TU LUA O PO MA AO
VAEGA 25
E faatalofa atu i si o tatou aiga i lenei taeao fou. Tatou te si’i faatasi le mua ma le viiga i le Tapaau i le Lagi ona o Lana pule faasoifua ma Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama. E momoli atu foi le agaga faafetai I lo outou lagolagoin o lenei auaunaga i vaiaso taitasi.
Ae saga’i mai loa, o le a toe soso’oina le tatou tala i le alii o Tavita ma le tamaitai o Tepora ma le tau sailiga o le ‘diary’ faitatala lenei ua maliliu ai tagata e toalua.
*******************
Na gata mai le tatou tala i le vaiaso ua mavae, I le auai atu o Tavita ma Tepora i seisi foi fa’aaliga o fa’atalanoaga ma agaga ua maliliu.
Ae na faateia Tepora ina ua vaai atu i le tagata o lo o fa’aautu iai le polokalame i lea aso, o le alii o Iosefa lea sa faitatala ia Tavita e uiga i le aiga o Tepora. Ona o le aiga o Tepora, i tausaga ua tuanai, sa o latou faia foi le mea lea, o le faatalanoa o agaga o tagata maliliu. O faamatalaga ia o lo o taumafai malosi Tepora, e nana mai I tagata aemaise si alii o Tavita. Ma o talaaga ia o lona aiga, lea o lo o tusia i totonu o ‘Diary’ lea la te tau saili ma Tavita, faatasi ai ma tala’aga o le aiga o Tavita, e le o mana’o fo’i Tavita e iloa e nisi.
O le mea lea o lo o naunau ai lava le pea lua lea e maua le tusi lea, ina ia mafai ona faatama’ia lea tusi, ina ia lilo ifo i le palapala, efuefu po o le sami foi.
Ae se’i tatou toe fo’i le fale mata’aga lea o lo o faia ai le fa’aaliga a le alii o Iosefa.
Ua savali atu le alii leoleo su’esu’e o JJ i le mea o lo o tu mai ai Iosefa i le pito i luma o le potu. Ua nofo I luga o le nofoa i le laulau. Ona a’apa atu lea o Iosefa ua ki i lalo le moli matagi o lo o tu i luga o le laulau.
“O le a ou taumafai i lo’u malosi atoa, e fesoasoani i sui malu o le malo, i le latou suesuega, po o ai na fasiotia Rasela ma Tina,” o le saunoa mai lea a Iosefa.
Ua tu’u atu nei e Iosefa le avanoa i le alii leoleo su’esu’e mo ana fesili.
“E mafai ona e talanoa i agaga o nai tina ua maliliu? O Rasela ma Tina?” o le fesili lea a le alii leoleo. “Atonu e mafai ona o la fa’ailoa mai po o ai na fasiotia i la’ua?”
“E faamalie atu,” o a Iosefa. “E le faapena le faiga o le ta galuega. E le mafai ona ou talanoa atu i agaga o tagata maliliu, e pei ona faia e isi tagata.”
Ua gugulu le fale i le femusumusa’i o tagata. Ae o le alii leoleo, ua na o le nofo ma faataupupula atu ia Iosefa, ua le mautonu o ia.
“Ae peitai,” o le toe faasoso atu lea a Iosefa. “O la’u taleni e mafai ona ou vaaia ai mea na tutupu i taimi ua tuanai ma le lumana’i.”
Na fesili atu loa le alii leoleo, “E mafai la ona e taumafai e iloa atu po o ai le tagata fasioti tagata lea na faia le mea leaga lea I nai mafine ia.”
“Afai o iai ni mea totino a nei mafine, e pei ona ou talosagaina, e mafai ona ou taumafai e saili le tagata na fasiotia i la’ua,” o le tali atu lea a Iosefa.
Ua a’apa nei le alii leoleo i totonu o lana taga, ma to mai i fafo le tautaliga a Rasela ia ma se solosolo a Tina, ma tu’u i luga o le laulau.
“Faamolemole, ia tu’u mai sina taimi se’i o’u tapenapena ai,” o a Iosefa lea.
Ona a’apa atu lea o Iosefa ma piki I luga le tautaliga a Rasela faapea le solosolo a Tina ma u’u I ona lima, ae tapuni ona mata.
Ua sa o uma le potu, ua leai se mea e ga se. Ae ua ave uma lagona a tagata i taga a le alii o Iosefa o lo o faia.
Ua pupula ane ona mata ona ia liliu lea ma pulato’a atu i le potu.
E FAIA PEA!