Ads by Google Ads by Google

TU LUA O PO MA AO


[ata: SN]

VAEGA 24

Talofa Lava Lava Lava! Po o faapefea ina outou! Faamoemoe o lo o maloloina, Fa’afetai! 

E faatalofa atu i le mamalu o le atunu’u i lenei taeao fou.  E viia pea le alofa ma le agalelei o le Silisili Ese ona o Lana pule faasoifua ua taitaia mai ai lo outou soifua laulelei i lenei taeao segisegi ma lenei taeao fou.  Ae alo mai loa mo le sosooina o le tatou Fagogo.

***********************

Na toeititi lava oso si alii o Aukuso i luga o le la’au na tu ai I tafatafa ina ua savali atu iai Tavita ma faapea atu, “Oi, o le a lau tala? E foliga mai o le a avea oe ma faasoesa i lo’u olaga, a ea?”

Na tuai le gaioi a le alii o Aukuso, ae mau ai Tavita i le ua o le ofu.

“Aua Tavita!” o a Tepora lea ma taumafai e tulei ese Tavita mai ia Aukuso.

“Afai e te mafai ona tali a’u fesili, o le a ou tu’ua oe e te alu.” o le tala lea a Tavita ia Aukuso.

“O le a?” o le tali mai a Aukuso ma lona leo ua tete i le fefe.

“Na faafefea ona e iloa mea sa tutupu I le maliu o Rasela ma Tina?” o le fesili atu lea a Tavita.

“E iai se alii ou te faatuatuaina, sa ia ta’uina mai mea uma na tutupu i taimi o maliu o nai mafine na,” o le tali lea a Aukuso. “Ae e le mafai ona ou ta’u atu lona igoa.”

O le toe tilotilo mai o Aukuso i le pupula ita atu a Tavita na vave ai ona toe faapea mai, “O se alii leoleo e igoa ia J.J. Ma ou te talitonuina o ia.  Afai e te lua le talitonu ia te a’u, o le aoauli taeao, lea o le fai ai se fa’aaliga a se alii, fai mai e talanoa i agaga o tagata maliliu  O lana fa’aaliga lea e mo leoleo ma tagata su’esu’e i le mataupu lenei, i tagata e fiafia e talanoa i agaga o tagata maliliu.”

“Na ofoina atu e le alii lea lana taleni i leoleo e mafai ona fesoasoani i a latou suesuega i le maliu o Rasela ma Tina,” o le faaopoopo atu lea a Aukuso.

“Ua lelei, afai ae pepelo lau tala, ua e toe vaai ia te a’u,” o le tala lea a Tavita ma u’una’I ese atu le alii o Aukuso.

A’o tilotilo atu Tavita ma Tepora I le savali ese atu o le alii Polofesa/Tusitala o Aukuso, sa faapea atu Aukuso ia Tepora, “E foliga mai na iai seisi tagata na I totonu o fale o Rasela, i le taimi na ou maua ai lona tino maliu, ma o le tagata lea na aveesea le pine ma le uati, lea na toe tu’u i luga o le tino maliu o Tina.”

“O le fesili la lea ua tula’i mai, pe Aisea?” o le faaopoopo atu lea a Tepora.

“E tasi lava le tali o le fesili lena…o le ta auai atu i le fa’aaliga aitu lea la’a fai taeao!” o le tali lea a Tavita, ma la savavali ese atu loa.

Ua o’o i le aoauli o le aso na soso’o ai, ma ua faatumulia le fale ua fuafua e fai ai le fa’aaliga, ma o le pito i tua o le fale, sa nonofo ai Tavita ma Tepora, e matamata mai ai.

Na iloa atu e le to’alua lea le savali mai i totonu o le alii o Aukuso ma tilotilo atu ia la’ua. “Ou te leiloa i tagata, pe aisea lava e talitonu ai i nei mea.” O le tala lea a Tavita.

Na tau tali atu Tepora ae peitai, o le taimi lea ua savali mai ai loa se alii, ma tu i le pito i luma o le, ma ua filemu uma tagata.

Na matua’i faate’ia tele Tepora ina ua vaai atu i le tagata lea, o le alii o Iosefa.  Manatua foi, o Iosefa lea na gutu umi ia Tavita ma ta’u iai tala sa lomia e faasaga i le aiga o Tepora.

E le’I umi ona tu Iosefa i luma o tagata, ae savali atu ai foi ma le alii leoleo lea sa ta’ua e Aukuso, o le alii su’esu’e o J.J.

Na faapea mai Iosefa i le mamalu lautele, “O le a fesoasoani mai le susuga i le malu o le malo, aua le faatalanoaina o le agaga o le a asia tatou i lenei aoauli.”

Na toeitiiti lava pa ifo i luga le ata leotele a Tavita, pe ana le iini lona vae e Tepora.

“Faamolemole, taofi le pati pati, po o le pisapisa o.  E manaomia le filemu atoatoa ina ia le segia le agaga o le a asia tatou i lenei aoauli,” o a Iosefa lea.

E FAIA PEA!