaga i lea mataupu.

Ae peitai, na saunoa Tuaolo, e mafai ona faatumulia le falepuipui, ona o le leai o ni loia, e le gata i totonu o le ofisa loia mo tagata lautele (OPD) ae faapea foi loia tutoatasi, e mafai ona latou faafoeina nei mataupu.

Ina ua fesiligia e le komiti ia molimau a le malo i auala o lo o latou sailia ai ni loia fou, na tali le molimau na toalua ma Vargas, o lo o fa’aauau pea ona o latou taumafai e saili mai ni loia e galulue i le OPD, ae peitai, o le toatele o loia mai atunu’u i fafo, e tete’e i le totogi e $60,000 o lo o ofoina atu.

Na fa’aalia e le afioga i le Faipule ia Larry Sanitoa e faapea, o lenei faafitauli e tulai mai i tausaga uma lava ma o se mataupu e a’afia ai le faavae o le malo.  Na saunoa Sanitoa, e tatau ona iai se loia i le ofisa a le OPD.

Na faatulai e le afioga Senatoa Togiola Tulafono ia se mau ina ia mafai ona tu’ua e molimau le iloiloga, ae ia pasia loa le latou paketi.  Na saunoa Togiola, afai ua leai lava seisi auala e mafai ona fofoina ai lea faafitauli, ia pasia loa le latou paketi.

Na saunoa foi Togiola, o lo o mafai ona filifilia e le Faamasinoga ia loia lotoifale e mafai ona fesoasoani i le Ofisa Loia a le Malo mo tagata lautele.  Na toe u’unaia e Togiola ia le pasiaina e le Fono o le paketi a le OPD.

Na fesiligia e Fetui po o le a se mea e ono tupu mai pe afai ae pasia e le Fono ia le paketi a lenei ofisa.

O lea na faaalia ai e le taitaifono o le Komiti o Paketi a le Maota o Sui, le afioga i le Faipule ia Vailoata Eteuati Amituanai, ia le mau ina ia toe tolopoina le iloiloga o le paketi mo le ofisa loia a le malo.

Na toe faamanatu atu e Fetui i sui faitulafono, le toatele o tagata ua leva ona loka i le falepuipui e faatalitali ai ni loia e fesoasoani i a latou mataupu.  Na saunoa Fetui, afai ua le mafai e le malo ona faia iai se fuafuaga, ua tatau loa ona faataunuu se auala e toe aoaia ai ma tatala loa i tua i latou. 

O lea na pasia ai le mau ina ia toe tolopo le iloiloga mo le paketi a le Ofisa Loia a le malo, ae ua fautuaina molimau ina ia toe o mai saunia.