Ads by Google Ads by Google

TU LUA O PO MA AO, VAEGA 4

Na gata mai le tatou tala I le taimi o taumafai ai le alii o Tavita Ioanetone e fai sana malologa, ona ua alu le po atoa ma le taeao na soso’o ai, o ia tau sailia le tagata na fasiotia ia Rasela Salemana ae peitai, sa fiu Tavita e moeiini ona mata, ae alu lava lona mafaufau I le tamaitai o Tepora Uatisone.

Ae fa’aauau mai loa lau faitau.

O le taimi tonu lava lea o le aoauli o lo’o fai ai finauga a Tavita ma lona aluga I luga o lona moega, ae o le taimi foi lea na faatoa toe taunu’u ane ai Tepora I lona fale, sa alu e faitatala I le fale o Rasela, ma ua o latou faafesaga’I nei ma uso o lona tina, I totonu o le latou potu malolo.

“Ua a?” o le fesili muamua lea a le uso o lona tina, o Mele.

“E moni lava le tala a le alii lea na sau, na maliu fasia Rasela anapo,” o le tali atu lea a Tepora.

“O le a se mea na e vaai ai I le fale o Rasela?” o le fesili tatao atu lea a leisi uso o lona tina, o Ema.

“O la e tumu uma luma o le fale I tuaoi faitatala ma la sa iai le leoleo I le faitotoa o le fale,” o le tali lea a Tepora.

“Na iloa ifo oe e seisi?” o le fesili lea a Mele ma ona foliga popole.

“E leai,” o le tali atu lea a Tepora ma ia taumafai e faato’ato’a le loto popole a Mele.

“E tatau lava na tatou faaeteete,” o le faaopoopo mai lea a le tina ia Ema.  “Ou te Iloa lava e o’o lava ina lomia le tala o le maliu o Rasela i totonu o nusipepa.  E le lelei ae ono ta’ua atu ai ma lou igoa I lenei faalavelave.  Aemaise lava o lea na lomia le tala I le nusipepa e uiga i au taleni faataulasea.”

“E te le toe tau faamanatu mai,” o le tomumu leo lemu lea a Tepora.  “Sa le tatau lava na ou faalogo ia oulua ma Aunty Mele.”

“Pau lava le mea, ia aua lava ne’I iloa e tagata na e iai I le fale o Rasela I le po anapo.  Ma ia tatou tatalo e moni le tala a le alii o Tavita e uiga I le lisi o igoa o tagata sa I le fale o Rasela, lea na te umia,” o le tulitatao atu a Ema.

“Na fai mai le alii e na te le aveina le lisi I le ofisa o leoleo,” o le tali mai lea a Tepora.

“Ia ae faafefea ona tatou faatuatuaina lana faamatalaga,” o le faaleoina lea o le popolega a le tina matua ia Ema.  “E tatou te le masani lelei ma lenei tamaloa.”

“Pau a le mea ou te fia iloa, po o le a le mea o I totonu o le tusi (diary) lea o lo’o tau saili e Tavita,” o le fesili faalemafaufau lea a Tepora, ia te ia lava.

Na tilotilo alofa atu Tepora I foliga popole a uso o si ona tina.  O lo’o ia nofo ma le avega mamafa, o Ia le mafuaaga ua o latou nonofo ai faapenei ma nai loomatutua.  O nei tina matuatua, o Mele ma Ema, sa tausia mai lava o ia a’o laititi o ia, ina ua maliliu nai ona matua.  Ma e leai seisi I tua atu o nei loomatutua, e pele I le loto o Tepora, nai lo I la’ua.

“Mata na iai le tagata lea na fasiotia Rasela I fafo o le fale I le taimi atoa na tatou iai I totonu o le fale anapo?” o le fesili lea a Mele.  “Oka tafefe e”.

“E iai seisi mea na e vaai ai I le fale o Rasela ananei?” o le fesiii lea a Ema.

“Sa ma talanoa ma se tamaitai sa teufale I le fale a Rasela, na tutu I fafo I le taimi na ou iai.  Sa ia faamatala mai ia te a’u le faatama’ia o le tele o meafale I totonu o le fale a Rasela, faapea le gasu o le fale, e pei na agi ai se afa I totonu,” o le tali lea a Tepora.

“Sa ta’ua foi e le teine teu fale ia le mauaina o se uati ua nuti, I tafatafa o le tino maliu a Rasela, ae na pe tonu lava le uati, I le ta o le 12 tulua o po ma ao”.

“Ia ai o seisi ua le fiafia ia Rasela I le pepelo o ana mea ia e fai, lea e fai mai e mafai ona talanoa ma tagata ia maliliu,” o le tala lea a Ema.

“O lo’o talitonu le alii lea o Tavita, o le mafuaaga o le maliu o Rasela, ona o se tusi o talaaga o le soifuaga (diary).  Ae ou te iloa, e iai se tamaitai e le fiafia lava ia Rasela a’o soifua o ia.  O se fafine e igoa ia Tina,” o a Tepora lea.

“Maimau pe ana tatou le o I le fale o Rasela anapo,” o le tala lea a Mele.

Na vaai alofa Tepora I foliga popole a nai uso o lona tina ma ia faapea ifo ia te ia lava, “E le mafai ona ou nofonofo ae tatau ona fai sa’u fuafuaga I le mea lea.  A iloa e tagata na matou iai ma nai o’u Aunties I le fale o Rasela anapo, e toe tutupu mai foi ni faalavelave e pei o tausaga ua tuanai, ma aafia ai nai loomatutua”.

E FAIA PEA