Ads by Google Ads by Google

Totogi e le Medicaid suega COVID-19 e faia i Hawaii mo le malaga i Amerika Samoa


[ata: foa'i]

Pago Pago, AMERIKA SAMOA

 

Ua matua fememea’i lava tagata malaga, aua o latou avanoa sa mautinoa na fa’atulaga e toe fo’i atu ai i Samoa ia Aukuso 26, na toe tolopo mai ia Setema 13 ma Setema 27 i le va’alele a Hawaiian Air ae o lea fo’i ua toe fa’ailoa mai, ua toe tolopoina lea mo soo se malaga e fia fo’i atu ai nisi ia Oketopa 2021.

 

Ona o le toe tolopoina ona fa’aaoga o le TalofaPass ae toe faia le tauofoga, ua fa’atuai ai ona tatala le tatou feoaiga i le va o Hawaii ma Amerika Samoa.

 

Peita’i ua toe afuafua ai nei le tatalaga ua i ai nei ae fa’aaogaina le Polokalama Fa’aupega Tafailagi o le “TalofaPass” e fa’atulaga mai ai le tapenaga a tagata e fia malaga atu i Amerika Samoa, ina ia le sao atu lava se tasi ma le Covid-19 i le teritori.

 

Ua fa’ailoa e le Ofisa o le Medicaid a Amerika Samoa i se pepa o fa’amatalaga, mea e mo’omia ona tapena i ai sui e fia malaga atu, ma faia tapenaga mulimuli i Hawaii a’o le’i oso i le va’alele a le Hawaiian Air mo le malaga atu i Amerika Samoa.

 

I soo se setete o aumau ai le tagata malaga, e ao ina latou fa’afeso’ota’ia muamua lava lena setete i nofoaga e mafai ona faia ai lana suega 19 aso mai le aso ua fa’atulaga ai lona avanoa e malaga ai, a le Hawaiian Air, le va’alele lava e tasi e mafai ona faia faigamalaga i Amerika Samoa.

 

A uma le suega 19 aso e tatau ona faia lou suega o le toe 10 aso i le setete o e alaala ai, ona amata loa lea ona fa’aavanoa lou malaga mai i Hawaii mo suega e lua o totoe, moe le 5 aso ma le lua aso e malaga loa i lou avanoa ua mae’a fa’atulaga e le Hawaiian Air, ae le o le Medicaid.

 

I le taimi nei, o le TalofaPass ua i ai fa’atonuga o nei mea uma, ma e ao ina fa’aaoga a’ia’i mo mea uma e fa’aulu mai ai fa’amaumauga a le sui malaga i Amerika Samoa ma i latou foi e fia malaga ese mai Amerika Samoa.

 

Mo suega o le Covid-19 mo le 5 aso a’o le’i malaga ma le lua aso a’o le’i malaga, e totogia lea e le Medicaid mo Tagata malaga uma i Amerika Samoa, o i latou e tatau lava ona malaga i Amerika Samoa ona o galuega ma ua toe taliu ua mae’a talavai.

 

Ua mana’omia fo’i e le Medicaid se fa’atupega e talafeagai ma lea tupe e totogia mo sui uma e fia malaga i Amerika Samoa i Hawaii. O le vaega tupe lea, e fa’ato’a toe fa’atumu e le Medicaid pe a mae’a ona tulaueleele ma le saogalemu lea malaga i Amerika Samoa, e pei lava o mea uma e fa’atupe e le Medicaid.

 

Ua mautinoa e le taugofie lenei tuiga mo tagata Amerika Samoa e fia malaga mai i Amerika Samoa pe afai o le a tuuina atu ia i latou e totogia nei suega i Hawaii. O se fa’atusatusaga, mo le aiga e to’afa ae ta’i tolu suega e ao ina faia, e mana’omia le aofaiga o le seleni e $1,680. O le faiga o suega e tolu i Hawaii mo le tagata e to’atasi e $140 i le tui e tasi.

 

I le taimi nei ua mae’a feutaga’i ma le CMS, e mafai ona fa’atupe e le Medicaid nei suega mo sui malaga atu i Amerika Samoa, pe afai o le a mua’i sainia e le sui lona totogia o se tinoitupe ua fa’atulaga e fesoasoani ai i le Medicaid i lea fa’atupega.

 

Ua mae’a fo’i ona faia se maliliega a le Capture Diagnostics, o le a latou faia tui e leai se fa’atuai pe fa’atali ona o lo’o tauau e le toe aoga tui nei pe afai o le a le fa’aaogaina vave, ma o le a fa’aaogaina a’o le’i atoa le 24 itula e tu’ua ai Hawaii.

 

O le faiga fou lenei  ma ona maliliega uma ua fa’atulaga, sa amata ona fa’aaogaina i le au malaga ia Aukuso 30, 2021 lea ua toe mae’a taliu ese mai le atunuu i lea lava aso ae to’ai taunuu i Honolulu ia Aukuso 31, 2021.

 

O le va’alele lea o lo’o malaga ese atu ai le to’a 31 o i latou e fia faigaluega ma ua talia fo’i e faigaluega i le Taylor Farms i Uosigitone.

 

Pe a uma ona faia au suega e fa’amoemoe e fa’aaoga e te malaga ai, e tatau ona fa’auluina atu lau suega ma lona i’uga i le “TalofaPass” mai le setete o e alaala ai.

 

I totonu o Uosigitone ua fa’amautu mai ai le kamupani a le “Walgreens.com” e faia ai lou suega i so’o se latou lala o lo’o latalata ane i lou tuatusi. Ua i ai latou itula ua fa’avasegaina mo lea tautua. I aso Gafua, Aso Lulu ma aso Faraile e mai le itula e 8:00 - 10:00 i le taeao taimi a Uosigitone.

 

“Ua nao le tasi le vaiaso talu ona tatala mai le “TalofaPass” e fa’aaogaina e le mamalu femalaga’i, ma e tatau lava ona i ai ni lape, ae alofagia e le mamalu lautele e fa’aaogaina vave lea sootaga o le tautua mo faigamalaga, ia fa’ailoa mai, ina ia mafai ona fa’aleleia atili lea tautua,” o se tima’i lea a le tamaitai Fa’atonu o le Medicaid Sandra King Young.

 

O lo ua mae’a nei ona fa’atula’ia le TalofaPass i le gagana peretania, ae o lo’o galueaina pe tapena mai le TalofaPass i le Gagana Samoa, ina ia fa’afaigofie atili mo tatou tagata matutua ma e fiafia e fa’aaogaina le tatou gagana mo lea fo’i tautua.

 

Manatua o lou avanoa e te toe fo’i ai i Amerika Samoa e fa’amoemoe lea i lou avanoa ua mae’a fa’amauina e le Kamupani Va’alele a le Hawaiian Air, ae le o le Ofisa o le Medicaid, se’i vagana lava malaga latou o lo’o fa’atautaia a le Medicaid mai Amerika Samoa e fia oo i Honolulu.