VAEGA 19

E faatalofa atu i si o tatou aiga i lenei taeao fou.  Tatou si’I faatasi le mua ma le viiga faafetai i le Tapaau i le Lagi ona o lana pule faasoifua, o Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama.  E faafetai atu foi ia te outou o lo o lagolagoina lenei auaunaga i vaiaso taitasi.

Ae saga’i mai loa, o le a toe soso’oina le tatou tala i le alii o Tavita ma le tamaitai o Tepora ma le tau sailiga o le ‘diary’ faitatala lenei ua fasiotia ai nai mafine o Rasela ma Tina.

************************

Na gata le tatou tala i le vaiaso ua mavae ina ua faamatalaina e Tavita le mafuaaga o lo o ia naunau ai e maua le ‘diary’ lea sa ia Rasela, ona o lo o iai talaaga o lona aiga, e ono afaina ai nai lona uso aemaise si ona tuafafine lea ua sauni atu e faaipoipo atu i se alii mau’oa o le latou nu’u.

Na ta’ua e Tavita e faapea, o lo o iai sona talitonuga, e maua loa e tagata lenei ‘diary’ ma o latou faailoa atu i le aiga o le alii lea ua faamoemoe e faaipoipo i lona tuafafine le olaga o si o na tuafafine, o le a fulitua le aiga o le alii faaipoipo i si o na tuafafine.

O le mea lea o lo o naunau ai lava Tavita, ia maua mai le ‘diary’ lea se’i susunuina, ma nana ai le tala’aga faanoanoa o lona aiga.

Ina ua maea le faamatalaga a Tavita, sa ia liliu atu ia Tepora ma ia faapea atu, “Ou te manao e te feiloai atu i lo’u aiga.  O le po a taeao, e faia ai se faatasiga I lo’u fale mo lo’u tuafafine ma si ana manamea.  O mai ma uso o lou tina tatou te talisua faatasi ma e feiloai atu ai i lo’u tuafafine.”

O Tepora ua tau me’ia i le valaaulia a Tavita.  Manatua foi, o lea foi e iai nai mea lilo i le aiga o Tepora ma uso o lona tina o lo o tau nana foi, o le mafuaaga lea o lo o ia naunau ai foi e maua mai le ‘diary’ lava lea e tasi o lo o tau saili e Tavita.  Ona o lo o tusia ai foi nisi o talaaga o lona fo’i aiga, e le o manao e iloa e le lautele.  Ma o le mafuaaga foi lea, ua le toe auai atu ai i latou i ni faatasiga tetele, ina ne’i fetaui ai ma seisi e manatua le faalavelave na tupu i lo latou aiga.  O se faalavelave o lo o taumafai le toatolu lea ia natia.

Na fiu Tepora e saili se auala e tete’e ai le valaaulia a Tavita, ae pei o le selo ia Tavita mafaufauga uma a le tamaitai tusitala, e sau lava ma toe tali atu, na I’u ai lava ina manumalo le finau a Tavita ma ioe ai loa Tepora, o le a latou auai atu i le faatasiga i lona fale.

“Ia o lea ua mae’a lena mataupu.  Ae e tatau ona ta o e talanoa i le loomatua lea sa auai i le polokalama a Tina i le po na maliu ai.  Le loomatua lea sa talanoa ma le tagata maliu, lea na faatonu e ave ana tupe e inivesi,” o le tala lea a Tavita.

“Ia ua lelei,” o le tali mai lea a Tepora.

Ua aga’i atu nei le pea lua lea i le fale o le tina matua ia Kaloline, lea na faatonu e le agaga maliu i le po o le faaaliga i le fale o Tina, afai ae alu atu se tamaloa i lona fale ma se fuafuaga e inivesi ai ana tupe, ia tu’u lona faatuatuaga i lea tamaloa.

Ua o’o atu Tavita ma Tepora i le fale o Kaloline ma ua talia le la faatoga mo se avanoa e latou te talatalanoa ai.  Ua nonofo a’e nei i latou i totonu o le potu malolo.

Ma ina ua mae’a feiloaiga masani, na faapea atu loa Tepora ia Kaloline, “Ua ma o mai, ona o lo’u fia iloa pe iai se moni i faamatalaga a agaga o tagata ua maliliu.  Aemaise le agaga lea na faatonuina oe, e ave au tupe e inivesi i se polokalama teu tupe.”

E le’i uma lelei atu le fesili a Tepora ae oso mai Kaloline, “Oi, ioe e moni ma faamaoni le lapataiga a le agaga o lo’u aiga lea ua maliu.  O le taeao na soso’o ai, na sau ai se alii  lo’u fale ma talatalanoa mai e uiga i lana kamupani e faasao ma faatupu tele ai tupe.”

E FAIA PEA.....