VAEGA 20

E faatalofa atu i le mamalu o le tatou au faitau nusipepa i lenei taeao fou.  Faamoemoe sa outou alafai mai i fanuga lelei i lenei taeao toto’a, taeao manuia.  Ma e iai se faamoemoega o lo o faamalieina loto ma finagalo e tusa ai ma lenei vaega o le auaunaga a Le Lali, e auala atu i le tatou fagogo.  

Ae se’ese’e mai loa i ou seetaga malu, mo le sosooina o le tatou Fagogo.

****************

E le i uma lelei atu le fesili a Tepora i le tina matua ia Kaloline, pe iai seisi ua sau e talanoa atu ia te ia e uiga i ana tupe, e pei ona fautuaina ai o ia e le agaga o le tagata maliu o lona aiga, lea sa auai I le faaaliga faataulaitu a Tina, ae oso mai Kaloline, “Oi ioe, e moni le faamatalaga a le tagata maliu lea o lo’u aiga.  O lea na sau se tamaloa ma faailoa mai lana kamupani e mafai ona inivesi ai a’u tupe, ae mafai e latou ona faasao ma faatupu la’u tupe.”

Ua fetilofa’i Tepora ma Tavita.  Na toe fesili atu Tepora, “E faape’i foliga o lea alii na sau ia te oe?”

Ua le mautonu Kaloline i le fesili a Tepora.  Na faapea atu Tepora, “E aoga mo la’u tala lea o lo’o tusi i le taimi nei.”

“Na fai mai o lona igoa o Ioane.  Ma e pi’o lona vae.  Ma e foliga mai na aafia i se gasegase tuga, ona e pei na a’afia ai lona tino atoa,” o le tali lea a Kaloline.  “Ae i le ma talanoaga, sa ou iloa ai o se tagata alofa ma le loto maualalo.”

“E fai lana ava ma e fai foi lana mata tioata,” o le faaauauina lea o le tau mafaufau a Kaloline.

“O le fea o vae o le tamaloa na e pi’o?” o le fesili lea a Tavita.

Na tau mafaufau Kaloline ma faapea atu, “Ou te tau le manatua po o fea le vae e pi’o.  Ae sa manaia lana folasaga i tulaga o le tupe.  Le aofai e mafai ona ou inivesi ma le aofai o le tupe maua mai.”

“Sa e tuuina iai se tupe?” o le fesili lea a Tepora.

“Ioe, na ou ave iai le afe tala e amata ai la’u inivesi,” o le tali fiafia lea a Kaloline. 

Ua tilotilo atu Tepora ia Tavita ma ona foliga faanoanoa ona o lea ua ai le maunu a Tina ma le tagata leaga lea ua la taufaasese si nei tina matua, ma ave ai lana tupe.

“Sa tu’u atu e le tamaloa ia te oe se pepa e faamaonia ai le lua feagaiga?” o le fesili atu lea a Tavita ia Kaloline.

“Oi ioe, o le pepa na lomia ai le igoa o le kamupani la ua loka I totonu o la’u sefe, ina ia aua ne’i gaoia e seisi,” o le tali fiafia lea a Kaloline, ma le lilo i ona manatu le mea lea ua tupe.

Ina ua tu’umuli ese atu Tavita ma Tepora mai i le fale o Kaloline, sa lagonaina e Tepora lona agaga faanoanoa i le mea ua tupu i si nei tina matua.

Ua aga’i atu nei le to’alua lea, i le fale o seisi tama matua sa auai i le faaaliga lava e tasi lea sa faia i le fale o Tina, lea foi sa maua lana fa’aaliga e uiga i sana tupe maua pe a ia inivesi I se kamupani teu tupe.

Ina ua fesaga’i Tavita ma Tepora ma si tama matua o Atamu ma o ia i le mea e tasi lea na latou talanoa ai ma Kaloline, na ataata le toeaina o Atamu ma faapea mai, “Ioe, sa sau se tamaloa ma sana folasaga e uiga i lana kamupani teu tupe, e pei lava ona faamatala mai e le agaga o lo’u aiga ua maliu, i le po lena i le fale o Tina”. 

E FAIA PEA!